1 Mtuwa Mlungu kamgambiriti Musa, 2 gumgambiri Aruni na wana wakuyi na wantu woseri wa Israeli malagaliru aga. 3 Handa muntu yoseri pakati pa wantu wa Israeli pakamlikitula ng'ombi ama mwana gwa kondolu ama mbuzi, mulugonjeru ama kunja kulugonjeru kundavilira tambiku, 4 badala ya kumjega nkanyama ayu pakwegera na ligomi lya Liringu Linanagala kumlavilira tambiku Mtuwa Mlungu, muntu ayu hakaweri na likosa lya kwita mwazi, kita mwazi na hakatulwi gweka kulawa kwa wantu wakuyi. 5 Nfiru ya lilagalliru ali kuwera wantu wa Israeli badala ya kulaviya tambiku mumalambu, womberi hawalaviyi tambiku kwa kuwajega wankanyama kwa watambika pakwegera na ligomi lya Liringu Linanagala, ayi hayiweri tambiku ya ponga. 6 Su mtambika hakagumishili mwazi pashitalawanda sha kutambikira shashiwera pakwegera na ligomi lya Liringu Linanagaala na kulilunguziya lipaki lilii liweri ununkira uherepa wa kuherepeziya neni Mtuwa Mlungu. 7 Wantu wa Israeli hawaleki kulaviya tambiku kwa vinyagu vyawavinyawiti gambira mbuzi, shitwatira sashiwatenda womberi waleki uaminika kwawu weni. Lilagaliru ali liwera lya mashaka goseri muviyiwuku vyawu vyoseri.

8 Guwagambiri wantu wa Israeli kuwera muntu yoseri pakati pa wantu wa Israeli ama muhenga yakalikala pakati pawu yakalaviya tambiku ya kulunguziya ama tambiku yoseri ilii 9 kumbiti kayijega ndiri pakwegera na ligomi lya Liringu Linanagala kumlavilira Mtuwa Mlungu, muntu ayu hakatulwi gweka kulawa kwa wantu wakuyi.

10 Handa muntu yoseri gwa shipinga sha Israeli ama muhenga yakalikala pakati pawu pakaliya mwazi goseri gulii, neni hanimlemi muntu ayu yakaliyiti mwazi na hanimtuli gweka kutali kulawa kwa wantu wakuyi. 11 Hayiweri ntambu ayi toziya ukomu wa shiwumbi uwera mumwazi. Niwalagalira kugulaviya mwazi pashitalawanda sha kutambikira su kuwakolaniziya mawoku na neni kwajili ya makaliru genu maweni, toziya mwazi guwakolaniziya mawoku mumakaliru ga wantu. 12 Ndo mana niwalagalira wantu wa Israeli ama muhenga yakalikala pakati penu nakaliya mwazi.

13 Muntu yoseri gwa Israeli ama muhenga yakalikala pakati penu pakagenda kugomiziya nkanyama ama mpongu, yomberi kafiruwa kiti mwazi gwa shilii shakagomiziyiti na kugugubika mulitapaka. 14 Toziya makaliru ga shiwumbi gamumwazi. Ndo mana nuwalagalira wantu wa Israeli, nawaliya mwazi gwa shiwumbi shoseri toziya ukomu wa shiwumbi ndo mwazi gwakuyi. Yoseri yakaliya mwazi hakatuluwi gweka.

15 Muntu yoseri yakawera mwenikaya ama muhenga, yakaliya shoseri shashifuwiti sheni ama shashilagitwi na nkanyama gwa kuntundu, su kagululi nguwu zakuyi na kogi mashi na hakaweri muhumba mpaka pamihi, shakapanu hakaweri muherepa. 16 Kumbiti pakazigulula ndiri nguwu zakuyi na koga mashi, muntu ayu yagamlawira hagaweri gakuyi mweni kwa shilii shakatenditi.