1 Mtuwa Mlungu kamgambiriti Musa, "Guwagambiri watambika, wana wa Aruni kuwera napawera na muntu yoseri pakati pawu yakalitula uhumba kwa kushinkula mawuti ga wantu wakuyi, 2 pamonga pakawera mlongu gwakuyi handa mawu gwakuyi ama tati gwakuyi ama wana wakuyi wapalu na wadala ama kaka gwakuyi 3 ama dada gwakuyi ulii yakawera mlongu gwakuyi, ulii yakayugitwi ndiri. Kwajili ya awa hakawezi kulitula uhumba kwa kushinkula mawuti gawu. 4 Yomberi pakawera mtambika pakati pa wantu wakuyi, su nakalitula uhumba."

5 Watambika nawamoga nvili za mituwi yawu kwajili ya kudaya ama ndevu zawu ama kulihanjahanja munshimba. 6 Womberi hawaweri wananagala kwa neni Mlungu gwawu. Toziya womberi ndo yawalaviya tambiku ilii zyawandavilira handa shiboga kwa neni Mtuwa Mlungu kwa motu. Su womberi waweri wananagala.

7 Mtambika kafiruwa ndiri kayugi mdala yakawera mndiyandiya ama mdala yakawera ndiri luyenja ama mdala yakalekitwi na mpalu, toziya mweni kawera mnanagala. 8 Wantu wamumani mtambika kuwera mnanagala, toziya yomberi ndo yakandavilira tambiku ya viboga neni Mlungu gwenu. Muvimani maweni kuwera wananagala toziya neni Mtuwa Mlungu ndo ulii yaniwatenda mwenga kuwera watambika. Toziya neni ndo mnanagala, ulii yaniwatenda mwenga kuwera wananagala.

9 Muhinga gwa mtambika yoseri yakalitula uhumba kwa kutenda undiyandiya, yomberi hakalunguziwi kwa motu toziya kankumsoniziya tati gwakuyi.

10 Mtambika Mkulu yoseri yakatyekitwi kwa kuswagwa lipaki mumtuwi gwakuyi na kuvala nguwu nanagala za utambika, su nakaleka nvili zakuyi kuwera vuluvulu ama kupapula nguwu zakuyi kudaya. 11 Nakagasegelera mawuti ama kulitula uhumba kwa kwingira pahala mawuti pagawera, ata pagawera ga tati gwakuyi ama mawu gwakuyi. 12 Yomberi nakawuka Muliringu Linanagala na kugenda kulikala na wantu walii yawadaya, toziya yomberi hakalitendi mweni kafaa ndiri kwa lihengu lyakuyi, viraa mekalituli humbi Liringu Linanagala. Neni ndo Mtuwa Mlungu.

13 Mtambika Mkulu kamuyugi mdala luyenja. 14 Yomberi kalekiziwa ndiri kumuyuga mdala mkenja ama mdala yakalekitwi na mpalu ama mdala mndiyandiya, kumbiti kafiruwa kayugi mdala luyenja kulawa kwa wantu wakuyi mweni, 15 su nakiza kuwatenda wahumba wana wakuyi mweni. Neni Mtuwa Mlungu ndo yanimtenda mnanagala.

16 Mtuwa Mlungu kumgambiriti kayi Musa, 17 gumgambiri Aruni hangu. Mwiwuka gwaku yoseri muviyiwuku vyoseri vyaviza, ulii yakawera na shidoda shoseri nakasegelera kundavilira neni Mtuwa Mlungu tambiku yakuyi ya viboga. 18 Muntu yoseri yakawera na shidoda shoseri nakasegelera kundavilira tambiku. Muntu yakawera lwisi ama muntu yakawera shibyeketu ama yakawera na sheni shiharabika ama muntu yakawera na shiwungu shashiwera shitali kuliku ntambu yakuyi, 19 ama muntu yakawera na ligulu ama liwoku lyalitenduwitwi, 20 ama muntu yakamindika mgongu ama muntu mfupi nentu kuliku ntambu yakuyi ama muntu yakawera na masu mabovu ama muntu yakawera na ulweli wa likuli wa nshimba ama muntu yakawera na upeli ama mpalu yakana mbendi. 21 Mwiwuka yoseri gwa mtambika Aruni yakawera na shidoda shoseri nakasegelera kundavilira tambiku za kulunguziwa kwa motu. Toziya yomberi kawera na shidoda, su nakasegelera kundavilira tambiku ya viboga neni Mlungu gwakuyi. 22 Muntu ayu hakawezi kuliya viboga vyawandaviliriti neni, viraa hakawezi kuliya tambiku ya viboga vinanagala na tambiku nanagala nentu ya viboga. 23 Kumbiti nakalisegelera lipaziya lilii ama shitalawanda sha kutambikira toziya kawera na shidoda munshimba mwakuyi, su nakiza kutula uhumba Liringu lyangu Linanagala, toziya neni Mtuwa Mlungu ndo yaniwatenda waweri wananagala.

24 Musa kamgambiriti Aruni na wana wakuyi pamuhera na wantu woseri wa Israeli, vitwatira vyoseri avi.