1 Mtuwa Mlungu kamgambiriti Musa na Aruni, 2 Muntu pakawera na uvimbi ama upeli ama shibaku shifufu mushimba yakuyi, shakapanu shilanguziya kuwera ungumbura, su yomberi hakajegwi kwa mtambika Aruni ama kwa yumu gwa wana wakuyi yakawera mtambika. 3 Su mtambika hakapaloli weri pahala papawera na ulweli na paiwera nvili za pahala palii zigalambuka na kuwera mfufu na ulweli weni pauwoneka kuwera wamgati ng'anji mushimba yakuyi, su ulweli awu hauweri ungumbura. Mtambika pakamalira kumlola weri, yomberi hakabweri kuwera muntu ayu kawera muhumba. 4 Kumbiti paiwera upeli awu, tembera shiwera shifufu kumbiti shingira ndiri ng'anji munshima ama nvili za pahala palii zigalambuka ndiri kuwera mfufu, su mtambika hakamtuli gweka muntu ulii ka mashaka saba. 5 Mulishaka lya saba, mtambika hakamloliloli kayi muntu ulii, su kulawirana na kulolalola weri kwa mtambika, payiwoneka ulweli ulii weneya ndiri munshimba ya muntu ulii, mtambika hakamtuli gweka muntu ulii kwa mashaka gamonga saba.

6 Mulishaka lya saba, mtambika hakamloliloli kayi muntu ulii. Upele ulii pawufifiya na kweneya ndiri munshimba, mtambika hakabweri kuwera muntu ulii kapungwa, ulweli ulii uweriti upeli hera. Muntu ulii hakagululi nguwu zakuyi na hakaweri muherepa kulongolu kwa Mlungu. 7 Kumbiti upeli awu pawuweneya munshimba yakuyi pakulilanguziya mweni kwa mtambika kwajili ya kupungwa kwakuyi, su hakizi kayi kwa mtambika. 8 Mtambika hakaloliloli weri muntu ulii payiwera upeli weneya munshimba, mtambika hakabweri kuwera muntu ulii kawera muhumba, toziya ulweli ulii uwera ungumbula.

9 Handa muntu pakawera na ulweli yaulifana na ungumbula, yomberi hakajegwi kwa mtambika. 10 Mtambika hamkaloliloli weri na yomberi pakawera na uvimbi mfufu yautenda nvili vyakuyi ziweri mfufu na uvimbi awu ugalambuka na kuwera shilonda, 11 ulweli awu uwera ungumbula wa shaka shivuwa. Mtambika hakambweri muntu ulii kuwera muhumba. Mtambika hapeni kamtuli gweka kayi muntu ayu mukulolalola toziya kawera kala muhumba.

12 Payiwera ungumbula awu umpata na kweneya munshimba yoseri, kwanjira mumtuwi mpaka mumagulu ntambu yakawona mtambika, 13 su mtambika hakamloliloli weri, handa ulweli yaulifana na ungumbula paweneya munshimba yoseri, su mtambika hakambweri muntu ulii kuwera kaherepa. Toziya nshimba igalambuka kuwera mfufu na muntu ayu kawera muherepa. 14 Kumbiti pashiwoneka shilonda munshimba mwa muntu ulii, muntu ulii hakaweri muhumba. 15 Mtambika hakashiloliloli weri shilonda shilii na kumbwera kuwera muntu ulii kawera muhumba toziya ulweli awu uwera ungumbula. 16 Kumbiti shilonda ashi pashigalambuka kayi na kuwera shifufu, muntu ayu hakawuyi kwa mtambika. 17 Mtambika hakamloliloli weri kayi na pakawona kuwera shigalambuka na kuwera shifufu, su hakambweri muntu ulii kuwera kaherepa.

18 Handa muntu pakawera na liputi munshimba mwakuyi na kapona, 19 na pahala papaweriti na liputi lilii pawera na uvimbi mfufu, ama kuwera pasheri kidogu na pafufu kidogu, muntu ayu kafiruwa kamlanguziyi mtambika. 20 Mtambika hakamloliloli weri muntu ulii. Mtambika pakawona nshimba iwera na shilindi na nvili za pahala palii pagalambuka kuwera pafufu, su mtambika hakambweri muntu ulii kuwera muhumba, toziya ulweli ulii uwera ungumbura yaulawirana na liputi. 21 Kumbiti mtambika pakamlola weri muntu ulii na kuwona kuwera nvili za pahala palii ziwera mfufu ndiri ama kwahera shilindi, pahala palii pafifiya hera, su mtambika hakamtuli gweka muntu ulii kwa mashaka saba. 22 Handa ulweli awu hauweneyi munshimba, su mtambika hakambweri muntu ulii kuwera muhumba na hakamtuli gweka toziya seemu ilii pawera na ulweli. 23 Kumbiti payiwera seemu ilii yeneya ndiri ulweli, su lilii liwera likovu lya liputi hera. Mtambika hakambweri muntu ulii kuwera kaherepa.

24 Payiwera nshimba ya muntu kwana pahala palungulira na pahala papalunguliriti pagalambuka kuwera pasheri pafufu ama ndo pafufu, 25 mtambika hakapaloliloli weri. Handa pakawona kuwera nvili zigalambuka kuwera mfufu na pahala palii pawera na shilindi, ulweli awu hauweri ungumbula. Ungumbula awu ulawira kulawirana na kulungulira. Mtambika hakambweri muntu ulii kuwera muhumba, toziya kawera na ulweli wa ungumbula. 26 Kumbiti mtambika pakawona kuwera nvili za pahala palii mfufu ndiri na kwahera shilindi kumbiti pafifiya hera, mtambika hakamtuli gweka muntu ulii kwa mashaka saba. 27 Mulishaka lya saba, mtambika hakamloli kayi. Ulweli ulii pawuweneya munshimba, mtambika hakambweri muntu ulii kuwera muhumba, toziya ulweli awu uwera ungumbula. 28 Shipaku shilii pashyeneya ndiri kumbiti shififiya hera, uvimbi ulii ulawirana na kuungulira hera, su mtambika hakambweri muntu ulii kuwera kaherepa toziya ashi shiwera shipaku hera sha kulungulira.

29 Handa mpalu ama mdala pakawera na uvimbi pamtuwi ama mushidevu, 30 mtambika hakauloli weri ulweli awu. Mtambika pakawona kuwera kwana shilindi na nvili za pahala palii ziwera njanu na nyembamba, su mtambika hakambweri muntu ulii kuwera muhumba, toziya upele ulii uwera ungumbula wa mumtuwi ama mushidevu. 31 Kumbiti mtambika pakawona kuwera kahera shilindi na nvili ziwera ntitu ndiri, su mtambika hakatuli gweka muntu ulii kwa mashaka saba. 32 Mulishaka lya saba, mtambika hakashiloli shilonda shilii. Payiwera shilonda shilii shyeneya ndiri munshimba na kwahera nvili za njanu ama kwahera upeli woseri pahala palii, 33 su muntu hakamogwi nvili ama ndevu shakuwi. Kumbiti palii papawera na upeli hapeni kapamogi. Su mtambika hakamtuli gweka kwa shaka shamonga sha mashaka saba. 34 Mulishaka lya saba, mtambika hakauloli upeli ulii. Mtambika pakawona kuwera upeli ulii weneya ndiri munshimba ama wingira ndiri mngati munshimba mwakuyi, su mtambika hakambweri muntu ulii kuwera kaherepa. Muntu ulii hakagululi nguwu zakuyi na yomberi hakaweri muherepa. 35 Kumbiti upeli awu pauweneya pakupungwa, 36 mtambika kafiruwa kamloliloli weri muntu ulii na payiwera upeli ulii weneya munshimba, mtambika hapeni kasakuli nvili za njanu, muntu ulii hakaweri muhumba. 37 Kumbiti mtambika pakawona kuwera upeli ulii upona na nvili ntitu zikula pahala palii, su vironda virii vipona, muntu ayu hakaweri kaherepa. Mtambika hakambweri muntu ayu kuwera kaherepa.

38 Handa muntu yoseri mpalu ama mdala, pakawera na shipaku shifufu munshimba mwakuyi, 39 mtambika hakamloli weri muntu ayu. Mtambika pakawona kuwera vipaku avi viwera vifufu kididini, awu hawuweri upeli wa ntambu hera, su muntu ayu hakaweri kaherepa.

40 Handa mpalu kawera na shipara, yomberi kawera kaherepa. 41 Handa mpalu ayu pakawera na shipara kwanjira kumbeli mushisogu mpaka kulongolu pashiwunji, muntu ayu kawera kaherepa. 42 Kumbiti pamtuwi mushipara kuwera na shipaku shisheri shifufu, ulweli awu hauweri ungumbula yawulawira mushipala shakuyi mumtuwi ama kushiwunji kwakuyi. 43 Mtambika hakamloli weri muntu ulii. Su mtambika pakawona kuwera uvimbi uwera msheri mfufu pashipara shakuyi ama kushiwunji shakuyi na pawoneka gambira ungumbula munshimba yakuyi, 44 su muntu ayu kawera na ungumbula, yomberi kawera muhumba. Mtambika hakambweri muntu ayu kuwera muhumba. Ulweli wakuyi wapamtuwi pakuwi.

45 Muntu yoseri yakawera na ungumbula, yomberi hakavali nguwu zyazidegeka na seemu ya mlomu gwakuyi gwa pampindi hakagubiki na kubotanga kwa liziwu likulu pakalonga, neni muhumba, neni muhumba. 46 Yomberi hakendereyi kuwera muhumba kwa shaka shoseri pakawera na ulweli awu. Yomberi kawera muhumba, su hakalikali gweka yakuyi kunja kulugonjeru.

47 Handa kwana ntambu yoseri ya uvukuma munguwu, payiwera nguwu ya sufu ama nguwu mfufu iherepa, 48 payiwera nguwu ayi ipotuwa kwa nguwu mfufu iherepa ama kwa sufu ama nguwu ya likuli ya ntambu yoseri ilii, 49 payiwera uvukuma awu uwera na langi ya mahamba mawisi ama langi nsheri munguwu ayi, nguwu ayi iwera na uvukuma. Su nguwu ayi ifiruwa kalanguziwi mtambika. 50 Mtambika hakawuloli weri uvukuma awu na kuyitula nguwu ayi gweka kwa mashaka saba. 51 Mulishaka lya saba, mtambika hakawuloli uvukuma awu. Payiwera uvukuma ulii weneya munguwu ilii, nguwu ilii iwera na uvukuma. Su nguwu ulii hayiweri humba. 52 Mtambika hakayipambiri motu nguwu ilii toziya iwera na ntambu zoseri za uvukuma.

53 Kumbiti mtambika pakawona kuwera uvukuma ulii weneya ndiri munguwu ilii, 54 su mtambika hakalagaliri nguwu ilii igululwi na kutulwa gweka kwa mashaka gamonga saba. 55 Mtambika hakayiloli nguwu ayi pakugululwa. Payiwera alama ilii ingalambuka ndiri langi yakuyi tembera uvukuma weneya ndiri, nguwu ayi iwera humba. Nguwu ayi hayipambwi mumotu, pashiwera shipaku sha uvukuma shiwera kumbeli ama kulongolu kwa nguwu ayi.

56 Handa mtambika pakawona kuwera shipaku shilii shififiya pakugululwa, su hakayidegi seemu ilii yayiwera na ntambu ya uvukuma. 57 Shakapanu shipaku shilii pashiwoneka kayi munguwu yayisonitwi ama yayipotitwi ama mushintu shoseri sha likuli, uvukuma awu weneya. Su nguwu ayi Hayipambilwi mumotu. 58 Kumbiti nguwu yayilawilwa na uvukuma pakugululwa, su ifiruwa igululwi kayi iherepi.

59 Aga ndo malagaliru yagawusu ntambu ya uvukuma yawulawira, ntambu yawulawira munguwu ya sufu ama nguwu ya nfufu ama nguwu yayipotitwi ama nguwu ya likuli. Kwa njira ayi mwenga hamuwezi kuvimana nguwu humba na nguwu iherepa.