1 Mtuwa Mlungu kayoweriti na Musa pa wana wawili wa Aruni kuhowa shaka shilii pawamsegeleriti Mtuwa Mlungu na kumlavilira ubani yaufiruwa ndiri. 2 Mtuwa Mlungu kamgambira Musa, "Gumberiziyi mlongu gwaku Aruni, nakingira Pahala Pananagala Nentu kumbeli kwa lipaziya, kulongolu kwa mfiniku gwa Lisanduku lya Lipatanu yagushemuwa pahala pa kulekeziya vidoda shaka shashijimiluwa ndiri, pakajimira ndiri hakahowi toziya handawiri muliwundi pamfuniku yagushemuwa pahala pa kulekeziya vidoda.

3 Pamberi pa kwingira Aruni Pahala Pananagala Nentu hakalaviyi mwana gwa ng'ombi kwajili ya tambiku ya kuwusiya vidoda pakuwera na kondolu gwashipalu kwajili ya tambiku ya kulunguziwa."

4 Pamberi pa kwingira Pahala Pananagala Nentu, yomberi hakogi mashi, shakapanu hakavali nguwu za utambika. Hakavali kaputura nguwu mfufu, viraa hakavali lihabiti lya nguwu mfufu na kulitawa lufunga lwa nguwu mfufu mushunu. 5 Hakatoli mbuzi pongu wawili kulawa mushipinga sha wantu wa Israeli kwajili ya tambiku ya kuwusiya vidoda na kondolu yumu kwajili ya tambiku ya kulunguziwa.

6 Aruni hakamlaviyi ng'ombi kuwera tambiku ya kuwusiya vidoda kwajili yakuyi mweni na kwajili ya kaya yakuyi. 7 Shakapanu hakatoli mbuzi pongu wawili walii na kuwatula pakwegera na ligomi lya Liringu Linanagala. 8 Hakawagalambuziyi simbi mbuzi pongu wawili walii, simbi yimu kwajili ya kundavilira tambiku neni Mtuwa Mlungu na tambiku imonga kwajili ya mbuzi ulii yumonga yakalaviwa kunja kwa kulugonjeru yakashemwa Azazeli. 9 Aruni hakamjegi mbuzi gwashipalu ulii yakaweriti kwajili ya kundavilira tambiku neni Mtuwa Mlungu na kundavilira tambiku ya kuwusiya vidoda. 10 Kumbiti mbuzi pongu ulii yakashemwa Azazeli yakalaviwa kunja kwa kulugonjeru, hakalaviwi kulongolu kwa neni Mtuwa Mlungu pakawera mkomu su kaweri tambiku ya kukolaniziya mawoku, mtambika hakamleki kagendi kushiwala kwa Azazeli, pakapapa vidoda vya wantu.

11 Aruni hakamlaviyi ng'ombi kuwera tambiku ya kuwusiya vidoda vyakuyi mweni pamuhera na kaya yakuyi, su hakamlikituli nkanyama ulii kuwera tambiku ya kuwusiya vidoda. 12 Shakapanu hakatoli shetezu na kutola makala ga motu pashitalawanda sha kutambikira kulongou kwa Mtuwa Mlungu na kutola ubani yausagitwi weri mawoku mawili. 13 Su yomberi nakiza kuhowa, hakaujegi ubani awu kulongolu kwa Mtuwa Mlungu na kuulekera mumotu su lyosi lya ubani awu ligubikili mfiniku yagushemwa pahala pa kulekeziya vidoda, Lisandiku lya Lipatanu. 14 Hakatoli mwazi kidogu gwa nkanyama ulii na kugumishira kwa shyala shakuyi uwega wa kwagulawa mshenji mala saba, pamfiniku yagushemuwa pahala pa kulekeziya vidoda, shakapanu hakagumishili kwa shyala shakuyi mwazi gumonga kulongolu ku Lisanduku lya Lipatanu mala saba.

15 Shakapanu hakamlikituli mbuzi gwa shipalu kuwera tambiku ya kuwusiya vidoda vya wantu woseri. Mwazi gwa mbuzi ulii hakagujegi Pahala Pananagala Nentu na kutenda ntambu yakatenditi kwa mwazi gulii gwa ng'ombi ulii, yomberi hakagumishili pashibikiru, uwega wa kulongolu kulisanduku lilii. 16 Kwa kutenda hangu, yomberi hakapapungi Pahala Pananagala Nentu, toziya ya uhumba na makosa na vidoda vyawu vyoseri vya wantu wa Israeli. Ntambu ayi hakatendi viraa kwajili ya Liringu Linanagala lyaliwera pakati pa wantu yawawera wahumba. 17 Aruni pakagenda Pahala Pananagala Nentu Muliringu Linanagala kupapunga, kwahera ulekeziwu kwa muntu yoseri ulii kwingira pahala poseri palii Muliringu Linanagala, wantu hawalekeziwi kwingira Aruni pakamalira kala na kulawa kunja.

18 Shakapanu Aruni hakalawi na kugenda pashitalawanda sha kutambikira shashiwera kulongolu kwa Mtuwa Mlungu na kupapunga. Hakatoli mwazi kidogu gwa ng'ombi ulii na gwa mbuzi ulii na kugatyemeleka magoli ga shitalawanda sha kutambikira wega zoseri. 19 Shakapanu hakajwiki shyala shakuyi mumwazi gulii na kugumishira pashitalawanda sha kutambikira mala saba kushityeka na kupunga uhumba woseri wa wantu wa Israeli.

20 Pa Aruni kumalira kupapunga Pahala Pananagala Nentu, Muliringu Linanagala pamuhera na shitalawanda sha kutambikira, su yomberi hakamjegi mbuzi pongu ulii yakajegwa kunja kulugonjeru pakapapa vidoda vya wantu. 21 Aruni hakatuli mawoku gakuyi mawili pamtuwi gwa mbuzi ulii yakawera mkomu na kuvitakula vidoda vyoseri vya wantu wa Israeli. Kwa kutenda hangu hakavituli vidoda vyoseri vya wantu wa Israeli pamtuwi gwa mbuzi. Shakapanu hakamsyaguli muntu kamtoli mbuzi ulii kagendi kushiwala pakajegwa na muntu yakalilaviyiti mweni kutenda hangu. 22 Yomberi hakamleki mbuzi pongu ulii kagendi kushiwala, pahala papawera ndiri na wantu, pakavitola vidoda vyawu vyoseri.

23 Shakapanu Aruni hakawuyi Muliringu Linanagala, yomberi hakavuli nguwu zakazivaliti pakingiriti Pahala Pananagala Nentu na kuzileka mlaa. 24 Su hakogi mashi mu Pahala Pananagala na kuzivala nguwu zakuyi. Hakalawi kunja na kulaviya tambiku kwajili yakuyi mweni na kulaviya tambiku ya kulunguziwa kwajili ya wantu wa Israeli, su kulikolaniziya mawoku kulongolu kwa Mtuwa Mlungu, kwajili yakuyi mweni na wantu wa Israeli. 25 Lipaki lya nkanyama gwa tambiku gwa kuwusiya vidoda hakalilunguziyi pashitalawanda sha kutambikira.

26 Muntu ulii yakamjegiti mbuzi ulii yakatoliti vidoda vya wantu, pakawuya kwanja hakazigululi nguwu zakuyi na koga mashi, shakapanu hakawezi kwingira mukambi. 27 Ng'ombi ulii na mbuzi yawalaviyitwi tambiku ya kuwusiya vidoda, mwazi gwawu gujegitwi Pahala Pananagala Nentu su kulaviwa tambiku ya kukolaniziya mawoku kulongolu kwa Mtuwa Mlungu, likuli lyawu na vinofu pamuhera na mavi gawu, vyoseri avi havijegwi kulunguziwa kunja kulugonjeru. 28 Muntu ulii yakavilunguziya, hakaziputi nguwu zakuyi na koga mashi, shakapanu hakawezi kwingira mulugonjeru.

29 Lilagaliru ali mfiruwa kuligolokera mashaka goseri. Lishaka lya lilongu lya mwezi gwa saba, maweni mwenga pamuhera na wahenga yawalikala pakati pa mwenga, mfiruwa mwoyi kuliya lishaka ali na kuleka kutenda mahengu. 30 Mulishaka ali, Aruni hakatendi lihengu lya kuwakolaniziya mawoku, mlekeziwi vidoda vyenu na mwenga hamuweri waherepa kulongolu kwa Mtuwa Mlungu. 31 Lishaka ali liwera lishaka lya kwoyera na mwenga hamwoyi kuliya. Lagaliru ali liweran lya mashaka goseri. 32 Mtambika yakatyekituwi na kutenda lihengu pa tati gwakuyi, yomberi ndo hakalaviyi tambiku ya kukolaniziya mawoku pakavala nguwu mfufu iherepa nanagala. 33 Yomberi hakalaviyi tambiku ya kukolaniziya mawoku Pahala Pananagala Nentu kwajili ya Liringu Linanagala na shitalawanda sha kutambikira na watambika na pamuhera na shipinga shoseri sha wantu wa Israeli. 34 "Lilagaliru ali liwera lya mashaka goseri, mfiruwa muligolokeri su kulaviya tambiku ya kukolaniziya mawoku kwajili ya wantu wa Israeli mala yimu kwa kila shinja na kulekeziwa vidoda vyawu. Musa katenditi goseri ntambu yakalagaliritwi na Mtuwa Mlungu."