1 Mtuwa Mlungu kamgambiriti Musa, 2 guwagambiri wana wa Israeli. Mumisambu yaneni Mtuwa Mlungu ilii yayitulitwi, mwenga hamuweri na lijojoniku linanagala. Misambu yantuliti ndo ayi.

3 Hakuweri na mashaka sita ga kutenda lihengu. Kumbiti lishaka lya saba haliweri lishaka lya Kwoyera, lishaka ali haliweri lya lijojoniku linanagala. Namtenda lihengu lyoseri lilii pamulikala, lishaka ali haliweri lya Mtuwa Mlungu.

4 Misambu yangu imonga ya neni Mtuwa Mlungu ilii hamuweri na lijojoniku linanagala, hayitendeki mushaka shashitulitwi.

5 Msambu gwa Pasaka haguweri kwa ligoya lya Mtuwa Mlungu, mshenji paguzyeta mushaka sha lilongu na msheshi mumwezi gwa kwanja. 6 Mulishaka lya lilongu na muhanu, msambu gwa mabumunda yagalekelwa ndiri simika hagwanji. Na kwa mashaka saba hamuliyi Mabumunda yagalekelwa ndiri Simika. 7 Mulishaka lya kwanja lya msambu gulii, haguleki kutenda mahengu gaku na hagujojoniki kunguwira neni. 8 Mukila lishaka lya saba, gwenga haguwajegi wankanyama kuwera tambiku ya kulunguziwa pashitalawanda sha kutambikira. Mulishaka lya saba, hamuweri na lijojoniku linanagala. Namtenda mahengu.

9 Mtuwa Mlungu kamgambiriti kayi Musa, 10 guwagambiri wantu wa Israeli hangu. Pamwingira muisi yang'enda kuwapanana, pambena mabenu gakuyi, hamumjegeri mtambika mabenu gwa kwanja kubenuwa. 11 Mtambika hakaganyasuli kumpindi kulangalira yagawera gangu, yomberi hakandaviliri mulishaka lya Kwoyera su mpati kujimilwa. 12 Lishaka ali pamunyasula kumpindi langalira ya kulaviya ng'anda kulongolu kwa neni hamndaviliri neni Mtuwa Mlungu tambiku ya kulunguziwa ya mwana gwa kondolu gwashipalu gwa shinja shimu yakahera shidoda shoseri. 13 Pamuhera na tambiku ayi, hamulaviyi tambiku ya viboga vya kilu mbili za ubumu unama yawuhangayitwi na lipaki lya mizyetuni, lipaki hamundaviliri neni Mtuwa Mlungu kwa motu, ununkira wakuyi hauherepeziyi. Tambiku yakuyi ya shilandu iwera lita yimu ya divayi. 14 Pamberi pa lishaka ali lya kunjegera neni Mlungu gwenu tambika ayi, mwenga mjimirwa ndiri kuliya mabenu gwa kwanja ga mabenu genu, pagawera mawisi ama gakalangwa ama gabanikwa kuwera mabumunda. Ali liwera lilagaliru lya mashaka goseri muviyiwuku vyenu pahala poseri pamulikala.

15 Kwanjira lishaka pa lishaka lya Kwoyera, lishaka lyamlaviyiti mabenangu ga kwanjana kuganyasula kumpindi kulanguziya gawera gangu, mwenga muwalangi majuwa saba. 16 Guwalangi mashaka malongu muhanu pa mashaka saba ga Kwoyera, shakapanu gwizi kundavilira tambiku ya viboga vya syayi neni Mtuwa Mlungu. 17 Kila muntu hakajegi mabumunda mawili ga tambiku ya kunyasula kumpindi kulanguziya gawera gangu neni Mtuwa Mlungu. Kila libumunda lifiruwa linyawiwi kwa kilu mbili za ubumu unama yawulekelwa simika, ubumu awu hamndaviliri neni Mtuwa Mlungu payiwera tambiku ya mabenangu genu ga kwanja. 18 Pamuhera na aga, hamumlaviyi wana saba wa wakondolu wa shinja shimu, mwana gwa ng'ombi gwashipalu yumu na wana wa wawili wa wakondolu washipalu. Wankanyama awa hawaweri tambiku ya kulunguziwa pamuhera na tambiku ya viboga na tambiku ya shilandu. Ununkira wa tambiku ayi hayiherepeziyi neni Mtuwa Mlungu. 19 Hamulaviyi mbuzi gwashipalu yumu kuwera tambiku ya kuwusiya vidoda na wana wa wakondolu wawili wa shinja shimu kwajili ya tambiku ya ponga. 20 Mtambika hakavinyasuli kumpindi kulanguziya viwera vya neni Mtuwa Mlungu viweri tambika ya kulaviya kwa langiru pamuhera na libumunda lya mabenangu ga kwanja na walii wanakondolu wawili. Vintu avi ndo vinanagala kwa Mtuwa Mlungu vyeni haviweri kwa matenderu ga mtambika hera. 21 Lishaka liraali hamlaviyi libweru lya kuliwona linanagala, namtenda lihegu. Ali ndo lagaliru lya kufata mashaka goseri muviyiwuku vyenu vyoseri, mukaya zyenu.

22 Pagubena mabenangu gaku mlirambu, nakaka nagubena nakamu mpaka mumbaka mwa malambu gaku pota na kuwuya kumbeli kujojonira vyavisigaliti. Haguwalekeri aga wahushu na wahenga. Neni ndo Mtuwa Mlungu, Mlungu gwenu.

23 Mtuwa Mlungu kamgambiriti Musa, 24 Guwagambiri wantu wa Israeli hangu. Lishaka lya kwanja lya mwezi gwa saba hamlitendi lishaka lya kwoyera lyeni gweka, lishaka lya kulihola halibweruwi kwa kugomba talumbeta na kutenda uholuziwu halibweruwi kwa mliru gwa talumbeta na kutenda kuliwona kunanagala. 25 Namtenda lihengu lishaka ali na ndo mpaka mndaviliri neni Mtuwa Mlungu tambiku ya kulunguziwa kwa motu.

26 Mtuwa Mlungu kamgambiriti Musa, 27 Lishaka lya mwezi agu gwa saba ndo lishaka lya ukolaniziwu. Lishaka ali ndo lishaka lya kuwera na mjojoniku mnanagala. Hamoyi kuliya na kulaviya tambiku yawamlavilira Mtuwa Mlungu kwa motu. 28 Namtenda mahengu genu goseri ga ntambu iraayi kwa lishaka ali. Lishaka ali ndo lishaka lya ukolaniziwu, lishaka lya kuwatendera ukolaniziwu kulongolu kwa Mlungu, Mlungu gwenu. 29 Muntu yoseri yakwoya ndiri kuliya lishaka ali ndo mpaka katulwi gweka na wantu wakuyi. 30 Muntu yoseri yakatenda lihengu lishaka ali hanimtenduwi muwamu mwa wantu wakuyi. 31 Namtenda lihengu. Ayi lagalira ya kufata mashaka goseri muviyiwuku vyenu vyoseri na mumakawu genu goseri. 32 Lishaka ali haliweri kwa mwenga Kwoyera ya kwoyelera nakamu lyeni gweka na hamoyi kuliya. Lishaka lya Kwoyera ndo lishaka lya lilongu lya mwezi agu kwanjira pamihi mpaka pamihi papafata.

33 Mtuwa Mlungu kamgambiriti Musa, 34 guwagambiri Waisraeli hangu. Kwanjira lishaka lya lilongu na mhanu lya mwezi agu gwa saba hammutenderi Mtuwa Mlungu msambu gwa visasa kwa shipindi sha mashaka saba. Agu ndo msambu gwa Mtuwa Mlungu. 35 Lishaka lya kwanja lya mashaka saba aga, hamuweri na kuliwona kukulu na namtenda lihengu. 36 Kwa shipindi sha mashaka saba hamlaviyi tambiku zawamupa Mtuwa Mlungu kwa Motu. Lishaka lya nani hamuweri na kuliwona kukulu na kumlavilira Mtuwa Mlungu tambiku ya kulunguziwa. Kuliwona aku ndo kunanagala. Lishaka ali namtenda lihengu.

37 Ayi ndo misambu ya Mtuwa Mlungu yayipangitwi yeni hamubweri kuwera ndo lijojoniku linanagala lya kumlavilira Mtuwa Mlungu. Tambika yazilaviwa kwa moto, tambika za kulunguziwa, tambika za viboga na tambika za vyakulanda, kila yumu mulishaka lyakuyi. 38 Tambika azi ndo pamuhera na zilii za ntambu iraayi, tambika zakutenda mapatanu genu na tambiku zyenu za kushongwa ndiri zamndavilira neni Mtuwa Mlungu.

39 Pa kubena malambu genu hamtendi msambu kwa shipindi sha mashaka saba, Kwanjira lishaka lya lilongu na mhanu lya mwezi gwa saba. Lishaka lya kwanja haliweri lishaka lya kwoyera na mpaka lishaka lya nani. 40 Mulishaka lya kwanja hamtoli mabwajubwaju ga mitera yenu iherepa, ntambi za mitendi, ntambi zyana mihamba mivuwa na ntambi za mitera yayimera mumbeku mlushemba hamnyawi visasa na mwenga hamtendi msambu kulongolu kwa Mtuwa Mlungu, Mlungu gwenu kwa mashaka saba. 41 Kila shinja ndo mpaka mtendi msambu agu kwa shipindi sha mashaka saba kwa ligoya lya Mtuwa Mlungu. Ali ndo lagaliru lya kufata mashaka goseri mviyiwuku vyenu. Hamgutendi mumwezi gwa saba. 42 Kwa shipindi sha mashaka saba hamlikali muvisasa. Wenikaya woseri wa Israeli hawalikali muvisasa mushipindi ashi. 43 Shitwatira ashi hashivimaniziyi viyiwuku vyenu kuwera paniwalaviyiti wambuyi wenu muisi ya Misri, niwatenditi walikali muvisasa. Neni ndo Mtuwa Mlungu, Mlungu Gwenu,

44 Musa kawabwelera Waisraeli misambu ya Mtuwa Mlungu yayipangitwi.