1 Shakapanu Mtuwa Mlungu kamgambiriti Musa, 2 "Mulishaka lya kwanja lya mwezi gwa kwanja, gunyawi Liringu Linanagala. 3 Muliringu ali hagutuli Lisanduku lya Lipatanu, shakapanu gutuli lipaziya palongolu pakuwi. 4 Hagwingiziyi shitalawanda Muliringu Linanagala, guvituli weri vintu mngati mwakuyi vyavigenda kutendwa pamuhera navi. Shakapanu hagwingiziyi shintambi na kushitula vikoluboyi vyakuwi pampindi pakuwi. 5 Gunyawi shitalawanda sha kutambikira sha zahabu kwajili ya kutumiziya ubani kulongolu kwa Lisanduku lya Lipatanu na gutuli lipaziya palugomi lwa Liringu Linanagala. 6 Gutuli shitalawanda sha kutambikira kulongolu kwingilira Muliringu Linanagala. 7 Hagulituli libeseni likulu lya kunawira mashi pakati pa Liringu Linanagala na shitalawanda sha kutambikira, na gulimemiziyi mashi. 8 Gutuli lipaziya kuzyengetilira mdamu goseri, viraa gulidyengiziyi lipaziya pahala pa kwingilira."

9 "Shakapanu gutoli lipaki lya kutyekuwa na kulimishira Liringu Linanagala pamuhera na vintu vyakuwi vyoseri vyaviweramu, vituluwi toziya ya lihengu lyaneni, su haviweri vinanagala. 10 Viraa gushityekuwi shitalawanda sha kutambikira tambiku za kulunguziya, pamuhera na vyombu vyakuwi vyoseri kwa kuvimishira lipaki. Su shitalawanda sha kutambikira hashiweri shinanagala. 11 Viraa guswagi shiwiga sha kunawira mashi pamuhera na shikaliru shakuwi, gushituli gweka."

12 "Shakapanu guwajegi Aruni pamuhera na wana wakuyi, wizi paligomi lya kwingilira Muliringu Linanagala, guwanaviyi kwa mashi. 13 Hagumvalisiyi Aruni lihabiti linanagala lya utambika, gumswagi lipaki na kumtyekuwa, su kawezi kuntendera gambira mtambika. 14 Viraa guwajegi wana wakuyi wamonga. Guwavalisiyi mahabiti 15 na guwaswagi lipaki ntambu yagumswagiti tati gwawu, su womberi hawantenderi neni lihengu gambira watambika. Kwa kuswaga lipaki womberi pamuhera na viyiwuku vyawu, gwenga hagutendi womberi waweri watambika kupitira vileri vyoseri vyaviza."

16 Musa kavitenditi vintu vyoseri nakaka gambira Mtuwa Mlungu ntambu yakamlagaliriti. 17 Mulishaka lya kwanja lya mwezi wa kwanja mushinja sha pili pakulawa muisi ya Misri, Liringu Linanagala libawirituwi. 18 Gagafata gawera malagaliru ga Musa, womberi wanyawiti Liringu Linanagala na kalibawiriti weri, katuliti mpanda na kawalawaliti mibiki na kalutuliti lubiki lya kukolera lipaziya. 19 Shakapanu walitandiziyiti kulizyengetila Liringu Linanagala, gambira Mtuwa Mlungu ntambu yakamlagaliriti. 20 Su Musa kagatoliti mabuwi mawili gagasongolituwi, gagalembituwi malagaliru na kagatuliti Mulisanduku lya Lipatanu. Yomberi katuliti mipiku ya kupapira mupeti zyaviwera Mulisanduku lya Lipatanu, viraa kaligubikiti kwa mfuniku gwagushemuwa pahala pa kulekeziya vidoda. 21 Shakapanu lisanduku lilii kalitula mkati mwa Pahala Pananagala Muliringu Linanagala na kukowekiziya lipaziya. Kwa ntambu ayi, kadiwiriti wantu yawawera kunja kulilola lisandiku. Katenditi vyoseri avi ntambu yakalagaliritwi na Mtuwa Mlungu.

22 Womberi washituliti shitalawanda mkati mwa Liringu Linanagala, uwega wa kushana, kunja kwa lipaziya. 23 Pashitalawanda yomberi katuliti mabumunda gawamlaviyiti Mtuwa Mlungu, ntambu yakalagaliritwi na Mtuwa Mlungu. 24 Watuliti shintambi sha vikoluboyi mkati mwa Liringu Linanagala, uwega wa kusika, pashilolana na shitalawanda. 25 Shakapanu kawasha vikoluboyi pashintambi kulongolu kwa Mtuwa Mlungu, ntambu yakalagaliritwi na Mtuwa Mlungu. 26 Watuliti shintalawanda sha kutambikira sha zahabu mkati mwa liringu linanagala, kulongolu kwa lipaziya lyalitula gweka Pahala Pananagala na Pahala Pananagala nentu 27 na kutumiziyiti ubani ununkira pampindi pakuwi, ntambu yakalagaliritwi na Mtuwa Mlungu. 28 Walikoweka lipaziya kuligomi lwa Liringu Linanagala. 29 Kulongolu kwa ligomi lya Liringu Linanagala, watuliti shitalawanda sha kutambikira malaviwu ga tambiku galii gagalunguzituwi. Shakapanu kalaviyiti vinofu kulunguziwa pamuhera na malaviwu ga mbunji, katenditi ntambu yakalagaliritwi na Mtuwa Mlungu. 30 Kalituliti libeseni likulu lya kunawira mashi pakati pa Liringu Linanagala na shitalawanda sha kutambikira sha shaba, kashimemiziyiti mashi. 31 Kila shaka Musa pamuhera na Aruni na wana wakuyi, wagululiti mawoku na magulu gawu. 32 Womberi wagululiti mawoku na magulu gawu kugapunga pawaingiriti Muliringu Linanagala ama kwiza pakwegera na shitalawanda sha kutambikira, ntambu Musa yakalagaliritwi na Mtuwa Mlungu. 33 Kwa malagaliru gakapananituwi Musa pamuhera na wantu wakuyi, womberi wakowekiti lipaziya kuzyengeta mdamu na pahala pa kutambikira, viraa womberi wakoweka lipaziya kuligomi lwa kumdamu. Su Musa pamuhera na wantu wakuyi wamaliriti lihengu.

34 Shakapanu lihundi ligubikira Liringu Linanagala na uweru wa Mtuwa Mlungu umemiziya Liringu Linanagala. 35 Toziya uweru uweriti mkulu nentu, Musa kasinditi kwingira mkati mwa Liringu Linanagala. 36 Kwanjira lishaka ali, wantu wa Israeli pawafiriti kugenda pahala pamonga, womberi wagenditi hera shaka lihundi lifufu palikweniti kulawa pampindi pa Liringu Linanagala. 37 Handa lihundi ali palilawira ndiri, womberi walikaliti pawaweriti na wanjiti ndiri mwanja mpaka lihundi palilawira. 38 Poseri pawagenditi, lihundi lifufu liii lilanguziya uweru wa Mtuwa Mlungu uwera pampindi pa Liringu Linanagala mushaka sha paluwala, motu guweriti mulihundi mushaka sha pashiru, malawiranu gakuyi wantu woseri wa Israeli waweziti kuliwona lihundi mushaka shoseri.