1 Mtuwa Mlungu kamgambiriti Musa, 2 guwagambiri wantu wa Israeli wanjegeri neni malaviwu. Gwenga haguwanki malaviwu kwajili ya neni kulawa kwa kila muntu yakalaviya kwa moyu. 3 Aga ndo malaviwu gagugenda kugawanka kulawa kwa womberi. Haguwanki madini ga zahabu na feza na shaba, 4 sufi ya buluu na zambalawu na njeri, nguwu ya nfufu iyerepa na mibayira ya mbuzi, 5 lukuli lya kondolu gwa shipalu zyazitulitwi langi nsheri, lukuli za mbuzi na mbawu za mtera gwa mjohoru, 6 lipaki kwajili ya shikoluboyi, viungu kwajili ya lipaki lya kuvityeka vintu viweri kwajili ya Mlungu, viraa kwajili ya ubani yauwera na ununkira uherepa, 7 mabuwi ga beyi nkulu yagashemuwa sadoniki pamuhera na mabuwi gamonga ga beyi nkulu kwajili ya malembu malembu ga shipandi sha nguwu sha kugubika shifuwa sha lihabiti lya Mtambika mkulu. 8 Shakapanu wantu wa Israeli wanyawiri neni Liringu Linanagala, su wezi kulikala pamuhera na womberi. 9 Womberi wanyawiri Liringu ali pamuhera na vintu vyakuwi ntambu yang'enda kuwalanguziya.

10 Guwagambiri wantu wa Israeli wanyawi lisandiku lya mbawu za mitera ya mjohoru, lisanduku ali liweri na utali wa sentimita miya na lilongu, upana wakuyi sentimita malongu sita na sita. 11 Hagulityelemeki lisandiku ali madini ga zahabu iyerepa mkati na kunja, su gulinyawiri ukingu wa zahabu wega zoseri. 12 Shakapanu mnyawi bangili za msheshi za zahabu na kuzitula mumagulu mwa lisanduku ali, kila ligulu gutuli bangili yimu. 13 Hagunyawi mipiku ya mjohoro na kuyityasiya zahabu, 14 na mipiku hayi utaipitiziya pakati pa peti zyaziweri pandi mbili za lisanduki. 15 Honga azi za kupapira hazisigali shaka shoseri muzibangili zilii. 16 Mkati mwa lisandiku ali hagutuli mabuwi galii gagasongulituwi na gagalembituwi malagaliru gangu.

17 Gunyawi mfiniku gwa kugubika lisanduku kwa zahabu iherepa, mfiniku agu haguweri pahala pa kulekeziya wantu vidoda vyawu. Mfiniku agu haguweri na utali wa sentimita miya na lilongu, upana wakuyi sentimita malongu sita na sita. 18 Viraa hagunyawi kwa zahabu mfanu wa viwumbi vikomu wawili vyaviwera na mbapatiru, guwatuli muupeleru mwa mfiniku gwa lisanduku lilii. 19 Shiwumbi yumu upeleru umu na shiwumbi shamonga kaweri upereru wamonga. Guvituli viwumbi avi muupeleru mwa mfiniku agu kumbiti guvinyawi pavilimamatila pamuhera na mfiniku agu. 20 Viwumbi avi havilolani na mbambatiru zawu zigubutuka pawalolana. 21 Gufintiki mfiniku agu palisanduku ali na gutuli mabuwi galii mawili mulisanduku ali lya lipatanu, mabuwi galii ganukupanana gwenga. 22 Neni haniliwoni nagwenga panu, kulawa pampindi pa shigoda ashi sha kulekeziya pakati pa viwumbi yawawera pampindi pa lisandiku lya mapatanu, hanyoweri nagwenga na kukupanana malagaliru goseri kwajili ya wantu wa Israeli.

23 Gunyawi shitalawanda sha mbawu za mtera gwa mjohoru, utali wakuyi sentimita malongu nani na nani na upana wakuyi sentimita malongu msheshi na msheshi na utali kugenda kumpindi sentimita malongu sita na sita. 24 Shitalawanda ashi washigubiki kwa madini ga zahabu na muupeleru mwakuyi wazyengeti kwa lwiniku lwa zahabu. 25 Viraa gunyawi shipandi sha mbawu kuzyengeta shitalawanda, shipandi ashi shiweri na utali kugenda kumpindi senitmeta malongu sita na sita na gushityelemeki zahabu. 26 Hagunyawi peti za msheshi za zahabu na kuzitula muwega zakuyi mumagulu gakuyi. 27 Peti azi haziweri pakwegera na shipandi sha mbawu shilii shashizyengeta shitalawanda na hazikoleri mibiki ilii ya kupapira shitalawanda ashi. 28 Hagunyawi mibiki ya mtera gwa mjohoru na kutyemeleka kwa zahabu, mibiki ayi hayiweri ya kupapira shitalawanda ashi. 29 Viraa guwagambiri womberi wanyawi sahani na vikombi na viwiga na mabakuli vyavitulwa na watambika pawawitira divayi kuntavilira neni. Womberi wafiruwa wavinyawi kwa zahabu iherepa. 30 Shitalawanda ashi hagushituli kulongolu kwa lisanduku lya lipatanu, panani pashitalawanda ashi hagutuli mabumunda mananagala, shaka shoseri.

31 Hagunyawi shintambi sha shikoluboyi kwa zahabu iherepa, shikaliru shakuyi na mpanda yakuwi havinyawiwi kwa kuponda kuwera shintu shimu. Ntambu iraa ayi vikombi vyakutulila lipaki na vitumba vya uluwa pamuhera na uluwa vyavilembiziya muvintambi vya vikoluboyi, shikaliru na mpanda havipondwi kuwera shintu shimu shikoluboyi sha zahabu. 32 Vintambi sita vyaviwera mumpanda ilii, vimpanda vitatu vya uwega umu na vimpanda vitatu uwega umonga. 33 Mushila shintambi hakuweri vikombi vitatu mfanu wa uluwa yaushemuwa mlozi, kila shintambi hashiweri na shitumba shakuyi na uluwa wakuyi. 34 Mumpanda hakuweri na vikombi vyamsheshi mfanu wa uluwa gwa mlozi, pamuhera na fifundu vyakuyi na uluwa wakuyi. 35 Kila uwega hakuweri na shitumba shimu mukila shintambi. 36 Vikonyu avi pamuhera na vintambi vyakuyi, haviweri shintu shimu na shintambi sha shikoluboyu ashi hashinyawiwi kwa zahabu iherepa. 37 Hagunyawi viraa vikoluboyi saba toziya ya shitambi ashi na kuvitula pashintambi ashi kulangalira kulongolu. 38 Viraa gunyawi kwa zahabu iherepa, vibaniru vya kuwusilira utambi wa shikoluboyi na sahani zakuyi. 39 Hagutumii kilu malongu matatu na muhanu za zahabu iyerepa kunyawira shintambi ashi na vintu vyakuyi. 40 Guloli weri kuwera womberi wakunyawa vintu avi kulawirana na galii ganukulagalira kulugongu kulii.