1 Womberi wawukiti mlushi lwa Elimi, wantu woseri wa Israeli wiziti kushiwala shashishemuwa Sini. Shiwala ashi shiweriti pakati pa Elimi na lugongu lwa Sinai. Shaka ashi shiweriti lishaka lya lilongu na muhanu, mwezi gwa pili pawawukiti kala muisi ya Misri. 2 Kushiwala aku, wantu woseri wa Israeli wamuhinginikiti Musa na Aruni. 3 Womberi wawagambiriti, "Mbaka Mtuwa Mlungu mekatulagi muisi ya Misri! Kulii kuweriti na vinofu pamuhera na kila ntambu ga mabumunda galii gatufiriti. Kumbiti gwenga gutujega twenga kushiwala panu su tutabiki na kuhowa!"

4 Mtuwa Mlungu kamgambiriti Musa, "Gupikanili shilii shang'enda kutenda. Nankugenda kujega shintu kulwa kulyera hashilifani na mabumunda kwa mwenga. Pantenda hangu, wantu wafiruwa kugenda kunja kwa malingu gawu kila lishaka kusola shiboga shashitosha kuliya lishaka limu. Su pantenda hangu, hanivimani kuwera womberi hawagajimili malagaliru gangu ama ndala. 5 Mulishaka lya sita, pantenda kala shitwatira ashi, womberi hawasoli na shiboga sha lishaka lya saba. Shakapanu womberi hawashitandiri kushiliya."

6 Su Musa na Aruni wawagambiriti wantu woseri wa Israeli, "Pamihi panu hamuvimani kuwera ndo twenga ndiri kumbiti Mtuwa Mlungu yakawalaviyiti mwenga kulawa muisi ya Misri. 7 Shilawu mandawira hamuwoni ukulu yakawera nawu Mtuwa Mlungu, toziya kapikaniriti shilii shamtuhinginikiti twenga. Yomberi ndo yumu mwenga nakaka yamumuhinginikiiti, toziya twenga twawantumintumi wakuyi." 8 Shakapanu Musa kalongiti, "Kila pamihi, Mtuwa Mlungu hakawapanani vinofu muliyi, na kila mandawira hakawapanani shintu shashiwera gambira mabumunda, toziya kapikaniriti shamuhinginika. Twenga ndiri yamtuhinginikiiti, kumbiti Mtuwa Mlungu ndo ulii nakaka yamumuhinginikiiti. Twenga twawantumintumi wakuyi."

9 Musa kamgambira Aruni, "Guwagambiri wantu woseri wa Israeli, wizi panu wagoloki kulongolu kwa Mtuwa Mlungu, toziya yomberi kapikanira shilii shawahinginikiti." 10 So Aruni kawagambiriti womberi. Na pakaweriti kankuyowera na wantu wa Israeli, womberi waloliti kushiwala na walikangashiti kuwona ukwisa wa Mtuwa Mlungu mulihundi lilii lyaliwalongoziyiti. 11 Shakapanu Mtuwa Mlungu kamgambiriti Musa, 12 "Mpikanira shilii wantu wa Israeli shawahinginikiti. Su guwagambiri, pamihi hamuliyi vinofu, na shilawu pamandawira hamusoli vintu gambira mabumunda ga kuliya. Shakapanu hamuvimani kuwera neni ndo Mtuwa Mlungu, Mlungu yakawera na makakala goseri."

13 Su pamihi wampongu wangwali walawiriti, waweriti wavuwa nentu na kugubika pahala poseri pawalikaliti pamalingu gawu. Shilawu yakuwi kuweriti na vintu gambira mangami phala pa malingu gawu. 14 Mangami aga pagayumiti, pashiwala kuweriti na vintu vyavilifana na mabumunda gatopa ndiri. 15 Wantu wa Israeli pawawoniti vintu avi, toziya womberi waweriti haweniviwoni pamberi, su wavimaniti ndiri, womberi walikosiyiti weni kwa weni, "Shintu gaa ashi?"

Musa kawawankura, "Shintu ashi Mtuwa Mlungu kawapananiti mwenga mliyi, shintu shashilifana gambira mabumunda. 16 Mtuwa Mlungu kalagalira hangu, kila muntu kasoli shiboga shashimtosha kuliya. Kasoli makopu mawili kwajili ya kila muntu yakalikala mulilingu lyaku."

17 Hangu ndo wantu wa Israeli ntambu yawatenditi. Wamu wasoliti ng'anji na wamonga wasoliti kidogu. 18 Kumbiti woseri pawapimiriti shilii shawasoliti, woseri wayambuliti kuwera ulii yakasoliti vivuwa kaweriti ndiri na shigubikiru na ulii yakasoliti kidogu kapungukiwituwi ndiri. Kila muntu kasoliti shiboga shashimtoshiti kuliya.

19 Musa kawagambiriti womberi, "Namleka shigubikiru sha kuliya shilawu mandawira!" 20 Kumbiti wantu wamonga walisheriti ndiri shilii shakatakuliti Musa. Womberi watuliti shigubikiru mpaka shilawu mandawira. Su shiboga shilii shiworiti na shiwera na wambikinyu na shinunkiti. Musa kawakalariti nentu womberi.

21 Kila mandawira wajojoniriti shiboga shashimtosha kila muntu. Kumbiti shakapanu, mshenji paguwaliti, shilii shawashisigaliti mulitapaka shiyeyukiti.

22 Mulishaka lya sita, wantu wa Israeli wanjiti kujojonira shiboga, kila muntu kaweziti kujojonira pishi za msheshi kuliku ntambu yawatenditi mumashaka gamonga. Wakulu wa wantu pawawiziti kwa Musa na kumgambira shitwatira ashi, 23 yomberi kawagambira, "Mtuwa Mlungu ntambu yakalagaliriti, shilawu haliweri lishaka lyenu la kwoyera nakamu. Haliweri lishaka lyalitulituwi kwajili ya Mtuwa Mlungu. Su leru, mmtereki ama mposiyi shiboga shilii shamfira kuliya leru na shilawu. Shilii shashisigala pamihi leru, mushituli shigubikiru na hamushiliyi shilawu."

24 Su womberi watenditi ntambu yawalagaliritwi na Musa. Shilii shashisigaliti, womberi washituliti mpaka lishaka lyalifatiti. Shiboga shilii shiwoliti ndiri ama kuwera na wambikinyu! 25 Mulishaka ali, Musa kawagambiriti, "Leru muliyi shilii shashisigariti lishu, toziya leru liwera lishaka lyalitulituwi kwajili ya Mtuwa Mlungu. Leru hapeni msoli shintu shoseri kunja. 26 Kila lijuwa, mwenga hamsoli kwa mashaka sita, kumbiti mulishaka lya saba haliweri lishaka lya Kwoyera, hapeni msoli shoseri."

27 Mulishaka lya saba wantu wamu walawiti kugenda kusola shiboga, kumbiti washipatiti ndiri. 28 Shakapanu Mtuwa Mlungu kamgambiriti Musa kawagambiri wantu, "Hashi, mpaka ndii mwenga wantu hamlemi kupikanira shilii shanuwagambira? 29 Mpikaniri! Neni Mtuwa Mlungu nuwapananiti mwenga lishaka lya Kwoyera. Su mulishaka lya sita kila lijuwa, yomberi haniwapanani mwenga shiboga shitosha kwa mashaka mawili. Kila yumu gwenu kafiruwa kalikali mulilingu lyakuyi nakatenda lihengu mulishaka lya saba." 30 Su wantu woyeriti mulishaka lya saba.

31 Wantu wa Israeli washishemiti shiboga ashi mana, shipikanirika gambira shisoweru mulikabila lyawu lyaliwera na mana ashi ndo shishi? Shiboga ashi shiweriti gambira mbeyu ndidini ya usaka na unoga wakuyi uweriti gambira libumunda lyalitulituwi lwashi. 32 Musa kawagambiriti, "Mtuwa Mlungu ntambu yakalagaliriti, mtuli makopu mawili ga shiboga shashishemuwa mana kwajili shileri sha mwenga sha shakapanu, su womberi hawawoni shiboga shashilifaniti na mabumunda shanuwapananiti wambuyi wenu panuwalaviyiti kulawa muisi ya Misri." 33 Musa kamgambiriti Aruni, "Gutoli shombu na gulituli pishi mbili za shiboga shashimuwa mana. Shakapanu gutuli pahala Mtuwa Mlungu kaweza kuwona. Ashi hashituluwi kwajili ya shileri shenu shoseri sha shakapanu." 34 Mumivinja ivuwa, Mtuwa Mlungu ntambu yakamlagaliriti Musa, Aruni kashituliti shombu shilii kulongolu kwa lisabduku lyaliweriti na mabuwi gagalembituwi malagaliru lilongu. 35 Wantu wa Israeli waliyiti shiboga sha mana kila lishaka kwa mivinja malongu msheshi, mpaka pawayingiriti mumipaka ya isi ya Kanaani. 36 Shipimu ashi womberi washitendiriti mpaka shaka sha vinu.