1 Mtuwa Mlungu kamgambiriti Musa, 2 neni numsyagula Bezaleli, mwana gwa Uri, mzukulu gwa Huri gwa likabira lya Yuda, 3 na kumumemiziya rohu gwaneni. Nimpanana uwezu wa gweka wa kunyawa vintu, 4 su kabuni lihengu lya usanii wa kunyawa vintu kwa kutendera madini ga zahabu na madini ga feza na shaba. 5 Nimpanana umana wa kusongola mabuwi ga kulembeziya na kusongola mbawu na umana wa kila ntambu ya ufundi. 6 Viraa numsyagula Oholiabu mwana gwa Ahisamaki, gwa likabila lya Dani, yomberi katendi lihengu pamuhera na yomberi. Ntambu iraa ayi niwapanani uwezu mkulu wantu wamonga kwajili ya mahengu ga ntambu yingi yingi, su wanyawi vintu vyoseri vyandagalira wavitendi, 7 Liringu Linanagala na lisanduku lya ukapitawu lyaliwera na mfiniku yauwera pahala pa kulekeziya vidoda, pamuhera na vyombu vyakuwi vyoseri, 8 shitalawanda na vyombu vyakuwi, shintambi shiherepa sha shikoluboyi shashinyawitwi kwa zahabu iherepa na vyombu vyakuwi, shitalawanda sha kutambikira sha kutumiziya ubani, 9 shitalawanda sha kutambikira sha tambiku za kulunguziwa pamuhera na vyombu vyakuwi vyoseri, libeseni likulu lya mashi pamuhera na shikaliru shakuwi, 10 nguwu nanagala za mtambika Aruni pamuhera na wana wakuyi hawatendi lihengu lya utambika, 11 lipaki lya kutyekuwa na ubani uherepa kwajili ya Pahala Pananagala. Vintu avi vyoseri havinyawiwi kulawirana ntambu yanuwalagaliriti.

12 Mtuwa Mlungu kamgambiriti Musa, 13 guwagambiri wantu wa Israeli hangu, gujimiri malagaliru gangu yanuwalagalira kuusu lishaka lya Kwoyera. Mashaka aga hagawaholiziyi mwenga pamuhera na neni kwa viyiwuku vyenu vyoseri kuwera neni ndo yanuwapunga. 14 Mfiruwa kugajimira malagaliru gangu kuusu mashaka ga Kwoyera toziya womberi wawera wananagala. Muntu yoseri yakaitula uhumba hakalagwi. Na muntu yoseri yakatenda lihengu lyoseri mulishaka ali hakatuluwi gweka kutali kulawa kwa wantu wakuyi. 15 Hamtendi mahengu genu kwa mashaka sita, kumbiti lishaka lya saba haliweri lishaka lya kwoyera, lishaka ali haliweri lishaka linanagala. Muntu yoseri yakatenda mahengu goseri galii mulishaka ali kafiruwa kalaguwi. 16 Su wantu wa Israeli hawaligoheleli lishaka lya Kwoyera muviyuwuku vyawu voseri kuwera lilangaliru lya lipatanu lya mashaka goseri. 17 Shitwatira ashi hashiweri lilangaliru lya mashaka goseri pakati pa wantu wa Israeli na neni, toziya neni Mtuwa Mlungu nyawiti kumpindi na pasipanu kwa mashaka sita, kumbiti lishaka lya saba ndekiti kutenda mahengu, su noyeriti.

18 Mtuwa Mlungu pakamaliliti kuyowera na Musa paligongu Sinai, su kampananiti Musa mabuwi galii mawili Mlungu yakagalembiti mweni malagaliru kwa shyala shakuwi mweni.