1 Shakapanu Mtuwa kamgambiriti Musa, 2 "Guwagambiri wantu wa Israeli wawuyi kumbeli na wagonjeri mwanja kulongolu kwa lushi lwa Pihahiroti. Lushi alu luwera pakati pa Migidoli na bahari Shamu, pakwegera na lushi lwa Baalizepihoni. Mnyawi malingu genu kulii pakwegera na bahari. 3 Falawu pakavimana kuwera mulikala aku, yomberi hakaliholi, wantu wa Israeli wamana ndiri njira, shiwala shiwatenda nawamani njira yawu. 4 Kumbiti hanimtendi Falawu kaweri kayi na mtiti, na hakalagaliri mashonta gakuyi gawafati. Shakapanu wantu wangu hawankwisi kwa kumkanka Falawu pamuhera na mashonta gakuyi. Na wantu wa Misri hawavimani kuwera neni ndo Mtuwa Mlungu yakawera na makaka goseri." Su Musa kawagambiriti wantu wa Israeli na womberi shilii shawagambirituwi.

5 Muntu yumu kamgambiriti Falawu kuwera wantu wa Israeli wawukiti pashiru, yomberi pamuhera na wakulu wayaguwi wagalambukiti mumaholu gawu na walongiti, "Twenga tutenda hashi? Wantu wa Israeli hapeni waweri wamanda wetu kayi!" 6 Su Falawu kawatandiriti kala mashonta gakuyi pamuhera na mbutuka za ngondu zyazikwegwa na farasi. 7 Shakapanu kazisyaguliti mbutuka ziherepa miya sita zyazikwegwa na farasi, mukila mbutuka kamtuliti mlonguziya farasi na shonta yumu na mkulu gwa mashonta, na womberi wawukiti. 8 Toziya Mtuwa Mlungu kamtenditi Falawu kaweri na mtiti, mweni pamuhera na mashonta gakuyi wagenditi kuwafata wantu wa Israeli yawawukiti kwa ukanka. 9 Mashonta ga wantu wa Misri na farasi woseri wa Falawu na mbutuka zyazikwegwa na farasi na walonguziya farasi, woseri wawafatiti wantu wa Israeli. Su wawawoniti wantu wa Israeli wagonjera mwanja pakwegera na bahari, pakwegera nentu na Pihahiroti, kulongolu kwa Baalizepihoni.

10 Mashonta ga Falawu pagaweriti pakwegera, wantu wa Israeli walikangashiti nentu pawawoniti wankuwaizira. Su watiriti nentu, wanjiti kumlilira Mtuwa Mlungu kawatangi. 11 Wamgambiriti Musa, "Hashi, kuweriti kwahera pahala muisi ya Misri kwa twenga megawezi kufindirwa mpaka gutujega kushiwala kuhowa? Guloli shilii shagututenderiti kutulaviya twenga muisi ya Misri! 12 Shintu ashi tukugambiriti gwenga patuweriti muisi ya Misri! Tukugambiriti, gutuleki gweka yetu na guleki tuwatenderi lihengu wantu wa Misri! Meyiweri mbaka twenga kuwera wamanda kwa wantu wa Misri kuliku kuhowa panu kushiwala!"

13 Musa kawawankula wantu wa Israeli, "Namtira! Mgoloki weri, hamuwoni ntambu Mtuwa Mlungu pakagenda kuwakombola! Hakawalopoziyi mwenga leru na malawiranu gakuyi hagaweri wantu wa Misri yamuwawona leru, hapeni muwawoni kayi! 14 Mtuwa Mlungu mweni hakalikomangi ngondu badala ya mwenga! Mwenga mnyamali jii. Kwahera ntambu yingi yamuweza kutenda."

15 Mtuwa Mlungu kamgambiriti Musa, "Guwagambiri wantu waleki kundilira niwatangi, wendereyi kugenda kulongolu. 16 Gunyasuli luhonga lwaku na gulitalapisiyi gambira gulitalipisiya mubahari. Mashi hagalibaguli, su wantu wa Israeli wawezi kugenda pakati mubahari, pawagendagenda mulitapaka liyuma pakati pa vibambaza viwili vya mashi kila wega. 17 Hanuwatendi wantu wa Misri waweri na mtiti, su womberi hawajeri kuwafata mwenga. Malawiranu gakuyi shintu shang'enda kumtenda Falawu pamuhera na mashonta gakuyi na mbutuka zyazikwegwa na farasi pamuhera na walonguziya farasi, wantu wangu hawankwisi neni. 18 Na pampata ukanka yauwera na ukwisa, wantu wa Misri hawavimani kuwera neni ndo Mtuwa Mlungu yakawera na makakala goseri."

19 Shakapanu ntumintumi gwa kumpindi yakawalongoleriti wantu wa Israeli, kagenditi kumbeli kwa womberi. Lihundi lilii lyaliweriti gambira mpanda liweriti kulongolu kwawu, viraa ligenditi kumbeli kwawu. 20 Lihundi liwabaguliti wantu wa Israeli na mashonta ga wantu wa Misri. Pashiru lihundi lilii lyaliwera gambira mpanda liweriti mpanda ya motu, liwalangaliriti wantu wa Israeli. Kumbiti lituliti ntiti kwa wantu wa Misri mpaka wasinditi kuwawona wantu wa Israeli. Malawiranu gakuyi kwahera shipinga shashiweziti kushisegerera shipinga shamonga pashiru poseri.

21 Pamihi, Musa katalipisiyiti liwoku lyakuyi gambira kankulitalipisiya pabahali. Shakapanu Mtuwa Mlungu kajegiti lyega likulu kulawa kwagulawa mshenji. Lyega livumiti pashiru poseri na liweguliti mashi kumbwega na kutenda pakati pa mwashi kuweri na njira yaiyumiti. 22 Shakapanu wantu wa Israeli wapititi munjira yaiyumiti pakati pa bahari. Mashi gambira vibambaza uwega wa kumshigi na uwega wa kumliwu. 23 Mashonta ga wantu wa Misri wawafatiti womberi, na wayingiriti mubahari pa womberi kwingira mubahari pamuhera na farasi wawu na mbutuka zawu zyazikwegwa na farasi na walonguziya farasi. 24 Pakwegera kushiya, Mtuwa Mlungu kagasunguriti mashonta ga wantu wa Misri mulihundi lilii lya mpanda ya motu, su kawatenditi womberi washashatiki. 25 Kagatenditi magudulumu ga mbutuka zyazikwegwa na farasi gakwami mulikandiga, su womberi wasinditi kugendagenda weri. Su wantu wa Misri watakuliti, "Mtuwa Mlungu kankuwalolera weri wantu wa Israeli na kankutukoma twenga kwa kugawusiya maguludumu ga mbutuka panu."

26 Mtuwa Mlungu kamgambiriti Musa, "Gutalapisiyi liwoku lyaku gambira gulitalapisiya pabahali yoseri. Shakapanu mashi hagawuyi na kuwamiluwa wantu wa Misri na mbutuka zawu pamuhera na walonguziya farasi." 27 Su Musa kalitalapisiya liwoku lyakuyi pabahali na papawushiyiti, mashi ga bahari gawuyiti na kuwera gambira kwanja. Wantu wa Misri wajeriti kushapira, kumbiti wamiluwiti woseri mubahari. 28 Mashi gawuyiti na kugubuka mbutuka zoseri na walongoziya farasi pamuhera na mashonta ga wantu woseri wa Misri, walii yawajeriti kuwafata wantu wa Israeli mubahari. Kila yumu kwa wantu wa Misri kamiluwiti mumashi. 29 Kumbiti wantu wa Israeli walokiti kala mubahari kwa kugendagenda munjira iyuma, mumashi yagaweriti gambira vibambaza viwili, shimu uwega wa kumliwu na shamonga uwega wa kumshigi.

30 Ntambu ayi Mlungu kawalopoziyiti wantu wa Israeli kulawa mumashonta ga wantu wa Misri mulishaka ali. Wantu wa Israeli wagawoniti mauti ga wantu wa Misri gankuyeruka pambeku pa bahari. 31 Wantu wa Israeli woniti shilii Mtuwa Mlungu shakashitenditi kwa wantu wa Misri kwa makakala gakuyi makulu, womberi wamkwisiti Mtuwa Mlungu. Su womberi wamjimiriti Mtuwa Mlungu, viraa wamjimiriti Musa.