1 Su liweriti lishaka lya nane, Musa kawashema Aruni pamuhera na wana wakuyi na wazewi wa wantu wa Israeli. 2 Musa kamgambiriti Aruni, "Gumtoli gwenga mwana gwa ng'ombi gwashipalu kwajili ya tambiku ya kuwusiya vidoda na kondolu gwashipalu kwajili ya tambiku ya kulunguziwa, wankanyama woseri nawawera na shidoda shoseri. Shakapanu guwalaviyi tambiku kulongolu kwa Mtuwa Mlungu. 3 Shakapanu guwagambiri wantu wa Israeli wamtoli mbuzi yumu kwajili ya tambiku ya kuwusiya vidoda, na mwana gwa kondolu yumu yakawera na shinja shimu na yakahera shidoda shoseri kwajili ya tambiku ya kulunguziwa. 4 Viraa gumtoli ng'ombi gwashipalu na kondolu yumu gwashipalu kwajili ya kulaviya tambiku ya ponga, wamlaviliri Mtuwa Mlungu pamuhera na tambiku ya viboga yaihanganyiwitwi na lipaki toziya leru Mtuwa Mlungu hakawalawiri." 5 Wantu wa Israeli wavijegiti vintu vyoseri kulongolu Muliringu Linanagala gambira Musa ntambu yakawalagaliriti, shipinga shoseri sha wantu wa Israeli wagenditi kugoloka kulongolu kwa Mtuwa Mlungu. 6 Musa kawagambiriti, "Agu ndo mlandu gweni Mtuwa Mlungu kawagambiriti wagutendi su uweru wakuyi uwoneki kwa mwenga." 7 "Shakapanu Musa kamgambira Aruni, gushisegeleri shitalawanda sha kutambikira, gulaviyi tambiku yaku ya kuwusiya vidoda pamuhera na tambiku ya kulunguziwa, gulaviyi tambiku kwajili yaku gamweni na kwajili ya wantu wa Israeli."

8 Su Aruni kashisegeleriti shitalawanda sha kutambikira, kamlikituliti mwana gwa ng'ombi yakamlaviyiti kwajili ya tambiku ya kuwusiya vidoda vyakuyi mweni. 9 Shakapanu wana wa Aruni wamjegiriti mwazi, na Aruni kajobiti shyala shakuyi mumwazi gulii na kugatyemeleka magoli ga shitalawanda sha kutambikira. Mwazi yagusigaliti kagwitiliti mushikaliru sha shitalawanda sha kutambikira. 10 Su lipaki na figu na lipaki lyaligubikiti figu na matoga, yomberi kavilunguziyiti gambira Mtuwa Mlungu ntambu yakamlagaliriti Musa. 11 Kumbiti likuli lwa nkanyama ulii kalilunguziyiti kwa motu kunja kwa kambi.

12 Shakapanu Aruni kamlikituliti nkanyama gwa tambiku ya kulunguziwa. Wana wakuyi wamjegiriti mwazi, na Aruni kagumishiriti pashitalawanda sa kutambikira muwega zoseri. 13 Viraa womberi wamjegeriti tambiku za kulunguziwa na shipandi kwa shipandi pamuhera na mtuwi, Aruni kavilunguziyiti pashitalawanda sha kutambikira. 14 Pamberi pa kulunguziya tambiku ilii, yomberi kagululiti utumbu na magulu na kugalunguziya pamuhera na tambiku ilii ya kulunguziwa pashitawanda sha kutambikira.

15 Shakapanu kazitula tambiku za wantu. Kamtoliti mbuzi gwa tambiku kwajili ya kuwusiya vidoda vya wantu, kamlikitula na kumlaviya tambiku ya kuwusiya vidoda, ntambu yakatenditi kwa nkanyama ulii gwa kwanja. 16 Su katuliti tambiku ilii ya kulunguziwa na kalaviyiti gambira Mtuwa Mlungu ntambu yakalagaliriti. 17 Shakapanu katuliti tambiku ya viboga kamemiziya liwoku limu lya ubumu na kuvilunguziya pashitalawanda sha kutambikira pamuhera na tambiku ilii ya kulunguziwa ya kila mandawira.

18 Aruni kamlikituliti viraa ng'ombi gwashipalu na kondolu gwashipalu gwa tambiku ya ponga kwajili ya wantu. Wana wakuyi wamjegeriti mwazi kugumishira mushitalawanda sha kutambikira wega zakuyi zoseri. 19 Lipaki lya ng'ombi ulii pamuhera na lya kondolu gwashipalu ulii, mshira gwa kondolu na lipaki lyaligubikiti utumbu na figu na seemu iherepa ya matoga 20 womberi wavituliti pavifuwa vya wankanyama walii na yomberi kavinguziyiti lipaki lilii pashitalawanda sha kutambikira. 21 Kumbiti vifuwa virii na ligulu lulii lya kumbeli lya kumliwu, Aruni kavinyasuliti kumpindi kulanguziya kankumlavilira Mtuwa Mlungu, gambira Musa ntambu yakalagaliriti.

22 Aruni pakamaliliti kulaviya tambiku zoseri, tambiku ya kuwusiya vidoda na tambiku ya kulunguziwa na tambiku za ponga, yomberi kawanyasuliriti wantu mawoku, kawapetiriti mashi shakapanu kasulukiti kulawa pashitalawanda shilii. 23 Shakapanu Musa na Aruni wingiriti Muliringu Linanagala, pawalawiti wawapetiriti mashi wantu, uweru wa ukulu wa Mtuwa Mlungu uwonekiti kwa wantu woseri. 24 Mtuwa Mlungu kagukoziyiti motu, gulunguziyiti tambiku ya kulunguziwa pamuhera na lipaki lyaliwera pashitalawanda sha kutambikira. Wantu woseri pawaguwoniti motu, wabotangiti kwa nemeleru na kusuntama makukama.