1 Mtuwa Mlungu kumgambiriti Musa, 2 guwagambiri wantu wa Israeli hangu. Muntu yoseri pakati pa wantu wa Israeli ama muhenga yakalikala pakati penu, pakamlaviya tambiku mwana gwakuyi yoseri kwa mlungu Moleki, muntu ayu hakalagwi. Wenikaya hawamgumangi mabuwi. 3 Neni namweni hanimlemi muntu ayu na hanimtuli gweka kulawa kwa wantu wakuyi, toziya kamlaviyiti yumu gwa wana wakuyi kaweri tambiku kwa mlungu Moleki na kwa kutenda hangu kapahumba Muliringu lyangu Linanagala pamuhera na litawu lyangu linanagala. 4 Handa wenikaya wa pahala panu pawasinda kumlaga muntu ulii, 5 neni namweni hanimwazibu muntu ayu yakasinda kumlaga muntu ulii, hanimwazibu yomberi pamuhera na kaya yakuyi na haniwatozi kuhowa, mweni pamuhera na woseri yawaheriti uwaminika kwaneni kwa kumguwira mlungu Moleki.

6 Handa muntu yoseri pakawagendera wantu yawatunga kulawa kwa wantu yawahowiti pamuhera na wahawi, hanimwazibu muntu ayu na hanimtozi kuhowa.

7 Su mulityeki muweri wananagala, toziya neni ndo Mtuwa Mlungu, Mlungu gwenu. 8 Mugajimili malagaliru gangu na mugatendi toziya neni Mtuwa Mlungu yaniwapunga mwenga.

9 Muntu yoseri yakampangira tati gwakuyi ama mawu gwakuyi, muntu ayu hakalagwi. Yomberi kampangira tati gwakuyi ama mawu gwakuyi, su shilii shashimlawira hashiweri shakuyi mweni.

10 Handa mpalu pakahumba na mdala gwa wapakwegera gwakuyi, woseri wawili hawalagwi.

11 Mpalu pakagonja na yumu gwa wadala wa tati gwakuyi, yomberi hakamsoniziyi tati gwakuyi, su woseri wawili hawalagwi. Shilii shashiwalawira hashiweri shawu weni.

12 Mpalu yoseri pakagonja na mdala gwa mwana gwakuyi, woseri wawili hawalagwi. Woseri watenda vidoda vikulu, su virii vyaviwalawira haviweri kwawu weni.

13 Handa mpalu yoseri pakagonja na mpalu muyaguwi ntambu yakagonja na madala, woseri wawili hawalagwi toziya watenda shitwatira shashiwera shikalaliru. Shilii shashiwalawira hashiweri shawu weni kwa shilii shawatenditi.

14 Handa mpalu pakayuga mdala na viraa pakamuyuga mawu gwakuyi, woseri watatu hawalunguziwi motu kuwalaga, toziya watenda vidoda vikulu. Hamtendi hangu su napawera vidoda vya ntambu ayi pakati penu.

15 Handa mpalu yoseri pakagonja na nkanyama, muntu ayu hakalagwi pamuhera na nkanyama ulii.

16 Handa mdala pakagonja na nkanyama, mdala ayu pamuhera na nkanyama ulii hawalagwi. Shilii shashiwalawira hashiweri kwawu weni kwa shilii shawatenditi.

17 Handa mpalu yoseri pakamuyuga dada gwakuyi, muhinga gwa tati gwakuyi ama mawu gwakuyi, muhinga ayu pakajimilirana na kaka gwakuyi na kugonja nayu, shitwatira ashi hashiweri shikalaliru na hakawusiwi kulawa kwa wantu wawu, toziya mpalu ayu kamsoniziya dada gwakuyi na yomberi hakazibiwi kwa shilii shakatenditi.

18 Handa mpalu pakagonja na mdala yakawera mumashaka gakuyi ga kusuma mwazi, woseri wawili hawawawusiyi kulawa kwa wantu wawu, toziya woseri wagalema malagaliru kuusu uhumba.

19 Nagugonja na dada gwa mawu gwaku ama shangazi gwaku, toziya womberi ndo walongu waku. Woseri yawatenda hangu, shilii shashiwalawira hashiweri shawu weni.

20 Handa mpalu pakagonja na mdala gwa tati gwakuyi mkulu ama mpusu, yomberi kankumsoniziya tati gwakuyi mkulu ama mpusu, woseri wawili kwa shilii shashiwalawira hashiweri sha shawu weni kulawirana na vidoda vyawu, su hawahowi pota kuwera na wana.

21 Handa mpalu pakamuyuga mdala gwa mlongu gwakuyi, yomberi kankumsoniziya mlongu gwakuyi, shitwatira ashi hashiweri shihumba, su woseri wawili hawahowi pota kuwera na mwana.

22 Mugajimili malagaliru gangu na amuli zyangu, pamjimira isi ya Kanaani kwaniwajega hapeni iwalemi mwenga. 23 Namulikala kwa kufata vitiba vya wantu wa isi ilii yang'enda kuwawinga kulongolu kwenu. Toziya womberi watenditi vitwatira avi, neni nkalaliritwi na womberi kwa matendu gawu madoda. 24 Kumbiti neni niwalagira kala kuwera mwenga hamuhali isi yawu, neni haniwapanani isi ayi muyikolimlima, isi yayiwera na ulunda na yayiwera na mbotu. Neni Mtuwa Mlungu, Mlungu gwenu ndo yaniwatuliti gweka na wantu wa isi zimonga.

25 Mwenga mfiruwa mtofautishi pakati pa wampongu na wankanyama walii yawajimiruwa ndiri kwa neni na walii yawajimiruwa kwa neni. Namulihumba maweni kwa kumshinkula nkanyama ama mpongu ama shoseri shashilikwawakwawa pasipanu, shilii neni nishituliti gweka shashiwera shihumba kwa mwenga. 26 Toziya neni Mtuwa Mlungu ndo mnanagala, neni niwatula gweka mwenga kulawa kwa wantu wa isi zimonga su muweri wantu waneni gweka yangu, su mwenga hamuweri wananagala.

27 Mpalu ama mdala yoseri yakawera mganga ama muhawi, yomberi hakalagwi kwa kugumangwa mabuwi. Shilii shashiwalawira hashiweri shakuyi mweni.