1 Mtuwa Mlungu kamgambiriti Musa, 2 gumgambiri Aruni na wana wakuyi watambika wavipanani ligoya vintu vyavityekitwi kulongolu kwa neni, womberi nawiza kulihigiranga litawu lyangu linanagala. Neni ndo Mtuwa Mlungu. 3 Guwagambiri hangu. Handa yumu gwa wiwuka wenu muviyiwuku vyenu vyoseri hakavisegeleri vintu vinanagala, vintu virii wantu wa Israleli wavityekiti kulongolu kwa neni Mtuwa Mlungu yomberi pakawera muhumba, muntu hakatulwi gweka kulawa kwa neni. Neni ndo Mtuwa Mlungu.

4 Muntu yoseri gwa shiyiwuku sha Aruni yakawera na ugumbula ama kankulawa ufira nakaliya vintu vya Muliringu Linanagala mpaka pakapona. Muntu yoseri pakamshinkula muntu yakalekelitwi uhumba kwa kushinkula mawuti ama muntu nyakalawa ulenji, 5 ama pakashinkula shiwumbi shoseri shashikwawakwawa, shiwumbi shilii shashitenda muntu kaweri muhumba ama muntu yakaweza kumtenda kaweri muhumba gwa ntambu yoseri ilii. 6 Mtambika ayu hakaweri muhumba mpaka pamihi na kalekeziwa ndiri kuliya viboga vyaviwera vinanagala mpaka pakoga mashi. 7 Mshenji paguzyeta muntu ayu hakaweri muherepa. Pa aga yomberi hakawezi kuliya viboga vinanagala toziya ashi shiwera shiboga shakuyi. 8 Mtambika nakaliya shinofu shoseri sha nkanyama yakafuwiti mweni ama kulaguwa na nkanyama gwa kuntundu, yomberi nakiza kulitenda muhumba. Neni ndo Mtuwa Mlungu.

9 Watambika wafiruwa wagajimili malagaliru gangu, womberi nawiza kutenda vidoda na kulagwa. Neni ndo Mtuwa Mlungu yaniwatenda waweri wananagala.

10 Muntu yakawera ndiri gwa lukolu lwa watambika kajimirwa ndiri kuliya shiboga shinanagala. Ata muhenga gwa mtambika ama mtenda lihengu gwakuyi, walekeziwa ndiri kuliya shiboga shinanagala. 11 Kumbiti mtambika pakamuhemera mumanda su kaweri gwakuyi, su mumanda ayu kalekeziwa kuliya pamuhera na walii yawayiwukiti mukaya yakuyi. 12 Handa muhinga gwa mtambika yakayugwa na mtambika ndiri, yomberi kalekeziwa ndiri kuliya vintu vinanagala. 13 Kumbiti handa muhinga gwa mtambika kawera mkenja ama kalekwa na mpalu na kahera mwana na kawuya ukaya kwa tati gwakuyi na kalikala ntambu yakaweriti muwuhinga wakuyi, su yomberi hakawezi kuliya shiboga sha tati gwakuyi. Pamuhera na hangu, muhenga kalekeziwa ndiri kuliya viboga avi.

14 Handa muntu yoseri pakaliya viboga vinanagala pota kuvimana, su hakalipi seemu yimu pa seemu muhanu ya samani ya shilii shakaliyiti na kushiwuziya kwa mtambika. 15 Mtambika nakavilekera uhumba vintu vinanagala wantu wa Israeli vyawandavilira neni Mtuwa Mlungu, 16 kwa kuwatenda wantu wazibiwi kwa ukondola na makosa gawu kwa kuliya vintu vyawu vinanagala. Neni Mtuwa Mlungu ndo yanivitenda vintu avi viweri vinanagala.

17 Mtuwa Mlungu kamgambiriti kayi Musa, 18 guwagambiri Aruni na wana wakuyi watambika pamuhera na wantu woseri wa Israeli hangu. Handa muntu yoseri pakati penu ama muhenga yoseri yakalikala pakati pa wantu wa Israeli pakalaviya tambiku yakuyi, payiwera tambiku ya kutula naziri ama tambiku ya ntambu hera, 19 su kapati kujimirwa, yomberi hakalaviyi ng'ombi gwashipalu ama mukondolu gwashipalu yakahera shidoda shoseri. 20 Nagulaviya shintu shoseri shashiwera na shidoda toziya hapeni shijimirwi kwa mota yenu. 21 Muntu yoseri pakandavilira neni Mtuwa Mlungu tambiku ya ponga su kujega shilii shagulagiliti ama kulaviya tambiku ya ntambu hera kulawa mushipinga sha wankanyama wakuyi, su kajimilwi yomberi kafiruwa kalaviyi nkanyama muherepa, nkanyama ayu nakawera na shidoda shoseri. 22 Nagundavilira neni Mtuwa Mlungu nkanyama yoseri yakawera lwisi ama shibyeketu ama yakamegekiti pahala ama yakalawa ufira ama yakawera mkita, yakana upeli ama mkita, naguwalaviya kuwera tambiku ya kulunguziwa kwa motu pashitalawanda sha kutambikira sha Mtuwa Mlungu. 23 Ng'ombi gwashipalu ama kondolu yakawera na shiwungu shimu shitali ama shifupi kuliku ntambu yakuyi, guweza kumlaviya tambiku ya ntambu hera, kumbiti nkanyama ayu nagumlaviya kuwera tambiku ya kujega shilii shagulagiliti. 24 Nkanyama ulii upalu wakuyi utenduwa, ama upeshuluwa ama umegeka ama ulikituluwa, nakamu nagundavilira neni Mtuwa Mlungu, nagutenda shitwatira sha tambu ayi muisi yaku. 25 Naguwanka kulawa kwa wahenga nkanyama gwa ntambu ayi na kundavilira neni Mlungu gwaku kuwera shiboga. Wankanyama awa wawera na shidoda toziya walikitulwa na hapeni wajimilwi kwa mota yenu.

26 Mtuwa Mlungu kamgambiriti kayi Musa, 27 mwana gwa ng'ombi ama kondolu gwashipalu pakayiwuka hakasigali na mawu gwawu kwa mashaka saba. Kumbiti kwanjira lishaka lya nani hakawezi kundavilira neni Mtuwa Mlungu kuwera tambiku ya kulunguziwa kwa motu. 28 Kumbiti nagumlikitula ng'ombi ama kondolu lishaka limu pamuhera na mwana gwakuyi.

29 Pagundavilira neni Mtuwa Mlungu tambiku ya mayagashii, haguyilaviyi kwa ntambu yayikutenda gwenga gujimilwi. 30 Nkanyama ayu kafiruwa kaliwi lishaka liraa lilii, namumsigala mkapa shilawu yakuyi mandawira. Neni ndo Mtuwa Mlungu.

31 Su hamuzijimili na kuzitenda amuli zyangu. Neni ndo Mtuwa Mlungu. 32 Namulihigilanga litawu lyangu liananagala, toziya wantu woseri wa Israeli wafiruwa kunguwira neni yawera mnanagala. Neni Mtuwa Mlungu ndo yaniwatenda mwenga wananagala. 33 Neni ndo yaniwalaviyiti mwenga kulawa muisi ya Misri su neni weri Mlungu gwenu. Neni ndo Mtuwa Mlungu.