1 Mtuwa Mlungu kamgambiriti Musa, "Hanjegi komangu lyamonga limu kwa Falawu pamuhera na wantu wakuyi. Pa aga hakawaleki muwuki, nakaka hakawawingi mwenga woseri. 2 Su vinu muwagambiri wantu woseri wa Israeli, wawaluwi wapakwegera wawu wapalu na wadala, wapananwi vintu vyavinyawiwa kwa madini ga feza na zahabu." 3 Mtuwa Mlungu kawatenditi wantu wa Misri wawapanani ligoya nentu wantu wa Israeli. Mnu ga aga, wakulu wayaguwi na Falawu pamuhera na wantu woseri wamtenditi Musa kuwera muntu mkulu nentu.

4 Shakapanu Musa kamgendiriti Falawu na kumgambira, "Shintu ashi ndo shilii shakatakuliti Mtuwa Mlungu, pashiru leru, hampiti pakati pa isi ya Misri, 5 na hantendi kila shipanta njira kahowi. Awa hawaweri shipanta njira gwaku mpalu na shipanta njira gwa mmanda gwaku mdala yakasyaga mulwala na mwana mpalu gwa kila muntu. Viraa handagi wavipanta njira wa wankanyama waku. 6 Pavilawira avi, wantu woseri wa Misri hawagutangi shiwembu. Viwembu avi havyenilawili na hapeni vilawili kayi. 7 Kumbiti pakati pa wantu wa Israeli hakuweri jii ata wang'ang'a hapeni wabweti! Shakapanu hamuvimani nakaka neni ndo Mtuwa Mlungu, hantuli gweka ntambu yantenda kwa wantu wa Misri na ntambu yantenda kwa wantu wa Israeli." 8 Shakapanu wakulu yawagu woseri hawizi na kukusuntamalira gwenga na kulonga, "Shondi shondi, guwuki muisi ya Misri, gwenga pamuhera na wantu woseri wa Israeli! Pa aga, haniileki isi ya Misri." Su Musa kawukiiti kwa Falawu pakawera na maya.

9 Mtuwa Mlungu kamgambiriti Musa, "Falawu hapeni kawasheri mwenga mushilii shamtamkula. Malawiranu gakuyi kuwera hanjegi makomangu gamonga muisi ya Misri." 10 Su Musa na Aruni watenditi mawuzawuza aga goseri kulongolu kwa Falawu. Kumbiti Mtuwa Mlungu kendereyiti kutenda yomberi kaweri na mtiti na kalemiti kuwalekeziya wantu wa Israeli wawuki muisi yakuwi.