1 Musa kapikaniriti liziwu lya Mtuwa Mlungu kulawa Muliringu Linanagala, palimgambira, 2 guwagambiri wantu wa Israeli handa muntu pakafira kumlavilira malaviwu Mtuwa Mlungu, hakalaviyi nkanyama kulawa mushipinga sha wang'ombi ama wakondolu ama wambuzi.

3 Handa tambiku yakalaviya muntu iwera ya kulunguziya, yomberi kafiruwa kamsyaguli nkanyama gwa shipalu yakahera shidoda shoseri kulawa mushipinga shakuwi, yomberi hakamlaviyi paligomi lya liringu linanagala su kajimiluwi kulongolu kwa Mtuwa Mlungu. 4 Muntu hakatuli liwoku pamtuwi pa nkanyama gwa tambiku, pagutenda hangu tambiku ayi hayijimilwi kwajili ya kumlekeziya vidoda vyakuyi vyakatenditi. 5 Shakapanu yomberi hakamlikituli mtuwi ng'ombi ulii kulongolu kwa Mtuwa Mlungu. Su watambika waleri wa Aruni, womberi hawatoli mwazi na kugumishira pashitalawanda sha kutambikira wega zakuyi zoseri pakwegera na ligomi lya Liringu Linanagala. 6 Muntu ayu hakamwambuli nkanyama ayu na kumhanjangahanjanga vipandi vipandi. 7 Wana walii wa mtambika Aruni, hawazituli weri mbawu pampindi pa shitalawanda sha kutambikira na kukoziya motu. 8 Shakapanu womberi hawatoli vipandi vilii vya nkanyama, mtuwi na lipaki na kuvitula pambawu za shitalawanda sha kutambikira. 9 Kumbiti utumbu pamuhera na magulu ga kumbeli ga nkanyama ulii, muntu hakavigululi kwa mashi. Mtambika hakailunguziyi tambiku yoseri pashitalawanda sha kutambikira. Tambiku ayi ununkira wakuyi haumuherepeziyi Mtuwa Mlungu.

10 Handa tambiku yakuyi ya kulunguziya hakayilaviyi kulawa mushipinga sha wakondolu ama wambuzi, yomberi hakamsyaguli nkanyama gwa shipalu yakahera shidoda shoseri. 11 Su hakamlikituli mtuwi nkanyama ulii uwega wa kushana kwa shitalawanda sha kutambikira kulongolu kwa Mtuwa Mlungu, wana wa mtambika Aruni hawagumishiri mwazi wega zoseri za shitalawanda sha kutambikira. 12 Muntu ayu hakamhanjangi vipandi vipandi, mtambika hakavituli weri mtuwi pamuhera na lipaki lyakuyi na hakavituli pamotu pashitalawanda sha kutambikira. 13 Kumbiti utumbu pamuhera na magulu gakuyi ga kumbeli hakavigululi kwa mashi. Mtambika hakavilunguziyi vyoseri pashitalawanda, na tambiku ayi ya kulunguziya hayimuherepeziyi Mtuwa Mlungu.

14 Paiwera kankumlavilira Mtuwa Mlungu tambiku ya kulunguziya ya wampongu, yomberi hakajegi tambiku yakuyi ya nkunda ama mpongu teteri. 15 Mtambika hakamjegi mpongu ulii pashitalawanda sha kutambikira, yomberi hakamnyofoli mtuwi gwakuyi na kukilunguziya pashitalawanda sha kutambikira. Mwazi gwakuyi hakagumishili mumbwega mwa shitalawanda sha kutambikira. 16 Liholeru lya mpongu ulii pamuhera na uhakata wakuyi woseri hakaviwusiyi na kuvyasira uwega kwagulawa mshenji mwa shitalawanda sha kutambikira, palitulwa livu. 17 Hakamkoli mbapatiru mpongu ulii na kumpagula, kumbiti nakamhanjanga vipandi viwili. Shakapanu mtambika hakamlunguziyi pashitalawanda sha kutambikira. Ununkira wa tambiku ayi haumuherepeziyi Mtuwa Mlungu.