1 Mtuwa Mlungu kamgambiriti Musa, 2 gushigambiri shipinga shoseri sha wantu wa Israeli. Mfiruwa muweri wananagala, toziya neni Mtuwa Mlungu, Mlungu gwenu ndo mnanagala. 3 Kila yumu gwenu kafiruwa kampanani ligoya mawu gwakuyi na tati gwakuyi na kagajimili mashaka gangu ga Kwoyera. Neni Mtuwa Mlungu, Mlungu gwenu ndo yanikulagalira aga gugatendi.

4 Namuviguwira vinyagu ama kujinyawira vinyagu vya wamlungu. Neni Mtuwa Mlungu, Mlungu gwenu gweka yangu yamfiruwa kunguwira.

5 Pamundavilira neni Mtuwa Mlungu tambika za ponga, hamundaviliri ntambu yayifiruwa su mpati kujimirwa.

6 Vinofu vya tambiku ayi viliwi lishaka liraa ali pavilaviwa, viraa mlekeziwa kuiliya na shilawu yakuyi. Shoseri shasisigala mpaka lishaka lya tatu hashilunguziwi motu. 7 Handa seemu ya vinofu vyakuyi pawaviliya lishaka lya tatu, shitwatira ashi hapeni shiherepiziyi neni, hapeni niyijimili tambiku ayi. 8 Hanimwazibu muntu yoseri yakaliya tambiku ayi mulishaka lya tatu, toziya yomberi kagalema galii gantakula kuwera gananagala.

9 Pagubena mabenu gaku mulirambu, nagumalira kubena viboga vyoseri mumbwega mwa lirambu lyaku ama kuwuya kumbeli kujojonira vyavisigaliti. 10 Namuwuyira kujojonira kila shintu mulirambu lya mizyabibu, viraa namsola zyabibu zazitulukiti pasi, zyabibu azi haguwalekeri wahushu na wahenga. Neni Mtuwa Mlungu, Mlungu gwenu yandagalira vitwatira avi.

11 Nagwiwa,

nagupayira,

ama kuligambirana upayira maweni kwa maweni.

12 Nagulirapa mpayu kwa litawu lyangu na kulihigilanga litawu lya Mlungu gwenu. Namulyaluwa kuwera neni ndo Mtuwa Mlungu, Mlungu gwenu.

13 Nagumzulumu gwa pakwegera gwaku, ama kumwiwira. Shibenamgongu sha muntu yawampanananiti lihengu nashilikala kwaku pashiru poseri mpaka mandawira. 14 Nagumtendera lidufiya yakawera na majogu ama kumdiwilira munjira ya muntu yakawera lwisi kumtenda kalikwali. Neni ndo Mtuwa Mlungu, Mlungu gwaku.

15 Pagutoza gutozi teratera, nagumpendeleya muhushu ama kumtira muntu mkulu, kumbiti gumtozi gwapakwegera gwaku teratera.

16 Nagupalasiya mashongeru ga mpayu kuusu wantu wamonga.

Nagutakula shoseri sha mpayu mushishyotera motu meshimtendi yomberi kaweri muhatali ya kuhowa. Neni ndo Mtuwa Mlungu, Mlungu gwaku.

17 Nagumkalalira mlongu gwaku mumoyu mwaku, kumbiti gulikoli mawoku na wapakwegera gwaku su nagwiza kutenda vidoda. 18 Nagumuwuzilira ama kuwera na shinyongu yumu gwa wantu waku, kumbiti guwafiri wapakwegera waku ntambu yagulifira gamweni. Neni Mtuwa Mlungu, Mlungu gwaku yandagalira aga.

19 Gugajimili malagaliru gangu. Naguleka wankanyama waku wakwenuwi na wankanya wa ntambu yingi. Mulirambu lyaku naguyala mbeyu ya ntambu mbili. Naguvala nguwu yawapotitwi kwa ntambu mbili za vitambala.

20 Mpalu pakagonja na mdala mumanda, ulii yakahetitwa na mpalu yumonga, mdala yakakombolwa ndiri ama kupananwa ulekeziwu, yoseri yakatenda hangu hakazibiwi. Kumbiti nakalaguwa toziya mdala ayu kaweriti ndiri mlekeru. 21 Mpalu ayu hakajegi pakwegera na Liringu Linanagala tambiku yakuyi ya kondolu gwashipalu kuwusiya makosa na kundavilira neni Mtuwa Mlungu. 22 Mtambika hakamkolaniziyi mawoku kwa kumlaviya tambiku kondolu ulii kulongolu kwa Mtuwa Mlungu kwajili ya vidoda vyakatenditi, su yomberi hakalekeziwi vidoda virii vyakatenditi.

23 Pamsoka muisi ya Kanaani na kuyala ntambu zoseri za mitera ya mabwajubwaju, mabwajubwaju aga hapeni mugaliyi, viraa hapeni mlekeziwi kugaliya kwa shaka sha vinja vitatu. 24 Mushinja sha msheshi mabwajubwaju gakuyi goseri hagaweri mananagala, hamugalaviyi kuwera tambiku ya kulonga mayagashii kwa Mtuwa Mlungu. 25 Kumbiti mabwajubwaju ga kwanjira shinja sha muhanu aga mweza kugaliya, mabenu genu hagongereki. Neni ndo Mtuwa Mlungu, Mlungu gwenu yandagila aga.

26 Namliya shinofu shoseri shashiwera na mwazi. Namtunga kupitira washamshera ama kutenda uhawi.

27 Namumoga nvili za mumasaya genu ama kumoga ndevu zyenu.

28 Namlitula shipaku shoseri munshimba mwenu toziya ya kudaya ama kulihanjahanja nshimba ama kulilemba mushimba. Neni Mtuwa Mlungu ndo yandagalira aga.

29 Nagumuhumba muhinga gwaku kwa kumtenda kaweri mndiyandiya, isi yoseri nayiza kumema undiyandiya na wantu woseri hawaweri wandiyandiya.

30 Mugajimili mashaka gangu ga Kwoyera na kupagohelira Pahala paneni Pananagala. Neni Mtuwa Mlungu ndo yandagalira aga.

31 Namuwagendera wantu yawatunga kulawa kwa wantu yawawakosiya wantu yawahowiti, toziya pagutenda hangu, womberi hawakutendi guweri muhumba. Neni ndo Mtuwa Mlungu, Mlungu gwenu.

32 Paguwera kulongolu kwa mzewi gufiruwa gugoloki kumpanana ligoya lyakuyi, su gwenga gunguwiri neni Mlungu gwaku. Neni Mtuwa Mlungu ndo yandagalira.

33 Handa kwana muhenga muisi yaku nagumtendera vidoda. 34 Muhenga yakalikala pamuhera na gwenga hakaweri kwa gwenga handa mwenikaya na gwenga hagumfiri ntambu yagulifira gamweni, toziya gwenga guweriti muhenga muisi ya Misri. Neni Mtuwa Mlungu, Mlungu gwenu ndo yandagalira aga.

35 Gwenga pagupima vintu, kulola viwera na utali gaa ama utopa gaa ama umemiziwu 36 su gwenga gufiruwa gutenderi mizani iherepa na vipimu vyeviherepa. Neni Mtuwa Mlungu, Mlungu gwenu ndo yaniwalaviyiti muisi ya Misri.

37 Mwenga mugajimili malagaliru gangu goseri na amuli zyangu zoseri na mugatendi. Neni Mtuwa Mlungu ulii yaniwalagalira.