1 Kuweriti na muntu yumu yakalawi mushiyiwuku sha Lawi mwana gwa Yakubu. Yomberi kamyugiti mdala viraa gwa shiyiwuku sha Lawi. 2 Su mdala ayu kapatiti yinda, kawuyiriti mwana mpalu. Yomberi pakawoniti kuwera mwana ayu kaherepa nentu, kamfifiti kwa myezi mitatu, toziya kafiliti ndiri kutenda shilii shakalagaliriti Falawu. 3 Pakasinditi kwendeleya kumfifa, yomberi kanyawiti lijamanda lyakatyeremekiti lami su nalipeniziya mashi. Shakapanu kamtuliti mwana mulijamanda pakati pantundu za kumbwega kwa lushemba lwa Naili. 4 Dada gwakuyi kagolokiti pakwegera pakalola yashifira kumlawira. 5 Su muhinja gwa Falawu kasuluka kugenda kulushemba kwoga mashi. Yomberi kawoniti lijamanda lyamuntundu mumbwega mwa lushemba. Su kamtumiti yaya yumu kagendi kulitola lijamanda lilii.

6 Su yaya ulii pakamjegeriti lijamanda lilii, yomberi kaligubutula, kalikangashiti pakamwoniti mwana kankulira. Muhinga ulii kamwoneriti lusungu, kalongiti, "Ayu kawera yumu gwa wana wa Waeburaniya." 7 Shakapanu Dada gwa mwana uli kamwizira mhinja gwa Farao kamgambira, "Hashi gufira nukusakuliri yumu pakati pa wadala wa Shiebrania kakuleleri mwana ayu?" 8 Muhinja gwa Falawu kamgambira, "Yina; gugendi kansakuliri," hangu kagenda, kamshema mawu gwakuyi. 9 Muhinja gwa Falawu kamgambira, "Gumtoli mwana ayu, guneleri, naneni hanukulipi shibena mgongu shaku." Mdala ayu kamtola mwana kamnoneziya. 10 Mwana pakaweriti mkulu, mawu gwakuyi kamjegiti kwa muhinja gwa Falawu, nayomberi kamtola na kumtenda mwana gwakuyi. Muhinja gwa Falawu kampanana litawu Musa, litawu lilifana na shisoweru sha Shiebrania numjabula, Kalongiti "Toziya numlaviya mumashi."

11 Lishaka limu, Musa pakaweriti mkulu, kalawiti mnumba nkulu ya shifalumi kugenda kuwalola wantu wayaguwi wa Shyeburania. Yomberi kawawoniti womberi ntambu yawatendituwi kwa makakala kutenda lihengu likamala nentu. Viraa yomberi kawoniti muntu gwa Misri pakamkoma yumu gwa Mweburaniya muyaguwi. 12 Musa kalola wega zoseri, na pakawoniti kwahera muntu, kamlaga Mmisri na kamkululira mumhanga. 13 Shirawu yakuwi, Musa kawuya palapalii. Kalikangasha kawona Waebraniya wawili wankulikomanga. Kamgambira yakanjiti ndewu,"Kwa shishi gwankumkoma Mwebraniya myagu?" 14 Nayomberi kamwankula, "Gaa kakutula guweri mtoza gwetu?" Gwahera ukulu wa kutukamlira.

Su Musa katiriti na toziya kaliholiti "Kumbiti muntu ayu kavimana shantenditi nakaka wantu wamonga hawavimani!"

15 Na ali liweriti nakaka Falawu kapikaniriti shakamtendiriti Mmisri ulii, kaamulu wanjagira wakuyi wamlagi Musa. Kumbiti Musa kamtira Falawu kawuka Misri, kagenditi kwagulawa mshenji mpaka seemu ya Midiyani kanja kulikala aku. Lishaka limu, Musa kaweriti kalivaga pambeku pa linegu lya mashi.

16 Muntu yakaweriti mtambika kwajili ya Wamidiyani mweni litawu lyakuyi wamshemiti Yesulo kaweriti na wahinja saba. Lishaka limu Musa pakaweriti kalikaliti kumbeku kulinegu, wahinja waliii wiziti kuteka mashi kulinogu. Wamemiziiti vulu zawu mashi su wanji kuwalandisiya mashi kondolu wa tati gwawu. 17 Walolera wamonga wiziti na kwanja kuwawinga wahinja walii. Kumbiti Musa kawatangatira wahinja walii na kuwalandisiya mashi kondolu. 18 Pawawuyiti kwa tati gwawu Yesulo mweni litawu lyakuyi limonga Reuli, yomberi kawakosiyiti, "Mbona leru muwuya kalongola?" 19 Nawomberi wamwankula, "Mmisri yumu katulopoziya mumawoku mwa walolira, kayi yomberi katutekara mashi kulawa kulinegu na kuwalandiziya kondolu."

20 Tati gwawu kawakosiya wahinja wakuyi, "Kaa koshi? Ntambu gaa mumleka haku? Mumshemeri kizi kaliyi shiboga." 21 Watenda hangu Musa kajimira kuliya na womberi na kulikala nawu. Shakapanu Yesulo kampanananiti Zipora kaweri mdala gwakuyi.

22 Zipora kamwiwulira mwana mpalu, kamshema Gerishomu, Shiebrania lyana mana mhenga toziya kalongiti, "Nilikala handa muhenga muisi ayi."

23 Vinja vivuwa shakapanu, mfalumi gwa Misri kahowa. Waisraeli Mumisri waweriti wankutabika nentu toziya ya lihengu likamala lyawafiruwitwi kutenda handa wamanda, walira kuluwa utanga Mlungu kakupikiniriti kulira kwawu. 24 Mlungu kapikaniriti kulira kwawu, kalihola lipatanu lyakuyi lyakalitenditi na Ibrahimu na Isaka na Yakobu lya kuwatekelera wiuka wawu. 25 Mlungu kawona Waisraeli ntambu yawatenderitwi madoda, kawaholera.