1 Mtuwa Mlungu kamgambiriti Musa, 2 guwagambiri wantu wa Israeli hangu. Neni ndo Mtuwa Mlungu, Mlungu gwenu. 3 Namtenda ntambu yawatenditi wantu wa Misri kwamulikaliti, namtenda ntambu yawatenditi wantu wa Kanaani kwaniwajega. Namtenda ntambu ya matendu gawu. 4 Mwenga mugajimili malagaliru gangu na mtendi ntambu yaniwalagalira. Neni wera Mtuwa Mlungu gwenu. 5 Handa pagujimira na kugatenda malagaliru gangu, hagwendereyi kulikala mushaka shitali. Neni Mtuwa Mlungu yanikulagira aga gwenga.

6 Neni Mtuwa Mlungu yandagalira malagaliru aga. Muntu yoseri nakagonja na mlongu gwakuyi.

7 Nagumsoniziya tati gwaku kwa kugonja na mawu gwaku yakakwiwuliti. Nagumsoniziya mawu gwaku mweni.

8 Nagugonja na mdala yoseri gwa tati gwaku toziya hagumsoniziyi tati gwaku.

9 Nagugonja na dada gwaku, pamonga dada gwaku gwa kwiwuka ama dada gwaku gwingi.

10 Nagugonja na mzukulu gwaku, mwana gwa mwana gwaku mpalu ama mwana gwa muhinga gwaku, toziya hagulisoniziyi gamweni.

11 Nagugonja na muhinga yakiwulitwi na mawu gwaku gwa kambu, toziya yomberi dada gwaku.

12 Nagugonja na shangazi gwaku, tembera yomberi dada gwa tati gwaku toziya mawu gwawu yumu.

13 Nagugonja na dada gwa mawu gwaku, toziya yomberi mawu gwaku mkulu ama mpusu.

14 Nagugonja na mdala gwa tati gwaku mkulu ama mpusu, toziya yomberi mawu gwaku.

15 Nagugonja na mdala gwa mwana gwaku mpalu, toziya yomberi mikamwana gwaku.

16 Nagugonja na mdala gwa kaka ama mpusu gwaku, pagutenda hangu hagumsoniziyi kaka ama mpusu gwaku.

17 Nagugonja na muhinga ama mzukulu gwa mdala gwaku. Womberi wawera walongu wakuyi, pagugonja nawu hagutendi vidoda vikulu.

18 Nagumyuga dada gwa mdala gwaku, mdala gwaku pakawera kankali mkomu, ntambu ayi hayitendi womberi wasingani.

19 Nagugonja na mdala yakawera mukusuma mwazi.

20 Nagugonja na mdala gwa wapakwegera gwaku, pagutenda hangu hagulitendi muhumba gamweni.

21 Naguwalaviya wana waku woseri walii kuwera tambiku kwa mlungu Moleki toziya pagutenda hangu hagulihigirangi litawu lyangu neni Mlungu, Mlungu gwaku.

22 Nagugonja na mpalu muyagu, shitwatira ashi shiwera shikalaliru.

23 Nagugonja na nkanyama su nagulitula kuwera muhumba. Mdala ama mpalu yoseri nakashitenda shitwatira ashi, pakatenda hakalitendi mweni kuwera muhumba.

24 Namulitenda kuwera wahumba maweni toziya ya vitwatira avi, neni niwawinga wantu wa isi yawawera kulongolu kwa mwenga waweriti wahumba. 25 Womberi watenditi isi yawu iweri humba, su neni niwatoziti kwa vidoda vyawu na isi iwalemiti womberi. 26 Kumbiti mwenga pamuhera na wahenga yawalikala pakati penu, mfiruwa kugajimira malagaliru na amuli zangu, namtenda vitwatira avi neni Mtuwa Mlungu vyavinkalalira. 27 Makalaliru aga wagatenditi wantu yawalikaliti muisi ya Kanaani pamberi pa mwenga, womberi wayituliti humba isi. 28 Su mwenga namtenda vitwatira avi, pamuvitenda vitwatira avi isi hayiwalemi mwenga ntambu yayiwalemiti wantu walii yawalikaliti pamberi pa mwenga.

29 Wantu woseri yawafira kutenda vitwatira avi vya kukalaziya, hawatulwi gweka kulawa kwa wantu wawu. 30 Mugajimili weri goseri ganiwalagalira, namulihumba weni kwa kutenda vitiba vya makalaziwu ntambu yawatenditi wantu yawalikaliti muisi pamberi pa mwenga, namwiza kulitenda wahumba. Neni ndo Mtuwa Mlungu, Mlungu gwenu ulii yakalagalira vitwatira avi.