1 Shakapanu Mtuwa Mlungu kamwankula Musa, "Vinu haguwoni shilii shang'enda kushitenda kwa Falawu pamuhera na wantu wakuyi. Kwa makakala hakalazimiki kuwaleka wantu wangu wawuki. Kwa makakala hakawawingi wawuki muisi yakuwi"

2 Viraa Mlungu kamgambira Musa, "Neni ndo Mtuwa Mlungu. 3 Neni ndo ulii yakawalawiriti Abrahamu na Isaka na Yakobu, niwagambiriti womberi kuwera neni ndo Mlungu yawera na Makakala, kumbiti niwagambiriti ndiri womberi kuwera litawu lyangu, Mtuwa Mlungu. 4 Kayi ntenditi lipatanu nawomberi panuwalagiliti kuwapanana isi ya Kanaani, yawalikaliti gambira wahenga. 5 Mnu ga aga, mpikanira kulila kwa wantu wa Israeli toziya watendituwi kwa makakala na wantu wa Misri kutenda mahengu ga umanda, su niliholiti lipatanu lyangu. 6 Su guwagambiri wantu wa Israeli kuwera neni ntakula hangu, neni ndo Mtuwa Mlungu! Hanuwalaviyi mwenga kulawa muvisanka vya kutenda mahengu gakamala galii gampananituwi na wantu wa Misri. Hanuwatendi muweri walekeru kulawa muumanda wawu. Kwa makakala gangu makulu na kuwaazibu womberi kwa ukaripa, hanuwakomboli. 7 Hanuwatendi mwenga muweri wantu wangu, na neni haweri Mlungu gwenu, Mlungu ulii yamumguwira. Mwenga hamuvimani nakaka kuwera neni ndo Mtuwa Mlungu, Mlungu gwenu, neni ndo ulii yamuwalopoziyiti kulawa muvisanka vya mahengu ga umanda ga wantu wa Misri. 8 Na neni hanuwajegi muisi yanuwalagiliti kuwapanana Abrahamu na Isaka na Yakobu. Haniwapanani isi ayi muhali mashaka goseri. Neni ndo Mtuwa Mlungu yandagila aga.’"

9 Musa kawagambiriti aga wantu wa Israeli, kumbiti womberi wajimiriti ndiri shilii shakatakuliti. Womberi waweriti na utama mumoyu toziya ya ukatili yawatendirituwi muumanda wawu.

10 Shakapanu Mtuwa Mlungu kamgambiriti Musa, 11 "Gugendi kayi kwa Falawu kuwera kafiruwa kawalekeziyi wantu wa Israeli wawuki muisi yakuwi"

12 Kumbiti Musa kamgambiriti Mtuwa Mlungu, "Gupikanili shilii shanonga. Ata wantu wa Israeli wampikaniriti ndiri neni toziya nana shibaba. Su Falawu hakawezi hashi kumpikanira?"

13 Kumbiti Mtuwa Mlungu kawagambiriti Musa na Aruni, pakawalagalira, muwagambiri wantu wa Israeli pamuhera na Falawu kuwera nuwalagalira mwenga muwalongoziyi wantu wa Israeli kulawa Misri.

14 Ayi ndo walanga wa shiyiwuku sha Israeli viraa kashemwa Yakubu.

Wana wa Rubeni, shipanta njira sha Yakubu. Womberi waweriti Hanoku na Palu na Hesironi na Karimi. Ashi shiweriti shiyiwuku sha walongu wa Rubeni.

15 Wana wa Simiyoni waweriti Yemueli na Yamini na Ohadi na Yakini na Sohari na Shauli ulii yakaweriti mawu gwa wantu wa Kanaani. Ashi shiweriti shiyiwuku sha Simiyoni.

16 Aga ndo matawu ga wana wapalu wa Lawi kulawirana na kwiwuka kwawu, womberi waweriti Gerishoni na Kohati na Merari. Lawi kahowiti pakawera na mivinja miya na malongu matatu na saba.

17 Wana wa Gerishoni waweriti Libini na Shimei. Womberi waweriti wambuyi kulawirana na lukolu lwawu.

18 Wana wapalu wa Kohati waweriti Amramu na Izihari na Hebroni na Uzieli. Kohati kahowiti pakawera na mivinja miya na malongu matatu na ntatu.

19 Wana wapalu wa Merari waweriti Mahili na Mushi. Awu ndo ukolu wa Walawi kulawirana na shiyiwuku shawu.

20 Amramu kamuyugiti Yokebedi dada gwa tati gwakuyi. Yomberi kaweriti mawu gwa Musa na Aruni. Amrani kahowiti pakawera na mivinja miya na malongu matatu na saba.

21 Wana wapalu wa Izihari waweriti Kora na Nefegi na Zikiri.

22 Wana wapalu wa Uzieli waweriti Mishaeli na Elizafani na Sitiri.

23 Aruni kamuyugiti Elisheba muhinga gwa Aminadabu, ulii yakaweriti dada gwakuyi Nashoni. Elisheba kayiwuliti wana wapalu wamsheshi, Nadabu na Abihu na Eleazari na Itamari.

24 Wana wapalu wa Kora waweriti Asiri na Elikana na Abiasafu. Womberi waweriti wambuyi wa walongu wa Kora.

25 Eleazari mwana mpalu gwa Aruni, kamuyugiti yumu gwa muhinga gwa Putieli, nayomberi kamuyuwuriti Finehasi. Awu ndo upeleru wa kaya na ukolu wa shiyiwuku sha Lawi. 26 Aruni na Musa ndo yawagambilituwi na Mlungu, "Muwalaviyi wantu wa Israeli kulawa muisi ya Misri." 27 Womberi ndo yawayoweriti na Falawu kuusu kuwalaviya wantu wa Israeli kulawa muisi ya Misri. 28 Lishaka lilii Mlungu pakayoweriti na Musa muisi ya Misri, 29 kamgambiriti, "Neni ndo Mtuwa Mlungu. Gumgambiri Falawu kila shintu shanukugambira." 30 Kumbiti Musa kamgambiriti Mtuwa Mlungu, "Gumpikaniri, neni nana shibaba. Su Falawu hakawezi hashi kumpikanira shilii shang'enda kumgambira?"