1 Mtuwa Mlungu kamgambiriti kayi Musa, nagulinyawira vinyagu vya wamlungu wa mpayu, namkola vinyagu vyawu vya kusongola pota mpanda pota vinyagu vya mabuwi yagasongolitwi muisi mwenu na kuviguwira. Neni ndo Mtuwa Mlungu gwenu. 2 Mlikoli lishaka lya kwoyera lyaneni na mgohelili pahala pananagala paneni pa kuguwira. Neni ndo Mtuwa Mlungu.

3 Handa pamulikala kulawirana na mashaliti gangu na amuli zyangu, 4 Haniwatoweli mvula shaka shashifaa, isi ipati kulera mabenu kwa uvuwa na mitera ya mumalambu hagaleri mabwajubwaju. 5 Kubena viboga hakwendeleyi mpaka shaka sha kubena zabibu na kubenanga zabibu mpaka shaka sha kuyala mbeyu. Hamuweri na shiboga shivuwa na kulikala kwa ponga muisi mwenu.

6 Haniwapanani ponga muisi yenu, hamgonji pota kumtira muntu yoseri. Haniwawusiliri wakanyama wakalipa muisi na hapeni kuweri na ngondu muisi ayi. 7 Hamuwawingi wankondu wenu na kuwalaga kwa ligumba. 8 Mhanu wa mwenga hawawingi wankondu miya na miya wa mwenga hamuwawingi wankondu elufu lilongu. Wankondu wenu hawalaguwi kulongolu kwenu kwa ligumba. 9 Haniwatekeleri na kuwapanana wana wavuwa na kongeleka na neni haniligangamaziyi lipatanu lyangu na mwenga. 10 Shaka sha kubenanga hamuweri mwankali mwakuliya viboga vigona, kayi mpaka mwusiyi vyavisigaliti kupata lupenyu lwa kutula mabenangu gasyayi. 11 Hanilikali pakati penu Muliringu lyangu Linanagala, viraa hapeni niwaleki. 12 Hantyangi pakati penu na kuwera Mlungu gwenu na mwenga hamuweri wantu waneni. 13 Neni ndo Mtuwa Mlungu, Mlungu gwenu, yaniwalaviyiti muisi ya Misri su namwera wamanda aku Misri. Neni nishimega shidiwiru shawawatawiriti msingu mwenu na kuwatenda mgendigendi njoo.

14 Kumbiti pamuzijimira ndiri amuli zyangu, mwenga hamtozwi. 15 Handa pamzalau mashaliti gangu na kulilema lipatanu lyantuliti pamuhera na mwenga, 16 su, neni handendi hangu, haniwakomi kwa kuwajegera lyoga likulu, ulweli wa shifadulu na nshimba kupyupa na kuwatenda muweri lwisi na kuwayondiziya. Hamuyali mbeyu zyenu, kumbiti wankondu wenu hawagaliyi. 17 Neni haniwawoni, namwenga hamkomwi na wankondu wenu, hamkolwi mlima na walii yawawakalalira.

18 Na ata pamtozwa hangu, hapeni mpikiniri, su, haniwazibu mala saba nentu kwajili ya vidoda vyenu. 19 Mtiti gwenu hanigumegeri kutali kwa kuzitenda mpindi aku kumpindi kuweri kukamala handa lyuma, na isi yenu pota mvula iweri ikamala handa shaba. 20 Hamtenderi makakala genu hera toziya malambu genu hapeni galaviyi mabenu na isi yenu hapeni ileri mabwajubwaju.

21 Handa pamwendereya kunema na kulema kumpikinira, hanongeri kayi azabu yenu mala saba shiyasi sha uvuwa wa vidoda vyenu. 22 Haniwajegeri wakanyama wakalipa pakati penu weni hanikwiwireni wana wenu na kuwalaga wavigongolu wenu. Na kudumula walanga yenu mpaka njira zyenu zigalambuki gambira shiwala.

23 Handa ata pa azabu ayi mwankali kung'alambukira neni, ila mwongera kunema neni, 24 su neni, hanilikomangi na mwenga na kuwazibu mala saba nentu toziya ya vidoda vyenu. 25 Haniwajegeri ligumba lyeni haliwuziliri kuusu lipatanu lyamlimegiti. Mwenga hamtiri mulushi zyenu, kumbiti haniwajegeri malweri madoda na kuwatula mmawoku ga wankondu wenu. 26 Shiboga shenu hanishipunguli ata wadala lilongu watenderi shifinja shimu hera kubanika mabumunda. Hawawabaguliri kwa shipimi. Na ata pa kumalira kuliya mwankali mwana njala hera.

27 Na handa ata pa goseri aga mwankali kumpikinira mwendeleya kunema, 28 su neni haniwalemi mwenga kwa maya gakalipa na kuwaazibu neni namweni mala saba nentu kwajili ya vidoda vyenu. 29 Ndo hamliyi wana wenu, wapalu na wadala. 30 Hanipahalibisiyi pahala penu pa kuguwira kulugongu, hanipabomoli pahala penu pakutambikira pa kutumiziya ubani na kuziyasa mauti zenu pampindi pa vinyagu vya wamlungu yenu. Na neni haniwakalaliri nentu. 31 Lushi zyenu haniziagamiziyi pahala pa mwenga pananagala hanikutendi shiwala na nunkira zyenu ziherepa za tambika nakamu hapeni nizijimili. 32 Haniyilunguziyi isi yenu hangu, mbaka wankondu yawahamira hamu walikangashi. 33 Haniwapalasiyi mwenga muwamu mwa wantu wa maisi na kusomola ligumba kwa mwenga. Isi yenu hayiweri ndo ushiwa na lushi zyenu mahami. 34 Mwenga pamuhera mumawoku mwa wankondu wenu, panu ndo isi hamnemeleri kwoyera zenu shipindi payiwera ntambu ya ushiwa. Isi hayikwoyeri na kunemelera kwoyera zakuyi. 35 Ntambu yayiwera ushiwa hampati shiyasi sheni hasheniweri mulishaka lyenu lya kwoyera pamuweriti mwankulikala hamu.

36 Na wamonga wenu yawasigala haniwajegeri lyoga mmoyu mwawu, muisi ya wankondu wawu ata luhamba lyalugulusiwa haluwatungiziyi. Hawatugi gambira muntu yakatuga nkondu ata handa kwahera yakawatugiziya. 37 Hawaliguwiri vuluvulu handa muntu yakatira nkondu ata handa kwahera muntu yakawatiliziya. Hapeni muweri na likaka lyoseri kuwagendera wankondu wanu. 38 Hamwagamiri pakati pa maisi na isi za wankondu wenu ziwamili. 39 Handa wamonga wenu pawawera wakomu muisi za wankondu wenu hawayondi toziya udoda wawu na toziya ya udoda wa wazewi wawu.

40 Kumbiti handa pawayoya ukontola wawu na ukontola wa wazewi wawu kuusu ugalambuka wawatenda kwa neni na viraa kuusu kulilema kwa womberi na neni, 41 wavimani toziya gaa mlilemana na womberi na kuwajega isi ya wankondu wawu, handa nakaka moyu gwawu mdoda pagunanagala na koya ukontola wawu, 42 panu neni haniliholeri lipatanu lyangu na Ibrahimu, Isaka na Yakobu na kuyiholera isi ilii yaniwagambiriti haniwapanani.

43 Shaka pawawera kunja kulushi lwawu, isi ayi hayinemeleri kwoyera zakuyi panu payiwera ntambu ya ushiwa. Shipindi ashi womberi hawoyi ukontola wawu wa kulema malagalira ga neni na kugakalalira malagalira ga neni. 44 Kumbiti kwa goseri aga, pawawera muisi ya wankondu wawu, neni hapeni niwaleki ama kuwakalalira ata kuwagamiziya nentu na kuliyasira kutali lipatanu lyangu. 45 Toziya kwajili ya womberi haniliholeli lipatanu lyandenditi na wazewi wawu, walii yaniwalaviyiti kulawa Misri, maisi pagalola, su neni weri Mtuwa Mlungu gwawu. Neni ndo Mtuwa Mlungu. 46 Aga ndo mashaliti, malagalira na lagiru geni Mtuwa Mlungu kawapananiti wantu wa Israeli kulugongu Sinayi kulii kwa njira ya Musa.