1 Mtuwa Mlungu kamgambiriti Musa kulugongu Sinayi, 2 Guwagambiri Waisraeli hangu, pamsoka muisi yaniwapanana neni Mtuwa Mlungu kila shinja sha saba isi hayikwoyelerwi nayilimwa kwa ligoya lya Mtuwa Mlungu. 3 Kwa shaka sha vinja sita hamuyilimi isi, hamyali, hampatiri mizabibu yenu na kubenanga viboga vyenu. 4 Kumbiti shinja sha saba hashiweri ndo lishaka lya kwoyera nakamu, ndo kwoyera ya Mtuwa Mlungu. Namyala shoseri pota kuyipatira mizabibu yenu. 5 Shoseri shashimera gweka yakuyi namshibena pota kwapa zabibu kulawa mitera yawapatira ndiri. Ashi hashiweri shinja sha kwoyeleziya litapaka nakamu. 6 Ata hangu shinja ashi sha kwoyera nakamu kwa isi haguwapanani shiboga maweni mwenga, wamanda wenu wapalu na wadala, wantu yamuwatuliti mlihengu na wahenga yawalikala muwamu mwenu. 7 Isi ayiliyiziyi mifugu yenu na vigongolu wa kundundu yawalikala muwamu mwenu.

8 Hamwalangi vinja saba mala saba na walanga yakuyi ndo vinja arobayini na tisa. 9 Shakapanu, mulishaka lya lilongu lya mwezi gwa saba lyeni ndo lishaka lya kutendelwa ukolaniziya hammutumi muntu kugomba talumbeta muisi yoseri. 10 Shinja sha hamsini hamshipanani ligoya kwa kubwera ulukeru kwa wamanda woseri muisi. Shinja ashi hashiweri ndo misambu ya kuholera ya vinja hamsini. Kila yumu hakayiwuyili lunda yakuyi na walongu wakuyi. 11 Toziya shinja ashi, ndo msambu gwa kuholera gwa vinja hamsini, namyala mbeyu ama kubena shoseri shashimera sheni pota kwapa zabibu kulawa mitera yamuyipatulira ndiri. 12 Shinja ashi ndo msambu kwa mwenga, hashiweri shinja shinanagala. Hangu hamliyi galii yagamera geni mumalambu.

13 Mushinja shoseri ashi lirambu lyalishuwuzitwi ndo mpaka shiwuziwi kwa mweni. 14 Paguhemera ama kushuwuza litapaka kwa gwapakwegera nagumpunja. 15 Beyi ya litapaka ndo mpaka ilinganili na vinja pamberi pa kuwuziwa kwa mweni. 16 Handa vinja vyavihusika ndo vivuwa hagongeri beyi na handa vinja avi ndo vididika hagupunguli beyi, toziya beyi yakuyi hayipimwi kulinganira na viboga vyakakuwuzira. 17 Namlipunja, su hammuguwiri Mlungu gwenu. Neni ndo Mtuwa Mlungu, Mlungu gwenu.

18 Hangu, hamfati mashaliti gangu na kutenda malagaliru gangu, su mpati kwendeleya kulikala pota madoda muisi. 19 Isi hayilaviyi viboga vyakuyi mwenga hamliyi na kwikuta na kulikala amu pota madoda.

20 Kumbiti pamonga hamuhowi, hatuliyi shishi mushinja sha saba pamonga hatujimilwi ndiri kuyala pota kubena viboga vyetu? 21 Su! Neni haniyitekeleri isi mushinja sha sita na yeni hayiwapanani viboga kwa uvuwa kwa vinja vitatu. 22 Pamyala mushinja sha nani hamuweri mwankuliya viboga vigona na hamwendereyi kuliya hera mpaka shinja sha tisa pamwanja kayi kubena.

23 Lirambu nalishuwuzwa nakamu, toziya ayi ndo lunda ya neni na mwenga ndo wahenga na wamwanja muisi mwaneni. 24 Ndo mana muisi yoseri hamuweri ntambu ya kulikombola litapaka.

25 Handa mlongu gwa pakwegera kawera mhushu, kashuwuza lirambu lyakuyi, su, mlongu gwakuyi gwa pakwegera mulihengu lya kulikombola, hakalikomboli. 26 Payiwera muntu ayu kahera mlongu kana lihengu lya kulikombola, kumbiti shakapanu kawera mlunda na kupata uwezu wa kulikombola litapaka lyakuyi, 27 Su, hakawalangi vinja vyavihusika kwanjira pakayishuwuziti na kulipa shiyasi shakuyi, na muntu ulii yakayihemeriti ndo mpaka kamuwuziliri. 28 Kumbiti payiwera kahera uwezo wa kulikombola, su alisigali mumawoku ga ulii yakahemeriti mpaka shinja sha msambu gwa kuholaziya gwa vinja hamsini. Mushinja ashi, ndo mpaka kalekiziwi na kumwuzilira muntu ulii yakalishuwuziti.

29 Handa muntu pakawuza numba yakuyi ya kulikala yayiwera mngati mlushi yalunyawitwi na shibambaza, kwa shinja ashi shoseri hakaweri na uwezu wa kuyikombola. 30 Handa numba yaiwera mulushi yalunyawitwi shibambaza ibomolwa ndiri kwa shipindi sha shinja, su, hayiweri lunda ya ulii yakayihemeriti mashaka goseri muviyiwuku vyoseri, pota kuwuziwa mushinja sha msambu gwa kuholera shinja sha hamsini. 31 Kumbiti numba za vijiji vyeni zizyengetwa ndiri shibambaza haziweri pasi pa lagiru iraa ilii lya litapaka, numba azi haziwezi kukombolwa mushinja shimu kumbiti ndo mpaka ziwuziwi kwa mweni mushinja sha kuholera mushinja sha malongu mhanu. 32 Ata hangu, numba yaziwera mulushi zawalikala Walawi ziweza kukombolwa shaka shoseri. 33 Payiwera yumu gwa Walawi katendera ndiri nfiruwa yakuyi ya kukombolwa, su, numba yayishuwuzitwi ndo mpaka iwuziwi kwa mweni mushinja sha kuholera vinja ishilini, toziya numba yaziwera mulushi azi za weni Walawi wapanananwa handa seemu yawu kulawa kwa wantu wa Israeli. 34 Kumbiti malambu ga kuwaliziya wankanyama weni Walawi kwa pamuhera, nagashuwuzwa, toziya awu ndo uhala wawu wa mashaka goseri.

35 Handa mlongu gwaku kawera mhushu ata kaweza ndiri kulilolera weri mweni pakawera pamuhera na gwenga, ndo mpaka gumloleri weri kendereyi kulikala na gwenga, gumtenderi handa mhenga ama kanamwanja yakawera kwa gwenga. 36 Pagumuwanda muntu gwa Israeli, Nagumfira kakulipi sha kongera sha ntambu yoseri ilii. Ila gumguwili Mlungu na mlongu gwaku kapati kulikala pamuhera na gwenga. 37 Nagumpanana uwanda mpiya zakongera ama kumpanana shiboga su kakulipi mota. 38 Neni ndo Mtuwa Mlungu, Mlungu gwaku, yanikulaviyiti muisi ya Misri kukupanana isi ya Kanani, su na neni weri Mlungu gwaku.

39 Handa mlongu gwaku yakalikala pakwegera na gwenga kawera mhushu, pakalishuwuza kwa gwenga, nagumtenda kakutenderi handa mmanda. 40 Kalikali na gwenga handa ntumintumi yakapananwa lihengu ama handa yakanamwanja. Hakakutenderi mpaka shinja sha ketenda msambu gwa vinja hamsini. 41 Shinja ashi ndo mpaka gumpi ulekeru wakuyi kawuyi kwa walongu wakuyi na uhala wakuyi wa uzewi wakuyi, gumlekeri pamuhera na walongu wakuyi. 42 Toziya Waisraeli ndo wantumintumi wa neni weni niwalaviyiti muisi ya Misri, su, nawashuwuzwa handa wamanda. 43 Nagumkola mlima mlongu gwaku kwa ukalipa, ila hagumguwiri Mlungu gwaku.

44 Kuusu wamanda, wadala na wapalu, guweza kuwahemera kulawa kwa wantu wa maisi gamonga ga pakwegera. 45 Guweza viraa kuhemera wamanda kulawa kwa wahenga yawalikala pamuhera na gwenga na walongu wawu yawayiwukiti muisi mwa mwenga. Na womberi hawaweri wa gwenga. 46 Wamanda awa guweza kuwapanana kwa wana waku waweri uhala wawu mashaka goseri. Awa guweza kuwatenda wamanda waku, kumbiti kuusu mlongu gwaku Mwisraeli nagumkola mlima kwa ukalipa.

47 Handa mhenga ama yakanamwanja yakalikala muwamu mwenu kawera mlunda na mlongu gwaku kawera mhushu na kumshuwuza kwa mhenga ayu ama yakanamwanja ayu ama kwa yumu gwa walongu wawu, 48 kaweza kukombelwa pa kulishuwuza, yumu gwawu gwa walongu wakuyi kaweza kumkombola. 49 Mjomba gwakuyi kaweza viraa kumkombola, ama mlamu gwakuyi ama mlongu gwa pakwegera mulukolu lwakuyi, kaweza viraa kulikombola ula mweni handa pakawera mlunda. 50 Yomberi pakatenda pamuhera na ulii yakamhemeriti, hakawalangi jumla ya vinja kwanjira pakalishuwuziti mpaka shinja sha kutenda msambu gwa kuholera vinja hamsini. Shiyasi sha kutulwa lekeru yakuyi hayilinganira na vinja vyakamtenderiti. Shaka sheni shakaweriti mmanda kwa mtuwa gwakuyi hashipimwi handa shipindi sha untumintumi wa kuwera mlihengu. 51 Handa walanga ya vinja mpaka shinja sha kuholera sha vinja ishilini ndo shikulu nentu, su hakawuziyi shiyasi shikulu sha beyi yakalipitwi. 52 Handa vinja vididika vipunguwa pamberi pa kusoka msambu gwa kuholera gwa vinja avi na kumlipa hazilira ayi. 53 Shaka shoseri shakafira kuwera kwa mtuwa gwakuyi ndo mpaka katenderwi handa ntumintumi yakatulitwi mlihengu kila shinja. Ayu yakamhemeriti nakamtendera kwa ukalipa.

54 Kumbiti payiwera muntu ayu na walongu wakuyi kakombolwa ndiri kwa njira azi, su wampanani ulekeru wakuyi mushinja sha kuholera sha vinja hamsini. 55 Waisraeli ndo wantumintumi wa neni, toziya niwalaviyiti muisi ya Misri. Neni ndo Mtuwa Mlungu.