1 Mtuwa Mlungu kamgambiriti Musa na Haruni, 2 guwagambiri Waisraeli hangu. Mpalu yoseri pawumlawa ufira, ufira awu umtenda kaweri humba, 3 na aga ndo malagaliru ga humba. Shipindi shoseri pawumlawa ufira ama ufira pawuwera udiwilwa mngati mwakuyi, muntu ayu ndo humba. 4 Shitanda shoseri shakagonjera ama shakakalira, hashiweru humba, 5 Muntu yoseri hanakashinguli shitanda shakuyi muntu ayu ndo mpaka kaputi nguwu zakuyi na kwoga, yomberi hakaweri humba mpaka pamihi. 6 Muntu yoseri yakakalira shintu shoseri shakakaliriti muntu ayu yawumlawiti ufira, ndo mpaka kaputi nguwu na kwoga, na hakaweri humba mpaka pamihi. 7 Muntu yoseri yakamshinkula muntu yawumlawa ufira, mpaka kaputi nguwu yakuyi na kwogi, yomberi hakaweri humba mpaka pamihi.

8 Muntu yoseri yakamtemera mata na muntu yawumlawa ufira ndo mpaka muntu ayu yawamtemeliti mata kaputi nguwu zakuyi na kwoga, yomberi hakaweri humba mpaka pamihi.

9 Shoseri shakukalira sha nkanyama shakakaliriti muntu ayu yawumlawa ufira hashiweri humba. 10 Muntu yoseri yakashinkula shintu shoseri shakakaliriti muntu ayu, hakaweri humba mpaka pamihi. Muntu yoseri yakapapa shintu shoseri shashiweriti sha muntu ayu ndo mpaka kaputi nguwu zakuyi na kwoga, yomberi hakaweri humba mpaka pamihi.

11 Muntu yoseri yawumlawa ufira pakamshingula muntu pota kugulula huti mawoku gakuyi na kwoga, yakashingulitwi hakaweri humba mpaka pamihi.

12 Shombu shoseri sha litapaka shashishingulitwi na muntu ayu yawumlawa ufira ndo mpaka shipandwi. Kumbiti shombu shoseri sha mbawu ndo mpaka shigululwi kwa mashi.

13 Mpalu yoseri yawumlawa ufira pakaponiziwa ulweri wakuyi, ndo mpaka muntu ayu kaheperi mashaka saba pamberi pa kuwusiwa uhumba wakuyi. Hakaputi nguwu zakuyi na kwoga mashi yaganyilirika, yomberi hakaweri kaherepa.

14 Lishaka lya nane, ndo mpaka kajegi ngunda wawili ama wana wawili wa ngunda kulongolu kwa Mtuwa Mlungu pamlyangu gwa liringu lya kuliwona na kumpanana mtambika. 15 Mtambika hakawalaviyi awa, yumu kwajili ya tambiku ya kuwusiya vidoda na gwingi kwajili ya tambiku ya kulunguziwa na mtambika hakamtenderi muntu ayu maluwa ga kukolaniziya mawoku kulongolu kwa Mtuwa Mlungu na kumwusilira uhumba wakuyi wa kumlawa ufira.

16 Handa mpalu yoseri pakalota, ndo mpaka kogi mashi nshimba yoseri, yomberi hakaweri humba mpaka pamihi. 17 Nguwu yoseri yaitulukilitwi na ulenji ama likuli lyoseri lyalishinkulitwi na ulenji ayi ndo mpaka igululwi kwa mashi na haviweri humba mpaka pamihi. 18 Handa mpalu pakagonja na mdala, umlawa ulenji, su mpaka woseri wawili wogi mashi na womberi hawaweri wahumba mpaka pamihi.

19 Mdala yoseri yakawera mumashaka gakuyi, hakaweri humba kwa shipindi sha mashaka saba. Muntu yoseri yakamshinkula mdala ayu hakaweri humba mpaka pamihi.

20 Shintu shoseri shakagonjera ama kulivagira shaka shakuyi sha kusuma mwazi, hashiweri humba. 21 Muntu yoseri yakashishinkula shitanda shakuyi mdala ayu ndo mpaka kaputi nguwu zakuyi na kuyoga kwa mashi, yomberi hakaweri humba mpaka pamihi. 22 Muntu yoseri yakakishikula shoseri sheni mdala ayu kashikalira hakaziputi nguwu zakuyi na kuyoga mashi, na yomberi hakaweri humba mpaka pamihi. 23 Muntu yoseri hayanakashinkuli shintu shoseri shakagonjiriti ama kutamira mdala ayu, hakaweri humba mpaka pamihi.

24 Handa mpalu pakagonja na mdala ayu na mwazi gwa mdala ayu gumtulukira mpalu ayu, su mpalu ayu hakaweri humba kwa mashaka saba. Lisaga lyoseri lyakagonjera mpalu ayu haliweri humba.

25 Handa mdala pagumlawa mwazi kwa mashaka gavuwa kuliku ntambu yayiwera ama gumlawa mwazi shipindi shakuyi ndiri sha kulawa mwazi, su hakendereyi kuwera humba shaka shoseri mwaza pagulawa Ayiweri handa yayiweriti mashaka gakuyi ga mwezi. 26 Shitamda shoseri shakagonjera shaka ashi ama shibanta shoseri shakatamira, hashiweri humba teratera handa shipindi sha uhumba wakuyi wa kumlawa mwazi. 27 Muntu yoseri yakavishinkula vintu vilii, hakaweri humba na ndo mpaka kaputi nguwu zakuyi na kuyoga, yomberi hakaweri humba mpaka pamihi.

28 Pakuyuma mwazi gwakuyi mdala ayu hakahepi mpaka mashaka saba su kaweri herepa na pamashaka aga hakaweri herepa. 29 Lishaka lya nani hakatoli ngunda wawili ama wana wadidika wawili wa ngunda na kumjegera mtambika pakwegera na kumlyangu gwa liringu lya kuliwona. 30 Mtambika hakalaviyi yumu kwajili ya tambiku ya kuwusiya vidoda na yumonga kwajili ya tambiku ya kulunguziwa. Kwa njira ayi mtambika hakamtenderi mdala ayu maluwa ga kukolaniziya kulongolu kwa Mtuwa Mlungu na kumwusilira uhumba wa kumlawa mwazi.

31 Ndo hangu ntambu hamuwaberiziyi Waisraeli na uhumba awu, nawiza kwigiranga numba yangu nanagala yayiwera muwamu mwawu wingira amu na uhumba wawu, pawatenda hangu hawalagwi.

32 Ali ndo lagiru kuusu mpalu yawumlawa ufira na yawumlawa ulenji na kuwera humba, 33 Lagiru ali limhusu viraa mdala yagumlawa mwazi na kuwera humba. Lagiru ali limhusu mpalu ama mdala yoseri yashimlawa shoseri na viraa limhusu yakagonja na mdala yakawera ndo mhumba.