1 Mtuwa Mlungu kamlagaliriti Musa, 2 guwagambiri wantu wa Israeli, muntu yoseri pakatenda vidoda pota na kuvimana na kutenda shintu shashilewelelitwi kwa lagaliru lya Mtuwa Mlungu, yomberi hakatendi aga.

3 Handa Mtambika Mkulu pakatenda vidoda, ata pakajega makosa toziya ya wantu na kalaviyi vidoda vyakuyi vyakatenditi na kumsengeziya kwa Mtuwa Mlungu, ng'ombi gwa shipalu mdidini mkamilika, kuwera ndo malaviwu ga vidoda. 4 Yomberi hakamjegi mwana gwa ng'ombi pakwegera na ligomi lya Liringu Linanagala, kulongolu kwa Mtuwa Mlungu, su hakatuli liwoku lyakuyi pamtuwi gwa ng'ombi ulii na kumlikitula kulongolu kwa Mtuwa Mlungu. 5 Shakapanu Mtambika Mkulu hakatoli mwazi shididini gwa ng'ombi ulii na kugujega Muliringu Linanagala. 6 Hakajwiki shyala shakuyi mumwazi agu na kugumishira mala saba kulongolu kwa lipaziya lya Pahala Pananagala. 7 Shakapanu mtambika hakagutyelemeki mwazi agu mumagoli ga shitalawanda sha kutambikira sha kutumiziya ubani yauwera na kununkira kuherepa, kulongolu kwa Mtuwa Mlungu Muliringu Linanagala. Mwazi yagusigaliti hakaguyitili pasi pa lyanjiru lya shitalawanda sha kutambikira sha kulunguziya tambiku yayiwera pakwegera pa ligomi lya Liringu Linanagala. 8 Shakapanu hakawusiyi lipaki lyoseri lya ng'ombi ayu gwa tambiku lya kuwusiya vidoda, lipaki lyoseri lyaligubika utumbu, 9 na figu mbili pamuhera na lipaki lyaliwera panani pakuwi pamuhera na seemu iherepa ya matoga. 10 Watambika hawavitoli vintu vyoseri avi na kuvilunguziya pashitalawanda sha kutambikira, ntambu yakatenditi mutambiku ya ponga. 11 Kumbiti likuli lwa ng'ombi ayu na vinofu vyakuyi vyoseri pamuhera na mtuwi gwakuyi na magulu gakuyi na utumbu wakuyi na mapimba gakuyi, 12 ng'ombi yoseri yakasigaliti, hakamjegi kunja kukambi pahala paherepa papajimirwa na Mtuwa Mlungu papawasilwa livu, yomberi hakamlunguziyi motu pambawu, pahala palii papawasila livu.

13 Handa wantu woseri wa Israeli watenda vidoda pota na kuvimana kwa kutenda vintu vyavilewelekitwi kwa lilagaliru lya Mtuwa Mlungu, womberi hawaweri na makosa, 14 palaa palii vidoda avi vimanikana, su wantu woseri hawalaviyi mwana gwa ng'ombi gwashipalu kaweri tambiku ya kuwusiya vidoda. Womberi hawamjegi Kuliringu Linanagala. 15 Shakapanu wakulu wa wantu wa Israeli hawatuli mawoku gawu pamtuwi gwa nkanyama ulii, su hakalikitulwi kulongolu kwa Mtuwa Mlungu. 16 Su Mtambika Mkulu hakajegi mwazi kidogu gwa ng'ombi ulii Muliringu Linanagala. 17 Yomberi hakashijwiki shyala shakuyi mumwazi na kugumishira kulongolu kwa lipaziya mala saba, kulongolu kwa Mtuwa Mlungu. 18 Shakapanu mwazi gumonga hakagutyelemeki mumagoli ga shitalawanda sha kutambikira shashiwera Muliringu Linanagala kulongolu kwa Mtuwa Mlungu. Mwazi gwagusigaliti hakagwitili pasi pa shikaliru sha shitalawanda sha kutambikira sha kutumiziya ubani shashiwera pakwegera na ligomi lya Liringu Linanagala. 19 Lipaki lyoseri lya nkanyama ulii hakalitoli na kulilunguziya pashitalawanda sha kutambikira. 20 Mtambika hakamtenderi ng'ombi ulii gambira ng'ombi gwa tambiku ya kuwusiya vidoda ntambu yakamtendiriti. Su mtambika hakalaviyi tambiku kwajili ya kuwusiya vidoda vyawu na womberi hawalekeziwi vidoda vyawu vyawatenditi. 21 Shakapanu hakatoli vintu vyavisigaliti vya ng'ombi ulii kunja kukambi na kumlunguziya kwa motu ntambu yakatenditi kwa nkanyama ulii yumonga. Ayi iwera tambiku ya kuwusiya vidoda vya shipinga sha wantu wa Israeli.

22 Mkulu pakatenda vidoda pota kuvimana kwa kutenda shintu shashilewelelitwi kwa lilagaliru lya Mtuwa, Mlungu gwakuyi, yomberi hakaweri kakosa. 23 Yomberi pakavimana shidoda shakatenditi, su hakajegi kumlaviya mbuzi gwashipalu yakahera shidoda shoseri. 24 Hakatuli liwoku lyakuyi pamtuwi gwa mbuzi ulii na kumlikitula pahala pawalikitula tambiku za kulunguziya kulongolu kwa Mtuwa Mlungu, ayi hayiweri tambiku ya kuwusiya vidoda. 25 Mtambika hakajwiki shyala shakuyi mumwazi gwa tambiku ya kuwusiya vidoda na kugatyemeleka magoli ga shitalawanda sha kutambikira. Na mwazi gwagusigala hakagwitili pasi pa shikaliru sha shitalawanda sha kutambikira. 26 Lipaki lyoseri lya mbuzi ulii hakalilunguziyi pashitalawanda sha kutambikira, ntambu yakatenditi mulipaki lya nkanyama gwa tambiku ya ponga. Su mtambika hakalaviyi tambiku ayi na mkulu ulii hakalekeziwi vidoda vyakuyi vyakatenditi.

27 Na muntu yoseri pakati pa wantu wa Israeli pakatenda vidoda pota kuvimana, kwa kutenda shintu shashilewerituwi kwa lilagaliru lya Mtuwa Mlungu na vimtenda kaweri na kosa, 28 pakavimana vidoda vyakuyi vyakatenditi, yomberi hakajegi tambiku yakuyi ya mbuzi gwashidala yakahera shidoda shoseri kwajili ya tambiku ya kuwusiya vidoda vyakatenditi. 29 Yomberi hakatuli liwoku lyakuyi pamtuwi gwa mbuzi ulii gwa tambiku ya kuwusiya vidoda, hakamlikituli pahala pawalikitula wankanyama wa tambiku ya kulunguziwa. 30 Shakapanu mtambika hakajwiki shyala shakuyi mumwazi gwa tambiku ya kuwusiya vidoda na kugatyemeleka magoli ga shitalawanda sha kutambikira. Mwazi yagusigala hakagwiti pasi pa shikaliru sha shitalawanda sha kutambikira. 31 Lipaki lyoseri lya mbuzi ulii gwashidala hakaliwusiyi ntambu yakaliwusiyiti lipaki lya wankanyama wa tambiku za ponga, su mtambika hakalilunguziyi pashitalawanda sha kutambikira na nunkira yakuyi hayimuherepeziyi Mtuwa Mlungu. Su mtambika hakalaviyi tambiku kwajili ya muntu ayu na yomberi hakalekeziwi vidoda vyakatenditi.

32 Handa muntu pakamjega mwana gwa kondolu kaweri tambiku yakuyi ya ponga, su yomberi hakajegi mwana gwa kondolu gwashidala yakahera shidoda shoseri. 33 Yomberi hakatuli liwoku lyakuyi pamtuwi gwa nkanyama ulii gwa tambiku ya kuwusiya vidoda, hakamlikituli pahala palii pawalikitula wankanyama wa tambiku ya kulunguziwa. 34 Shakapanu mtambika hakajwiki shyala shakuwi mumwazi gwa nkanyama gwa tambiku ya kuwusiya vidoda na kugutyemeleka mumagoli ga shitalawanda sha kutambikira. Mwazi yagusigaliti hakagwitili mushikaliru sha shitalawanda sha kutambikira. 35 Su mtambika hakaliwusiyi lipaki lyoseri ntambu yakaliwusiyiti lipaki lya mwana gwa kondolu gwa tambiku ya ponga, mtambika hakaliwunguziyi pashitalawanda sha kutambikira, pamuhera na tambiku zyawamlavilira Mtuwa Mlungu kwa motu. Na mtambika hakalaviyi tambiku kwajili ya muntu ayu na yomberi hakalekeziwi vidoda vyakatenditi.