1 Mtuwa Mlungu kamgambiriti Musa, 2 guwashemi Aruni pamuhera na wana wakuyi wizi kuligomi lya Liringu Linanagala kulongolu kwa neni, watoli nguwu zawu nanagala na lipaki lya kutyeka na ng'ombi gwa kulaviya tambiku ya kuwusiya vidoda na wakondolu wawili washipalu na lijamanda lya mabumunda yagalekerwa ndiri simika. 3 Shakapanu guwajojonili wantu woseri wa Israeli wizi kulongolu kwa ligomi lya Liringu Linanagala.

4 Su Musa katenditi ntambu yakalagaliritwi na Mtuwa Mlungu, yomberi kawajojoniriti wantu woseri wa Israeli kulongolu kwa Liringu Linanagala. 5 Musa kawagambiriti wantu woseri wa Israeli hangu, "Shitwatira ashi Mtuwa Mlungu kashilagalira shitendeki."

6 Shakapanu Musa kawajegiti Aruni pamuhera na wana wakuyi, kawagulula kwa mashi. 7 Su kamvalisiyiti Aruni lihabiti na kumtawa lufunga mushunu shakuyi, shakapanu kamvalasiya lihabiti na shipandi sha nguwu sha kugubika luwavu. Kamtawiti mushunu shakuyi lufunga lwalukolaniziwitwi na shipandi sha nguwu ashi shashipotitwi weri. 8 Shakapanu kashitula shihaku pashifuwa sha Aruni na mushihaku ashi yomberi katuliti mabuwi mawili ga kutoza yagashemwa Urimu na Sumimu. 9 Kamvalasiya Aruni shilemba mumtuwi mwakuyi, uwega wa kulongolu wa shilemba katuliti lilembiziwu lya zahabu, lijenjieri linanagala gambira Mtuwa Mlungu ntambu yakamlagaliriti.

10 Shakapanu Musa katola lipaki lya kutyelemeka na kulityelemeka Liringu Linanagala pamuhera na vintu vyakuyi vyaviweriti mkati mwakuyi na kavityeka. 11 Yomberi kamishiriti lipaki pashitalawanda malasaba, kavityelemekiti na vyombu vyakuyi vyoseri na libeseni pamuhera na shikaliru shakuyi, vyoseri kavityekiti. 12 Viraa virii Musa kamiminiriti lipaki lya kumtyelemeka pamtuwi gwa Aruni na kumtyeka. 13 Shakapanu Musa kawajegiti wana wa Aruni na kuwavalisiya lihabiti na kuwatawa lufunga muvyunu mwawu na kuwavalisiya kofia ntambu yakalagaliritwi na Mtuwa Mlungu.

14 Su Musa kamjegiti ng'ombi ulii gwashipalu gwa tambiku ya kuwusiya vidoda, Aruni pamuhera na wana wakuyi watuliti mawoku gawu pamtuwi gwa ng'ombi ulii. 15 Musa kamlikituliti ng'ombi ulii, kagutoliti mwazi kagatyelemekiti magoli ga shitalawanda sha kutambikira wega zoseri kwa shyala shakuyi kushipunga. Shakapanu kagutoliti mwazi yagusigaliti kagwitila pasi pa shikaliru sha shitalawanda sha kutambikira. Su kwanjira ayi yomberi kashityekiti shitalawanda sha kutambikira. 16 Viraa Musa katoliti lipaki lyoseri lyaliweriti mumtima mwa ng'ombi ulii na matoga gaherepa na figu zoseri mbili pamuhera na lipaki lyakuyi na kuvilunguziya pashitalawanda sha kutambikira. 17 Kumbiti vinofu vya ng'ombi ulii pamuhera na likuli lyakuyi na mavi gakuyi, yomberi kagavilunguziyiti kwa motu kunja kwa kambi ntambu yakalagaliritwi na Mtuwa Mlungu.

18 Shakapanu Musa kamjegiti kondolu gwashipalu ulii gwa tambiku ya kulunguziwa, Aruni pamuhera na wana wakuyi watuliti mawoku gawu pamtuwi gwa nkanyama ayu. 19 Musa kamlikituliti na mwazi gwa kondolu ulii kagumishiriti wega zoseri za shitalawanda sha kutambikira. 20 Yomberi kamlikitula kondolu ulii vipandi vipandi, su kavilunguziyiti pamuhera na mtuwi na lipaki lyakuyi. 21 Pamberi pa kulunguziya tambiku ilii, yomberi kagululiti kwa mashi matumbu na magulu ga kumbeli na seemu zyamonga za kondolu gwa tambiku ya kulunguziwa. Ayi iwera tambiku yakalavilirwa Mtuwa Mlungu kwa motu, tambiku yaiwera na ununkira wa kumuherepeziya Mtuwa Mlungu. Musa katenditi ntambu yakalagaliritwi na Mtuwa Mlungu. 22 Shakapanu Musa kamjega kondolu gwashipalu yumonga kwajili ya tambiku ya kutyeka. Aruni pamuhera na wana wakuyi watuliti mawoku gawu pamtuwi gwa kondolu ulii. 23 Musa kamlikitula kondolu ulii na kugutola mwazi gwakuyi na kumtyelemeka mulikutu lya kumliwu lya Aruni na mushyala shakuwi shikulu muliwoku lyakuyi lya kumliwu na mushyala shikulu sha muligulu lyakuyi lya kumliwu. 24 Viraa Musa kawajegiti wana wa Aruni, kawaswagiti mwazi mukingu za makutu gawu ga kumliwu na musyala shikulu sha mawoku gawu ga kumliwu na mushyala shikulu sha magulu gawu ga kumliwu. Mwazi gumonga kagumishiriti wega zoseri za shitalawanda sha kutambikira. 25 Shakapanu katoliti lipaki lyoseri, mshira pamuhera na lipaki lyakuyi, lipaki lyoseri lyaligubika utumbu na seemu iherepa ya matoga pamuhera na figu zoseri mbili pamuhera na lipaki lyakuyi na liwondu lya kumliwu lya kondolu ayu gwashipalu. 26 Su mulijamanda lya mabumunda yakakeleritwi ndiri simika, yagatulitwi kulongolu kwa Mtuwa Mlungu, yomberi kalaviyiti libumunda limu lyalilekerwa ndiri simika, libumunda limu lyaliwera na lipaki na liandazi limu, kavituliti vyoseri pavipandi vya lipaki na liwondu lya ligulu lilii. 27 Musa kavituliti vintu virii mumawoku ga Aruni pamuhera na wana wakuyi, su womberi wavinyasuliti kumpindi kulanguziya wankumlavilira Mtuwa Mlungu. 28 Shakapanu Musa kavitoliti kayi vintu virii mumawoku mwawu na kuvilunguziya pashitalawanda sha kutambikira, pamuhera na tambiku ya kulunguziwa. Ayi iweriti tambiku ya kutyekwa, tambiku yayiwera na ununkira wa kumuherepeziya Mtuwa Mlungu, tambiku yayilaviwa kwa motu. 29 Shakapanu Musa kalutola luwavu lulii na kulunyasula kumpindi kulanguziya kankumlavilira Mtuwa Mlungu, seemu ayi ya kondolu ulii gwashipalu gwa kutyekuwa hakaweri gwa Musa ntambu yayilagaliritwi na Mtuwa Mlungu.

30 Musa katola viraa lipaki limonga lya kutyeka na mwazi waguweriti palii pashitalawanda sha kutambikira, kamumishiriti Aruni pamuhera na wana wakuyi, kamishiriti na munguwu zawu.

31 Musa kawagambiriti Aruni pamuhera na wana wakuyi, "Muvipwasiyi vinofu kulongolu kwa ligomi lya Liringu Linanagala, muviliyi pakwegera na ligomi palii pamuhera na mabumunda kulawa mulijamanda lyaliwera na tambiku ya kutyekwa. Mtendi tambu yamlagaliritwi na Mtuwa Mlungu, seemu ayi hawayiliyi Aruni pamuhera na wana wakuyi. 32 Vinofu vyoseri ama mabumunda goseri yagasigala, hagalunguziwi. 33 Hapeni mlawi kunja paligomi lya mdamu gwa Liringu Linanagala kwa shaka shoseri sha mashaka saba, mpaka shaka shenu shakutyekwa pashipera, shaka ashi hashiweri sha mashaka saba. 34 Shilii shatutenditi leru shilagaliritwi na Mtuwa Mlungu su mwenga mlekeziwi vidoda vyenu. 35 Mwenga hamulikali paligomi lya Liringu Linanagala paluwala na pashiru kwa mashaka saba, pamuvitenda ndiri hamuhowi. Vitwatira avi ndagaliritwi na Mtuwa Mlungu." 36 Su Aruni pamuhera na wana wakuyi watenditi kila shintu ntambu Mtuwa Mlungu yakalagaliriti kupitira Musa.