1 Mtuwa Mlungu kamgambiriti kayi Musa, 2 Handa muntu yoseri pakatenda vidoda na kuwera mwaminika ndiri kwa neni Mtuwa Mlungu, kwa kumpayira muyaguwi mushitwatira shoseri shakapananitwi kushitula ama kumwiwira muyaguwi ama kumzulumu muyaguwi, muntu ayu hakaweri na likosa. 3 Ama muntu pakapata shintu sha muyagu shashiyagamiyiti na kulirapa kuwera gushiwona ndiri, ama gulirapa kwa upayira ama gutenda vidoda vyamonga vyoseri virii, yomberi kawera na likosa. 4 Muntu ayu pakatenda vidoda na kawera na ukontola, su kafiruwa kawuziyi shilii shakawiwiti ama shakapatiti kwa zuluma ama shilii shashitulituwi shakapananitwi ama shintu sha gwapakwegera gwakuyi shashyagamiyiti kashipatiti. 5 Ama shintu shoseri shakalirapiriti kwa upayira, hakawuziyi kila shintu kwa ukamilika na kwongera seemu yimu paseemu muhanu ya samani yakuyi. Kamkamu pakamana likosa lyakuyi hakamwuziliri mweni. 6 Shakapanu hakamjegeri mtambika kondolu gwashipalu yakahera shidoda shoseri kamlaviliri Mtuwa Mlungu tambiku ya kuwusiya likosa. Samani ya nkanyama ayu hayiweri teratera na ilii yaitulitwi Muliringu Linanagala. 7 Mtambika hakalaviyi tambiku ya kuwusiya vidoda vilii kwa Mtuwa Mlungu toziya ya kumpunga muntu ayu, su yomberi hakalekeziwi vidoda vyakatenditi.

8 Mtuwa Mlungu kamgambiriti Musa, 9 Gumlagaliri Aruni pamuhera na wana wakuyi visoweru avi. Malagairu aga ndo ga kulaviya tambiku. Tambiku ya kulunguziya hayiweri pamotu pashitalawanda sha kutambikira pashiru poseri mpaka mandawira na motu gwakuyi nagutenda tiya. 10 Shakapanu mtambika hakavali shati ntali mfufu na kaputura yakuyi yailawirana na nguwu mfufu, hakatoli livu lya tambiku ilii kulawa pashitalawanda na kugatula mumbwega mwa shitalawanda shilii. 11 Su pakavula nguwu za utambika na kuvala nguwu zakuyi, hakagajegi malivu galii kunja kwa kambi pahala paherepa. 12 Motu gwa mushitalawanda sha kutambikira gufiruwa gwendereyi kwaka nagutenda tiya. Kila mandawira mtambika hakatuli mbawu mumotu agu na pashitalawanda hakatuli tambiku za kulunguziya, pamberi pa kulunguziya lipaki lya tambiku lya ponga. 13 Motu hagwendereyi kwaka shaka shoseri nagutenda tiya.

14 Aga ndo malagaliru gamonga ga tambiku za viboga. Wana wa Aruni hawamlaviliri Mtuwa Mlungu kulongolu kwa shitalawanda sha kutambikira. 15 Yumu gwa watambika hakatoli liwoku limu lya ubumu wa tambiku ya shiboga shimu pamuhera na lipaki na ubani woseri na kuvilunguziya pashitalawanda kulanguziya kuwera tambiku yoseri iwera ya Mtuwa Mlungu. Ununkira awu haumuherepeziyi Mtuwa Mlungu. 16 Ubumu yausigaliti Aruni pamuhera na wana wakuyi hawautoli na kunyawa mabumunda pota kulekera simika. Kumbiti womberi wafiruwa waliyi gambira mabumunda yagalekeruwa ndiri simika pahala pananagala mumdamu Muliringu Linanagala. 17 Nagubanika mabumuna yagalekerwa simika. Niwapanani womberi seemu ayi kulawa mutambiku zawandavilira kwa motu. Ziwera tambiku nanagala nentu, ntambu yaziwera tambiku za kuwusiya vidoda pamuhera na kuwusiya makosa. 18 Wana wapalu wa Aruni gweka yawu ndo walekeziwa kuliya seemu ayi, toziya seemu ayi itulwa gweka vyaka vyoseri kwajili yawu kulawa mutambiku zyawamlavilira Mtuwa Mlungu kwa motu. Yoseri yakazishinkula tambiku azi kaweri mnanagala, paiwera ndiri hangu hakahowi.

19 Mtuwa Mlungu kamgambiriti kayi Musa, 20 gumgambiri Aruni pamuhera na wana wakuyi kuwera tambiku azi womberi wafiruwa wazijegi kwa Mtuwa Mlungu kuwera yumu gwawu pakawera mtambika. Muntu kafiruwa kajegi kilu yimu ya ubumu unama kwa lishaka, nusu yimu ya ubumu awu haulaviwi mandawira na umonga haulaviwi pamihi. 21 Ubumu awu hauhanganyiwi pamuhera na lipaki na kubanikuwa, shakapanu haujeguwi pauwera vipandi vipandi na kumlavilira Mtuwa Mlungu, ununkira wa tambiku yakuyi haumuherepeziyi Mlungu. 22 Ndagalira kuwera mwana gwa Aruni, yoseri yakasyagulwa kuwera Mtambika Mkulu pa Aruni kuhowa, yomberi kafiruwa kutandira vintu vyoseri avi vya tambiku ya viboga. Ali liwera lilagaliru lya mashaka goseri. 23 Tambiku yoseri ya viboga yailaviwa na mtambika hayilunguziwi yoseri, hapeni wailiyi nakamu.

24 Mtuwa Mungu kamgambiriti Musa, 25 gumgambiri Aruni pamuhera na wana wakuyi kuwera aga ndo malagaliru ga tambiku ya kuwusiya vidoda. Nkanyama gwa tambiku ya kuwusiya vidoda hakalikitulwi kulongolu kwa Mtuwa Mlungu pahala palii nkanyama gwa tambiku ya kulunguziwa pawamlikitulaga, su pahala panu nkanyama ayu gwa kuwusiya vidoda hakalikitulwi, kulongolu kwa Mtuwa Mlungu, tambiku ayi iwera nanagala nentu. 26 Mtambika yakalaviya tambiku ayi ndo ulaa mweni hakaliyi vinofu. Tambiku ayi hawailiyi pahala pananagala, mumdamu gwa Liringu Linanagala. 27 Shoseri shashishinkula vinofu avi shiweri shinanagala, pashiwera ndiri hangu hashifuwi. Na nguwu yoseri payitulukilwa na mwazi gwa nkanyama gwa tambiku ayi, su nguwu ayi hayigululwi pahala pananagala. 28 Tambiku ayi payitelekwa muviwiga, viwiga avi vifiruwa vipantwu. Kumbiti viwiga avi paviwera vya shaba, su viwiga avi havigululwi weri na kuvisuwuza kwa mashi. 29 Mpalu yoseri gwa shiyiwuku sha watambika gweka yawu walekeziwa kuliya tambiku ayi toziya iwera tambiku nanagala nentu. 30 Kumbiti payiwera mwazi gwa tambiku yoseri ya kuwusiya vidoda pagujegwa Muliringi Linanagala, tambiku ya nkanyama ulii nawailiya. Tambiku ayi hayilunguziwi kwa motu.