1 Yetiru ulii yakaweriti mtambika gwa shipinga sha wantu wa Midiyani, viraa kaweriti mganafu gwa Musa, yomberi kapikaniriti goseri Mlungu gakatenditi kwa wantu wa Israeli. Yomberi kapikaniriti Mtuwa Mlungu ntambu yakawalaviyiti wantu wa Israeli kulawa muisi ya Misri. 2 Musa kamuwuziyiti ukaya Sipora mdala gwakuyi pakawuyiti kulawa muisi ya Misri. Kumbiti Yatiru kamwiziriti yomberi, 3 pakamjega Sipora pamuhera na wana wakuyi wawili. Mwana yumu kashemwa Gerishoni, kwa Shieburaniya mana yakuwi muhenga, toziya yomberi kalongiti, "Neni weriti muhenga nilikaliti muisi yamonga." 4 Mwana gwakuyi gwa pili kashemwa Eliezeri, kwa Shieburaniya mana yakuwi Mlungu kantanga, toziya yomberi kalongiti, "Mlungu, ulii wambuyi wangu wamguwiriti, yomberi kantanga neni na kanopoliti kulawa kulaguwa na Falawu muisi ya Misri."

5 Musa pamuhera na wantu wa Israeli pawanyawiti malingu kushiwala pakwegera na Sinai lugongu lunanagala, Yatiru kamwiziriti yomberi pakamjegera Musa mdala gwakuyi pamuhera na wana wapalu wakuyi wawili. 6 Yatiru katumiti ujumbi kwa Musa, "Neni mganafu gwaku Yatiru, nankwiza kukulola, nakwiza pamuhera na mdala gwaku pamuhera na wana wapalu waku wawili!" 7 Su Musa kalawiti kunja kumalingu kugenda kumwanka mganafu gwakuyi. Yomberi kasuntamaliriti kulongolu kwa yomberi, kamnonera musingu. Woseri walikosiyana, gwakashina mwatu? Shakapanu womberi wagenditi muliringu lya Musa. 8 Musa kamgambiriti Yetiru kila shintu Mtuwa Mlungu ntambu yakamtenditi Falawu pamuhera na wantu wa Misri toziya ya wantu wa Israeli. Viraa kamgambiriti ntabiku zyawazipatiti munjira, pamuhera na Mtuwa Mlungu ntambu yakawatangiti. 9 Yetiru kanemeleriti nentu pakapikaniriti kuusu Mtuwa Mlungu ntambu yakatenditi kwa kwantu wa Israeli. 10 Yomberi kalongiti, "Kazyumuwi Mtuwa Mlungu, ulii yakawakomboliti mwenga kulawa mumakakala ga mfalumi wa wantu wa Misri pamuhera na mashonta gakuyi! 11 Vinu nyambula kuwera Mtuwa Mlungu mkulu kuliku milungu yoseri, toziya kawakombola mwenga kulawa mumakakala ga mtiti gwa wantu wa Misri palii pawawatenditi mtabiki." 12 Shakapanu Yetiru kamlaviyiti nkanyama kwajili ya kulunguziya mushitalawanda sha kutambikira kuwera tambiku, viraa kamlaviyiti tambiku zyamonga kwa Mlungu. Aruni pamuhera na wakulu wa wantu wa Israeli, wagenditi pamuhera na womberi kuliya shiboga pamuhera na Yetiru.

13 Shilawu yakuwi, Musa kalikaliti pahala pakuwatozera wantu. Wantu wendereyiti kujega matatizu gawu kwa Musa, kwanjira mandawira mpaka pamihi. 14 Yetiru pakawoniti kila shintu Musa shakatenditi kwa wantu, yomberi kalongiti, "Iwera hashi gwankutenda vintu avi kwa wantu? Iwera hashi gwankutenda gweka yaku, wantu woseri wankukugolokera gwenga kwanjira mandawira mpaka pamihi, pawakuluwa guwatozi?"

15 Musa kamwankula, "Nankutenda hangu toziya wantu wanizira pawasakula shilii shakafira Mlungu. 16 Pawawera na ndewu yoseri, womberi wiza kwaneni na wanduwa ntozi ga kateratera pakati pawu. Viraa neni nuwafunda malagaliru ga Mlungu pamuhera na malagizu." 17 Yetiru kamgambiriti Musa, "Shilii shagutenda shifaa ndiri kwa gwenga ama kwa wantu. 18 Gwenga pamuhera na wantu awa hamtoki! Lihengu ali likamala nentu kwa mwenga. Hapeni muwezi kulitenda gweka yenu. 19 Vinu gupikanili visoweru viherepa vyang'enda kukugambira. Handa pagutenda shang'enda kukugambira, Mlungu hakakutangi. Gwenga gufiruwa kwendeleya kumluwa Mlungu na kumgambira kuusu matatizu. 20 Viraa gwenga gufiruwa kuwafunda womberi shilii Mlungu shakalagaliriti na gakakugambiliti. Gwenga gufiruwa viraa kugatakulira kwa womberi ntambu yawafiruwa kulikala mumakaliru gawu, pamuhera na vintu vyawafiruwa kuvitenda. 21 Kumbiti muvitwatira vyamonga, guwasyaguli wantu wamonga wakutangi. Guwasyaguli wantu yawamtira Mlungu, yawawera waminika na yawajimira ndiri finda. Guwasyaguli muwamu mwawu watendi utoza mushipinga sha wantu lilongu, shipinga shamonga sha wantu malongu muhanu, shipinga shamonga sha wantu miya na shipinga shamonga sha wantu elufu. 22 Guwalekeziyi womberi watendi mashaka goseri kutoza matatizu ga wantu. Shintu shashiwera shikamala, wakujegeri gwenga, kumbiti virii vyaviwera vikamala ndiri, womberi waweza kumalira weni. Ntambu ayi hayiweri mbaka mulihengu lyaku handa womberi pawakutanga kutenda lihengu ali. 23 Handa Mlungu kakugambira gutendi hangu, gwenga hapeni gutoki na wantu woseri hawawuyi ukaya kwau pawawera na ponga, mataizu gawu pagamaliruwa kalongola."

24 Musa kajimiriti shilii shakagambirituwi na Yetiru mganafu gwakuyi. 25 Musa kawasyaguliti wantu yawafaa kulawa pakati pa wantu wa Israeli na kawatenditi waweri watoza mushipinga sha wantu lilongu, shipinga shamonga sha wantu malongu muhanu, shipinga shamonga sha wantu miya na shipinga shamonga sha wantu elufu. 26 Womberi wasyagulituwi kuwera mashaka goseri hawagatozi weri matatizu ga wantu. Su womberi kwa galii matatizu makulu wamjegiriti Musa, kumbiti matatizu galii makulu ndiri wagamaliriti wawu weni. 27 Shakapanu Musa kamgambiriti kwahere Yatiru mganafu wakuyi, su yomberi kawuyiti muisi yakuwi.