1 Musa kavijojoniriti vipinga vyoseri vya wantu wa Israeli na kawagambiriti, "Avi viwera vitwatira Mtuwa Mlungu kalagalira muvitendi. 2 Mumashaka sita hamtendi mahengu genu, kumbiti lishaka lya saba haliweri lishaka lya Kwoyera, lishaka lyawalityekituwi kwa Mtuwa Mlungu. Muntu yoseri yakatenda lihengu mulishaka ali, hakalagwi. 3 Namukoziya ata motu mnumba zyenu lishaka lya Kwoyera.

4 Musa kawagambiriti wantu woseri wa Israeli, ashi ndo shitwatira Mtuwa Mlungu kawalagaliriti mushitendi. 5 Kulawa muvilii yamuwera navi, mlaviyi malaviwu kwa Mtuwa Mlungu. Kila muntu yakawera na moyu guherepa hakamjegeri Mtuwa Mlungu malaviwu ga zahabu na madini ga feza na shaba 6 ubunda wa buluu na ya zambalawu na nsheri na nguwu iherepa yaipotituwi na mibayira ya mbuzi, 7 lukuli lwa kondolu gwa shipalu zyazilekeluwa langi nsheri na lukuli lwa mbuzi na mbawu za mtera gwa mjoholu, 8 lipaki kwajili ya vikoluboyi na viwungu kwajili ya lipaki lya kutyekuwa kwajili ya ubani yauwera na ununkira uherepa, 9 mabuwi ga beyi nkulu gagashemuwa saridoniki na mabuwi gamonga ga beyi nkulu kwajili ya malembiziwu ga shipandi sha kugubika shifuwa na shihaku sha pashifuwa.

10 Kila muntu yakawera na umana wa kuyawa shintu tunga pakati pa mwenga, hakizi ku vyoseri vyakalagaliriti Mtuwa Mlungu. 11 Kunyawa Liringu Linanagala, shigubiku shakuwi na lipaziya lyakuyi, na vikoleru vyakuwi na vigoweru vyakuwi na mpanda zyakuwi na vikaliru vyakuwi. 12 Lisandiku lya lipatanu pamuhera na mipiku yakuwi, mfiniku gwagushemuwa pahala pa kulekeziya vidoda na lipaziya lya Pahala Pananagala nentu. 13 Shitalawanda na mashera gakuyi pamuhera na vyombu vyakuyi vyoseri, mabumunda yagalekeruwa kulongolu kwa Mtuwa Mlungu, 14 shintambi sha vikoluboyi pamuhera na vyombu vyakuwi vyoseri, vikoluboyi pamuhera na lipaki lyakuyi, 15 shitalawanda sha kutambikira sha ubani pamuhera na mipiku yakuwi, lipaki lya kutyekuwa na ubani yauwera na ununira uherepa, lipaziya lya paligomi lya Liringu Linanagala. 16 Shitalawanda sha kutambikira sha kulunguziya pamuhera na wavu wa shaba na mipiku yakuwi pamuhera na vyombu vyakuwi vyoseri, libeseni likulu pamuhera na shikaliru shakuwi. 17 Mapaziya ga kuzyengetilira mdamu pamuhera na mpanda zakuwi na vikaliru vyakuwi na lipaziya lya ligomi lya mdamu, 18 vigingi vya Liringu Linanagala na vigingi ya mdamu pamuhera na ngoyi zyakuwi." 19 Nguwu ziherepa zyazisonuwa weri kwajili ya utenderu wa Pahala Pananagala, "Nguwu zilii zyaziwera nanagala za mtambika Aruni pamuhera na wana wakuyi, toziya ya utenderu wawu wa shitambika."

20 Shakapanu wantu woseri wa Israeli wawukiti kulawa kulongolu kwa Musa. 21 Kila muntu kafiliti kumlavilira Mtuwa Mlungu. Womberi walaviyiti malaviwu gawu kwajili ya Liringu Linanagala, utenderu wakuyi pamuhera na nguwu zakuwi nanagala. 22 Wantu woseri yawaweriti na moyu guherepa, wapalu na wadala, wajegiti vipini vyawavala mumpula na heleni na peti na ukufu na kila ntambu ya vyombu vya zahabu, kila muntu kamlaviliriti Mtuwa Mlungu shintu sha zahabu. 23 Na kila muntu kajegiti shoseri shakaweriti nashu gambira ubunta langi ya buluu na ya zmbalawu na ya langi ya nsheri ama nguwu mfufu iherepa ama mibayira ya mbuzi ama lukuli lwa kondolu lyalitulituwi langi nsheri. 24 Kila muntu yakaweziti kulaviya mpiya ama shaba kaijegiti kwa Mtuwa Mlungu kuwera laviwu lyakuyi. Kayi muntu yoseri yakaweriti na mbawu za mtera gwa mjohoru kajegiti viraa. 25 Wadala woseri yawaweriti na ufundi gwa kupota, wajegiti ubunta wa langi ya buluu na langi ya zambalawu na nsheri na nguwu mfufu iherepa yaipotituwi. 26 Na wadala woseri waweriti na umana wapotiti mibayira ya mbuzi. 27 Wakulu wajegiti vintu vya beyi nkulu vya langi pamuhera na mabuwi gamonga kwajili ya malembeziwu mushipandi sha nguwu sha kugubika shifuwa na shihaku sha pashifuwa, 28 wajegiti viraa viwungu na lipaki kwajili ya vikoluboyi, lipaki lya kutyekuwa pamuhera na ubani yauwera na ununkira uherepa. 29 Wantu woseri wa Israeli, wapalu na wadala, yawafiriti kulaviya malaviwu gawu kwa Mtuwa Mlungu ntambu yakamlagaliriti Musa katendi, womberi walaviyiti kwa moyu gunanagala, handa malaviwu ga kumpanana Mtuwa Mlungu.

30 Musa kawagambiriti wantu wa Israeli, "Mpikaniri weri! Mtuwa Mlungu kamsyagula Bezaleli mwana gwa Uri, mzukulu gwa Huri gwa likabila lya Yuda. 31 Kamumemiziya rohu yakuwi, kampanana umana na mahala na ufundi, 32 yomberi hakawezi kubuni kunyawa vintu vya zahabu na feza na shaba, 33 kasongoli mabuwi ga kulembeziya mbawu kwajili ya lihengu lyamonga lyoseri lya shifundi. 34 Viraa kampanana uwezu Oholiabu mwana gwa Ahisamaki, gwa likabira lya Dani wawafundi wamonga. 35 Kawapanana kuvimana kutenda kila lihengu lya ufundi ama lyawatenda wantu wa kutenda umana ama mafundi wa kusona kwa ubunta langi ya buluu na nzambalawu na nsheri na nguwu mfufu iherepa yaipotituwi, kwa kuutendera ufundi woseri wa mtenda umana."