1 Mtuwa Mlungu kawagambiriti Musa na Aruni, 2 muwagambiri wana wa Israeli hangu, wakanyama woseri yawalikala pasipanu, awa ndo yamuweza kuwaliya. 3 Mwenga muweza kuliya nkanyama nyoseri ulii yakana kwatu yazibagulikiti pakati, viraa kahirula shilii shawaliyiti kala. 4 Wankanyama awa namuwaliya, womberi wawuyira shilii shawaliyiti kala kumbiti kwatu za magulu gawu zibagulika ndiri pakati, ama walii kwatu zawu zibagulika pakati kumbiti wawuyira ndiri shilii shawaliyiti kala. Namumliya nkanyama ngamiya, toziya yomberi kawuyira shilii shakaliyiti kala kumbiti kwatu za magulu gakuyi galibagulana ndiri pakati. Nkanyama ayu kawera muhumba kwa mwenga. 5 Nkanyama pimbi namumliya, toziya yomberi kawuyira kuliya shilii shakaliyiti kala kumbiti kwatu za magulu gakuyi galibagulana ndiri pakati, nkanyama ayu kawera muhumba kwa mwenga. 6 Namumliya kambenga, toziya yomberi kankuwuyira kuliya shilii shakaliyiti kala, kumbiti kwatu za magulu gakuyi galibagulana ndiri pakati, nkanyama ayu kawera muhumba kwa mwenga. 7 Namumliya mtumbi, toziya yomberi kwatu za magulu gakuyi zibagulika pakati, kumbiti yomberi kawuyira ndiri kuliya shilii shakaliyiti kala, nkanyama ayu kawera muhumba kwa mwenga. 8 Toziya wankanyama awa wawera wahumba su namuliya vinofu vyawu ama kushinkula mawuti gawu.

9 Somba yoseri gwa mubahari ama mulushemba, ulii yakawera na malakalaka na makalakatu su muweza kumuliya. 10 Kumbiti shoseri shashilikala mubahari ama mulushemba, shilii shashiwera ndiri na malakalaka ama makalakatu, viumbi vyoseri vyaviwera mumashi pamuhera na viumbi vyamonga vyoseri, viwera vikalaliru kwa mwenga. 11 Viumbi avi haviweri vikalaliru kwa mwenga mashaka goseri. Namuliya vinofu vyawu ama kushinkula mawuti gawu toziya wawera wakalaliru. 12 Shoseri shashilikala mumashi, shilii shashiwera ndiri na malakalaka pamuhera na makalakatu, shiwera shikalaliru kwa mwenga.

13 Wampongu awa ndo wawera wakalaliru kwa mwenga, su namuwaliya. Mpongu ngashanga na furukombe na kapungu, 14 shimbowi na shipanga na ntambu zoseri za shipanga 15 na ntambu zoseri za kunguru 16 na mpongu mbuni na lisisigira na tipitipi na ntambu zoseri za lisisigira 17 na lisisigira mdidika na mnandi na lisisigira mkulu 18 mumbi na mwari na mderi, 19 kolongo na ntambu zoseri za koikoi na hudihudi na gombalima.

20 Wang'ongolu woseri yawawera na mbapatiru na wagenda kwa magulu ga msheshi, womberi wawera wakalaliru kwa mwenga. 21 Kumbiti wang'ongolu wamu yawawera na mbapatiru na wagendangenda kwa magulu ga msheshi ga kukopokera pasi, womberi muweza kuwaliya. 22 Wang'ongolu awa ndo kila ntambu za wanjombi na kila ntambu za senene na kila ntambu za vibatala na kila ntambu za matapa. 23 Kumbiti wang'ongolu wamonga woseri yawawera na mbapatiru na magulu ga msheshi, wawera nkalaliru kwa mwenga.

24 Kushinkula wankanyama awa hakumtendi muntu kuwera muhumba, muntu yoseri yakashinkura mawuti gawu hakaweri muhumba mpaka pamihi. 25 Muntu pakatola seemu ya mawuti gawu hakaweri muhumba mpaka pamihi, na nguwu zakuyi zifiruwa kugululwa. 26 Kila nkanyama yakawera na kwatu zyazibagulika pakati kumbiti kabakula ndiri kuliya shilii shaliyiti kala, muntu yoseri yakamshinkula nkanyama ayu hakaweri muhumba. 27 Wakanyama woseri yawagendagenda kwa viganja vyawu tembera wawera na magulu ga msheshi, hawaweri wahumba kwa mwenga, muntu yoseri yakashinkula mawuti ga wankanyama awa, su hawaweri wahumba mpaka pamihi. 28 Muntu yoseri yakapapa mawuti ga nkanyama, su yomberi hakaweri muhumba, yomberi kafiruwa kagululi nguwu zakuyi. Muntu ayu hakaweri muhumba mpaka pamihi. Wankanyama awa hawaweri wakalaliru kwa mwenga.

29 Viumbi avi haviweri vikalaliru kwa mwenga. Likwili na mbewa na kila ntambu ya shitunu, 30 guruguru na magondu na shigologozi na goromwe na nalwivu. 31 Wakanyama woseri awa wawera nkalaliru kwa mwenga na muntu yoseri yakashinkula mawuti gawu, su hawakaweri muhumba mpaka pamihi. 32 Payiwera mawuti ga wankanyama awa gatulukilira shintu shoseri, shintu sha mbawu ama nguwu ama likuli ama lilobota ama shombu shoseri shashitenderwa kwa ntambu yoseri ilii, shombu ashi hashiweri shihumba mpaka pamihi. Su kushitenda shiweri shiherepa shifiruwa shigululuwi kwa mashi. 33 Payiwera mawuti ga nkanyama gatulukira shiwiga, su shoseri shashiwera mushombu ashi hasiweri shihumba na shombu ashi hashipandwi. 34 Handa mashi ga mushiwiga shilii gatulukira mushiboga shoseri, shiboga hashiweri shihumba. Na shilandu shashiwera mushiwiga ashi hashiweri shihumba. 35 Kila shintu shashiguwililwa na mizoga yoseri ya nkanyama, hashiweri shihumba. Paliwera litanuri lya kubanikira mabumunda ama shifinja sha kutelekera, vifiruwa vipandwi. Vyoseri avi haviweri vihumba, na vyeni viwera nkalaliru kwa mwenga. 36 Pamuhera na hangu, linegu lya mashi ama mbwiru za mashi haviweri viherepa. Kumbiti shoseri shashishinkula mizoga ya wankanyama yayitulukila mumashi aga, hashiweri shihumba. 37 Payiwera seemu ya mizoga ya wankanyama awa payitulukira mbeyu za kuyala, mbeyu azi hapeni ziweri zihumba. 38 Kumbiti mbeyu azi pazitulitwi mumashi zimeri na seemu ya mizoga ya wankanyama awa itulukiwa na mbeyu azi, su mbeyu azi haziweri nkalaliru kwa mwenga, mbeyu azi ziyasilwi kutali.

39 Payiwera nkanyama yoseri yakalekeziwitwi mumliyi pakafuwa mweni, muntu yoseri pakashinkula mzoga gwakuyi, su hakaweri muhumba mpaka pamihi. 40 Muntu yoseri pakaliya seemu ya vinofu vya nkanyama ayu, hakagululi nguwu zakuyi na hakaweri muhumba mpaka pamihi. Na muntu yoseri yakapapa mzoga gwa nkayama ayu, hakagululi nguwu zakuyi na hakaweri muhumba mpaka pamihi.

41 Shiwumbi shoseri shashikwawakwawa pasipanu hashiweri shikalaliru kwa mwenga, namushiliya nakamu. 42 Shiwumbi shoseri shashigendagenda kwa mtima gwakuyi, shoseri shashigendagenda kwa magulu gakuyi gamsheshi ama nyayu zivuwa, ama shoseri shashilikwawakwawa, namushiliya toziya shiwera shikalaliru kwa mwenga. 43 Su namulitenda wahumba maweni kwa kuliya viwumbi vyavikwawakwawa toziya viwera nkalaliru kwa mwenga. 44 Neni Mtuwa Mlungu, Mlungu gwenu, mulityeki na muweri wananagala toziya neni wera mnanagala. 45 Neni Mtuwa Mlungu yanuwalaviya mwenga kulawa muisi ya Misri neni weri Mlungu gwenu, su muweri wananagala toziya neni wera mnanagala.

46 Malagaliru aga gawusu wankanyama na wampongu na kila shiwumbi shashilikala mumashi na kila shiwumbi shashigendagenda palitapaka. 47 Mwenga mfiruwa kulola weri shilii shashiwera shihumba na shilii shashiherepa, shiwumbi shilii shamuweza kushiliya na shiwumbi shilii shamuweza ndiri kuliya.