1 Wantu pawawoniti kuwera Musa kakawa kuwuya kulawa kuligongu, womberi wajojonikiti kulongolu kwa Aruni na kumgambira, "Gwizi gutunyawiri twenga milungu ya kutulonguziya toziya twenga tuvimana ndiri shashimlawiriti Musa yakatulaviyiti twenga kulawa Misri."

2 Aruni kawankula, "Mtoli zahabu zyawavala wadala wenu na wana wenu, su munjegeri neni." 3 Su wantu woseri walaviyiti zahabu zawu zyawavaliti na kumjegera Aruni. 4 Yomberi katoliti vintu virii na kuvilembetiziya mumotu, su kanyawiti mfanu gwa mwana gwa ng'ombi. Shakapanu wantu pawawoniti wabotiti, "Gwee Israeli, ayu ndo mlungu gwetu yakatulaviyiti twenga kulawa Misri."

5 Shakapanu Aruni kanyawiti shitalawanda sha kutambikira kulongolu kwa mwana gwa ng'ombi gwa zahabu ulii na kubwera, "Shilawu hakuweri na msambu gwa kumgohelila Mtuwa Mlungu." 6 Shilawu yakuwi mandawira wantu walaviyiti tambiku za kulunguziya pamuhera na tambiku za ponga. Wantu walivagiti pasi kuliya na kulanda, shakapanu wagolokiti na kuvina na kutenda vintu vidoda.

7 Mtuwa Mlungu kamgambiriti Musa, "Guseleri pasi toziya wantu waku yaguwajegiti kulawa Misri walipotuziya weni, 8 wayileka kamkamu hera njira yanuwalagaliriti, su walinyawira weni shinyagu sha mwana gwa ng'ombi. Womberi washiguwira na kushilavilira tambiku pawalonga, gwee Israeli, ayi ndo milungu yatwenga yaitulaviyiti twenga kulawa Misri. 9 Nuwamana wantu awa wawera na mtiti. 10 Vinu gundeki, maya gangu gankugenda kuwagamiziya. Shakapanu hanikutendi gwenga pamuhera na shiyiwuku shaku muweri isi nkulu."

11 Kumbiti Musa kamuhigiti Mtuwa, Mlungu gwakuyi, pakalonga, "Gwee Mtuwa Mlungu, kwa ntambu gaa guwera na maya nkulu kwa wantu waku yaguwalaviyiti kulawa Misri kwa uwezu waku na makakala gaku makulu? 12 Pagutenda hangu, nakaka wantu wa Misri hawalongi, kawalaviyiti Misri su kuwajega kuwalaga kuligongu na kuwagamiziya nakamu pasipanu. Gwee Mtuwa Mlungu gwoyi maya gaku makulu, guleki shitwatira ashi shagufiriti kushitenda kwa wantu waku. 13 Guwaholi wantumintumi waku Abrahamu na Isaka na Israeli, gamweni guwalapiriti pagulongiti,hanishiyongeri shiyiwuku shenu kuwera gambira ntondu za kulyera na isi yanuwalagiliti Hanishipanani shileri sha mwenga washihali mashaka goseri." 14 Su Mtuwa Mlungu kalekiti kuwatendera wantu wakuyi shitwatira shilii shidoda shakaliholiti kuwatendera.

15 Shakapanu Musa kaseleriti kulawa kuligongu pakawera na mabuwi galii mawili gagalembituwi kulongolu na kumbeli malagaliru ga Mlungu. 16 Mlungu mweni ndo yakaganyawiti mabuwi galii na malembu galii yakagalembituwi, gasongolituwi na Mlungu mweni.

17 Yoshuwa pakapikaniriti umatu wa wantu pawabotanga, kamgambiriti Musa, "Kwana umatu wa ngondu mukambi." 18 Kumbiti Musa kamwankula, "Umatu ndiri wa ukanka ama kusinda, kumbiti umatu wa wantu yawimba."

19 Kamkamu hera Musa pakiziti pakwegera na kambi na kuwona shinyagu sha mwana gwa ng'ombi na wantu pawavina msambu, palaa maya gakuyi gatutumuka gambira motu na kagawasiti pasi mabuwi galii yagaweriti naga mumawoku mwakuyi, kagapantiti pasi palii palugongu. 20 Su, kamtoliti shinyagu sha mwana gwa ng'ombi ulii na kumkoziya motu, kashipuntiti nakamu kuwera ubumu, ubumu ulii kauhanganyikiti mumashi na kuwagambira wantu wa Israeli walandi.

21 Musa kamkosiyiti Aruni, "Wakutenditi shishi wantu awa mpaka guwayingiziya muvidoda vikulu avi?" 22 Aruni kamwankula, "Nikuluwa gwee mtuwa gwangu kuwera maya gaku naganizira neni ntumintumi gwaku. Guwamana wantu waku ntambu yawawera kala kutenda ukondora. 23 Womberi wiziti na kung'ambira, gututenderi twenga mlungu yakagenda kutulonguziya toziya Musa yakatulaviyiti Misri tuvimana ndiri shashimlawiriti. 24 Su neni niwagambiriti womberi, muntu yoseri yakawera na zahabu, kavuli. Shakapanu womberi wampananiti neni zahabu zilii na neni nuzilembeleziyiti mumotu na nuwanyawiriti shinyagu ashi sha mwana gwa ng'ombi!"

25 Su Musa pakawoniti kuwera wantu wamleka Mlungu na kutenda ntambu yawafira weni toziya Aruni kawalekiti watenditi ukondola na kutenda ntambu yawafira na kulijegera weni soni kulongolu kwa wangondu wawu, 26 Musa kagolokiti kulongolu kwa ligomi lya kambi na kakosiyiti, "Hashi gaa yakaweri uwega wa Mtuwa Mlungu? Su kizi kwaneni!" Wana woseri wa Lawi wajojanikiti pamuhera kulongolu kwa Musa. 27 Shakapanu Musa kawagambiriti womberi, "Mtuwa, Mlungu gwa wantu wa Israeli kalonga hangu, kila muntu na kalitawi ligumba lyakuyi mushunu, kagendi kila pahala mukambi, kulawa ligomi limu mpaka ligomi lyamonga, kila muntu kamlagi mlongu gwakuyi na ganja gwakuyi na gwapakwegera gwakuyi." 28 Wana wa Lawi watenditi gambira Musa ntambu yakawalagiliriti. Mulishaka lilii womberi wawalagiti wantu elufu tatu. 29 Musa kalongiti, "Leru mlityeka maweni kumtendera Mtuwa Mlungu, toziya mtira ndiri kuwalaga wana wenu na walongu wenu. Mlungu kawatekeleri mulishaka ali."

30 Shilawu yakuwi Musa kawagambiriti wantu, "Mwenga mtenda vidoda vikulu. Kumbiti vinu hankweni kuligongu kugenda kwa Mtuwa Mlungu, pamonga weza kuwakolaniziya toziya ya vidoda vyenu." 31 Musa kagenditi kwa Mtuwa Mlungu na kamgambiriti, "Wantu awa watenda vidoda viluku. Womberi walinyawiriti shinyagu sha zahabu na kushiguwira. 32 Kumbiti vinu nukuhiga shondi guwalekeziyi vidoda vyawatenditi, paguwalekeziya ndiri gunuwusiyi mushintola shaku shaguwalembiti wantu waku." 33 Kumbiti Mtuwa Mlungu kamgambiriti Musa, "Hanumusiyi mushintola shangu muntu yoseri yakatenditi vidoda. 34 Vinu gugendi gwakawalonguziyi wantu mpaka pahala panakugambiriti, ntumintumi gwa kumpindi hakakulongoleri. Shaka pashiza sha kuwazibu, hanuwazibu womberi toziya ya vidoda vyawatenditi."

35 Mtuwa Mlungu katenditi wantu walwali ulweli yaushemuwa tawuni, toziya wamluwiti Aruni kawanyawiriti shinyagu sha zahabu sha mwana gwa ng'ombi.