1 Shakapanu Mtuwa Mlungu kamgambiriti Musa, 2 Aga ndo malagaliru ga muntu yakawera na malweli yagawera panshimba mulishaka lya kupungwa kwakuyi. Pakupona yomberi hakajegwi kwa mtambika. 3 Mtambika hakagendi kumlola muntu ulii kunja kukambi. Handa payiwera ungumbula ulii upona, 4 Su mtambika hakalagaliri wantu wajegi wampongu wawili waherepa yawawera wakomu, viraa wajegi shipandi sha mtera gwa mwerezi na sufu nsheri na lutambi lwa mtera gwa hisopu kwajili ya muntu ulii yakagenda kupungwa. 5 Mtambika hakalagaliri wamlikituli mpongu yumu mushiwiga shimu sha mashi ga mbwiru. 6 Shakapanu mtambika hakamtoli mpongu ulii yumonga yakawera mkomu pamuhera na shipandi sha mtera gwa mwerezi na sufu nsheri na lutambi lulii lwa mtera gwa hisopu na kuvijwika vyoseri mumwazi gwa mpongu ulii yakalikitulitwi. 7 Su hakamumishiri mwazi muntu ulii yakapungitwi mala saba, shakapanu hakambweri muntu ulii kuwera kaherepa. Mpongu mkomu ulii hakamleki kagendi zakuyi kumalambu kunja kulushi.

8 Muntu ulii hakazigululi nguwu zakuyi na hakamogi vili zakuyi na kwoga mashi, su yomberi hakaweri muherepa. Pa aga goseri muntu ulii hakawuyi mukambi, kumbiti hakalikali kunja kuliringu lyakuyi kwa mashaka saba. 9 Mulishaka lya saba, yomberi hakamogi kayi vili zakuyi zoseri pamuhera na ndevu na nkope za masu gakuyi. Shakapanu hakagululi nguwu zakuyi na kwoga mashi, su yomberi hakaweri kaherepa.

10 Mulishaka lya nani, yomberi hakajegi wana wa kondolu washipalu wawili yawahera na shidoda shoseri, kilu ntatu za ubumu unama yawuhanganyikitwi na lipaki shikombi shimu shididini kuwera tambiku. 11 Mtambika yakamubwera muntu ayu kuwera kaherepa hakamjegi kulongolu kwa Mtuwa Mlungu pakwegera na ligomi lya Liringu Linanagala pamuhera na vintu vyakavijegiti.

12 Mtambika hakamtoli mwana gwa kondolu gwa shipalu yumu na kumlavilira tambiku ya kuwusiya vidoda pamuhera na lipaki lyaliwera pakwegera kumema lita yimu. Su yomberi hakavinyasuli kumpindi kulanguziya kuwera vya neni Mtuwa Mlungu. 13 Shakapanu hakamlikituli mwana gwa kondolu pahala pananagala, pahala pawalikitulwa wankanyama wa tambiku ya kuwusiya vidoda na tambiku ya kulunguziya. Tambiku ayi ya kuwusiya makosa, ntambu yayiwera tambiku ya kuwusiya vidoda, tambiku ayi hayiweri ya mtambika, hayiweri tambiku nanagala nentu. 14 Mtambika hakatoli seemu ya mwazi gwa kanyama gwa tambiku gwa kuwusiya makosa na kumswaga muukingu wa pasi wa likutu lwakuyi lya kumliwu na shyala shikulu sha liwoku lyakuyi lya kumliwu na shyala shikulu sha ligulu lyakuyi lya kumliwu. 15 Shakapanu mtambika hakatoli shikombi shimu shididini sha lipaki na kulitula mushiganja sha liwoku lyakuyi lya kumshigi. 16 Yomberi hakajwiki shyala shakuyi sha liwoku lya kumliwu mulipaki lilii na kumumishira muntu ulii yakapungwa mala saba kulongolu kwa neni Mtuwa Mlungu. 17 Lipaki lyalisigala mushiganja sha liwoku lyakuyi, hakamswagi muntu ayu yakagenda kupungwa mukingu ya likutu lya kumliwu na shyala shikulu sha liwoku lyakuyi lya kumliwu na shyala shikulu sha ligulu lyakuyi lya kumliwu, pahala palaa palii papalaviwa mwazi gwa tambiku ya kuwusiya makosa. 18 Lipaki lyalisigala hakamswagi muntu ulii pamtuwi. Su mtambika hakamlaviliri tambiku ya kumkolaniziya mawoku kulongolu kwa neni Mtuwa Mlungu. 19 Shakapanu mtambika hakalaviyi tambiku ya kuwusiya vidoda na kumtenda muntu ayu yakapungwa tambiku ya kumkolaniziya mawoku su kumuwusilira uhumba wakuyi. Shakapanu hakamlikituli mwana gwa kondolu gwa tambiku ya kulunguziwa.

20 Mtambika hakalaviyi tambiku ya kulunguziya na tambiku ya viboga pashitalawanda. Su mtambika hakamlaviliri muntu ayu tambiku ya kumkolaniziya mawoku kulongolu kwa neni Mtuwa Mlungu na yomberi hakalekeziwi kuwera pamuhera na wayaguwi.

21 Kumbiti payiwera muntu ayu kawera muhushu, kahera uwezu wa kulaviya vintu avi, su yomberi hakajegi mwana gwa kondolu gwashipalu kaweri tambiku ya kuwusiya makosa, mtambika hakavinyasuli kumpindi kulanguziya viwera vya neni Mtuwa Mlungu kwajili ya kumkolaniziya mawoku. Yomberi hakajegi viraa kilu yimu ya ubumu unama yauhanganyikitwi na lipaki kwajili ya tambiku ya viboga na lipaki shikombi shimu shididini. 22 Viraa hakajegi wankunda wawili ama wana wa teteri wawili, yumu hakaweri kwajili ya kuwusiya vidoda na yumonga hakaweri kwajili ya tambiku ya kulunguziwa. 23 Mulishaka lya nani, muntu ulii hakamjegeri mtambika vintu virii kulongolu kwa ligomi lya Liringu Linanagala kwajili ya kupungwa kwakuyi kulongolu kwa neni Mtuwa Mlungu. 24 Mtambika hakamtoli mwana gwa kondolu gwashipalu gwa tambiku ya kuwusiya likosa pamuhera na lipaki shikombi shimu shididini na kuvinyasula kumpindi kulanguziya viwera vya neni Mtuwa Mlungu. 25 Mtambika hakamlikituli kondolu gwashipalu ulii gwa tambiku ya kuwusiya makosa. Shakapanu hakatoli seemu ya mwazi na kumswaga muntu ulii yakagenda kupungwa muukingu wa pasi wa likutu lyakuyi lya kumliwu na mushyala shikulu shakuyi sha liwoku lyakuyi lya kumliwu na mushyala shikulu shakuyi sha lugulu lyakuyi lya kumliwu. 26 Shakapanu mtambika hakamiminiri lipaki kidogu mushiganja sha liwoku lyakuyi lya kumshigi. 27 Su mtambika hakamumishiri muntu ulii kwa shyala shakuyi sha kumliwu, shyasi shana lipaki lyaliwera mushiganja shakuyi sha kumshigi mala saba kulongolu kwa neni Mtuwa Mlungu. 28 Mtambika hakamswagi lipaki muntu ulii yakapungitwi muukingu wa likutu lyakuyi lya kumliwu na mushyala shikulu shakuyi sha liwoku lya kumliwu na mushyala shikulu sha ligulu lyakuyi lya kumliwu. Hakamswagi pahala palii pakamswagiti mwazi gulii gwa tambiku ya kuwusiya makosa. 29 Lipaki lyalisigaliti mumawoku mwakuyi hakamswagi mumtu ulii pamtuwi pakuyi, su kumlavilira tambiku ya kumkolaniziya mawoku kulongolu kwa neni Mtuwa Mlungu. 30 Shakapanu mtambika hakamtoli yumu gwa wankunda walii ama wateteri wawili shiyasi sha muntu ulii ntambu yakaweziti kujega. 31 Nkunda yumu hakaweri kwajili ya tambiku ya kuwusiya vidoda na yumonga hakaweri kwajili ya kulunguziya. Pamuhera na tambiku ya viboga, mtambika hakamlaviliri tambiku ya kumkolaniziya mawoku kwajili ya ulii yakapungwiti kulongolu kwa Mtuwa Mlungu. 32 Aga ndo malagaliru ga muntu yakawera na ungumbula yakaweza ndiri kulaviya tambiku zilii zyazifiruwa mukupunga.

33 Mtuwa Mlungu kamgambiriti Musa na Aruni, 34 Pamwingira muisi ya Kanaani yang'enda kuwapanani kuwera ya mwenga, neni hantuli ntambu ya uvukuma umeli mngati mwa numba za aku muisi yamgenda kuwera ya mwenga. 35 Su yakawera na numba ayi kafiruwa kamgambiri mtambika ntambu ya ungumbula uwoneka mnumba mwakuyi. 36 Mtambika hakalagaliri vintu vyoseri mngati mwa numba ayi vilaviwi pamberi pa yomberi hakeniyanji kulolalola ulweri, naviza vyoseri kubweruwa kuwera humba. Shakapanu mtambika hakingiri kuilola numba ayi. 37 Hakaloliloli uvukuma awu, handa uvukuma awu uwoneka mushibambaza na ujega madowa ga langi ya kijani ama nsheri na kuwoneka kuwera gapena mngati mwa shibambaza, 38 su mtambika hakalawi kunja kuligomi na kuyitata numba ayi kwa mashaka saba. 39 Lishaka lya saba mtambika hakawuyi na kuilola kayi numba ayi. Payiwera uvukuma awu weneya mushibambaza sha numba ayi, 40 mtambika hakawagambiri mabuwi yagawera seemu ya uvukuma gawusiwi na kwaswa pahala humba kunja kwa kung'onjeru. 41 Lityasiwu lya numba ayi halimapulwi na galii yagamapulitwi hagayasilwi pahala humba kunja kung'onjeru. 42 Shakapanu hawatoli mabuwi gasyayi na kunyawa pahala pawamapuliti na womberi hawatyasiwu kayi.

43 Payiwera uvukuma awu ulawira kayi munumba ayi pawalaviyiti kala mabuwi aga na kukwalambula mhanga gwa sementi na kutyeremeka kayi mhanga gwa sementi, 44 su mtambika kizi kuyilolalola. Payiwera uvukuma weneya mnumba ayi, ama uvukuma wa kuhalabisiya numba, numba ayi ndo humba. 45 Numba ayi ndo mpaka wayibomoli na mabuwi gakuyi, mitera yakuyi na lityasiwu na litapaka lyakuyi vijeguwi pahala humba kunja kwa lushi.

46 Muntu yoseri yakingira mngati mwa numba hayi shaka shoseri ashi shayitatitwi, hakaweri humba mpaka pamihi. 47 Yoseri yakagonja mnumba ayi ama hakaliyi shiboga mnumba amu, mpaka kazigululi nguwu zakuyi.

48 Kumbiti pakingira kala mnumba ayi, mtambika pakawona kuwera uvukuma haweneneyi mnumba pakutyasiwa, su mtambika hakabweri kuwera numba ayi ndo iherepa toziya uvukuma upera. 49 Su kuyipungi numba ayi, yakawera na numba hakajegi wampongu wawili pamuhera na shipandi sha mwelezi, sufu nsheri na lutambi lya hisopu. 50 Mtambika hakamlikituli yumu gwa mpongu mushiwiga shashiwera na mashi ga mbwiru. 51 Hakatoli shipandi sha mwelezi, lutambi lwa hisopu na ubunda wa mibahira ya kondolu msheri pamuhera na mpongu yumonga yakawera mkomu na kuvilekera vyoseri mumwazi gwa mpongu ulii yakalikitulitwi pashiwiga sha mashi ga mbwiru na hakayimishili numba ayi mwazi mala saba. 52 Hangu ndo ntambu hakayipungi numba ayi kwa mwazi gwa mpongu na mashi gaherepa ga mbwiru na mpongu mkomu na shipandi sha mwelezi lutambi lwa hisopu na sufu nsheri ilii. 53 Mpongu mkomu ulii hakamleki kagendi zakuyi kumalambu kunja kulung'onjeru. Hangu ndo ntambu hakayipungi numba ayi, su yeni hayiherepi.

54 Aga gawera malagaliru kuusu ntambu zoseri za upeli, 55 uvukuma mnguwu ama mnumba 56 uvimbi ama liputi ama shipaku shifufu, 57 su kulanguziya shintu shashiwera humba na shashiwera ndiri humba. Ali ndo lilagaliru kuusu ntambu ya uvukuma.