1 Shakapanu Mtuwa Mlungu kamgambiriti Musa, "Gugendi kwa Falawu gwakamgambiri, Mtuwa Mlungu kalonga kuwera guwaleki wantu wangu wawuki su wanguwiri neni kushiwala. 2 Kumbiti pagulema kuwaleka wawuki, su hanikuazibu kwa kuwajega malyuli muisi yaku yoseri. 3 Lushemba lwa Naili ndiri gweka yakuwi halumemi malyuli, kumbiti hawalawi amu na kwiza kila pahala na kwingira mushiwogu shaku na mumsagamu mwaku na mnumba mwa wakulu wayagu na kwa wantu waku na mujiku mwaku na muvyombu vyaku vya kutelekera. 4 Milyuli hawakweni munshimba yaku na munshimba za wakulu wayagu na kwa wantu woseri yawasigariti."

5 Mtuwa Mlungu vilaa kamgambiriti Musa, "Gumgambiri Aruni, gutalapisiyi luhonga lwaku mumawoku mwaku gambira katalapisiya pamishemba na vishemba na pamatanda na guwajegi malyuli wizi muisi yoseri ya Misri." 6 Pagumgambira kala Aruni, yomberi kalitalipisiyi liwoku lyakuyi pamashi goseri, milyuli walawira mumashi na wayigubika isi yoseri ya Misri. 7 Kumbiti wahawi yawatendiiti mawuzauza kwa uhawi wawu, watenditi ntambu iraa ilii, kayi watenditi mnu malyuli wavuwa walawi mumashi kwiza muisi.

8 Shakapanu Falawu kamshemiti Musa na Aruni, kawagambira, "Mumluwi Mtuwa Mlungu su kamusiliri neni pamuhera na wantu wangu milyuli awa. Pakawawusiya kala, neni hanuwaleki wantu wa Israeli wagendi zawu wakamlaviliri tambiku Mtuwa Mlungu." 9 Musa kamwankuliti Falawu, "Neni hawezi kuluwa toziya ya gwenga na wakulu wayagu na wantu waku woseri. Hanimluwi Mtuwa Mlungu kuwawusiya malyuli kulawa mnumba zyenu. Kumbiti malyuli hawasigali mulushemba lwa Naili. Su gung'ambili gufira nduwi ndii."

10 Falawu kamwankula, "Gunduwili shilawu."

Musa kamgambira, "Hantendi ntambu yagutakuliti, shakapanu haguvimani kuwera Mtuwa Mlungu, ndo ulii yatumguwira, ndo Mlungu gwa nakaka na kwahera yakalifana nayu. 11 Malyuli hawawuki kwaku na mnumba zyenu na kwa wakulu wayagu na kwa wantu waku. Hawasigali mulushemba lwa Naili."

12 Su Musa na Aruni wawukiti kwa Falawu. Shakapanu Musa kamluwiti Mtuwa Mlungu kamwusiliri Falawu malyuli woseri yakaijegiti muisi ya Misri. 13 Mtuwa Mlungu katenditi gambira Musa ntambu yakamluwiti. Malyuli woseri yawaweriti mnumba zawu na muluwaga mwawu na mumalambu gawu wafuwiti. 14 Wantu wajojoniriti malyuli woseri yawafuwiti kuwera malundu makulu na isi yoseri inunka. 15 Kumbiti Falawu pakawoniti kuwera ntabisiwu ayi ipera, kanjiti kayi kuwera na mtiti. Su kalemiti kuwajimira Musa na Aruni gambira Mtuwa Mlungu ntambu yakatakuliti.

16 Shakapanu Mtuwa Mlungu kamgambiriti Musa, "Gumgambiri Aruni katapilisiyi luhonga lwakuyi na kagakomi madika ga litapaka. Na pakatenda hangu, madika ga litapaka hagagalambuki kuwera vinininga muisi yoseri ya Misri." 17 Su womberi watenditi ntambu yawagambiritwi na Mtuwa Mlungu. Aruni kagakomiti madika ga litapaka kwa luhonga lwakuyi, muisi yoseri ya Misri, madika ga litapaka gagalambukiti kuwera vinininga. Vinininga wawayingiriti wantu woseri pamuhera na wankanyama wawu. 18 Wahawi yawatenditi mawuzauza, wajeriti kutenda ntambu iraa ilii kuwajega vinininga kwa uhawi wawu, kumbiti wasinditi. Su vinininga wawayingiriti wantu pamuhera na wankanyama. 19 Wahawi walii wamgambiriti Falawu, "Mlungu ndo yakatenditi aga kwa makakala gakuyi!" Kumbiti Falawu kendereyiti kuwera na mtiti, kawasheriti ndiri Aruni na Musa gambira Mtuwa Mlungu ntambu yakatakuliti.

20 Shakapanu Mtuwa Mlungu kamgambiriti Musa, "Shilawu gwimuki mandawira putiputi gumgenderi Falawu. Guseleli kugenda kulushemba lwa Naili na gumuhepi Falawu. Yomberi pakiza kwoga mashi, gumgambiri, ashi ndo shakatakula Mtuwa Mlungu, guwaleki wantu wangu wawuki, wagendi kunguwira kushiwala. 21 Nukuberiziya kuwera pagulema kuwalekeziya wantu wangu wawuki, hanuwatabisiyi kwa kuwajega wamembi wavuwa wingiri kwaku na kwa wakulu wayagu pamuhera na wantu waku. Numba za wantu waku wa Misri hazimemi wamembi. Wamembi hawagubiki pahala pagugoloka. 22 Kumbiti pagalawira aga, hanulutuli gweka mkowa gwa Gosheni yawalikala wantu wangu, wamembi nawawera aku. Kwanjira ayi, haguvimani kuwera neni ndo Mtuwa Mlungu yantenda vitwatira avi panu muisi ayi. 23 Galii gagagenda kuwalawira wantu waku, hapeni galawiri kwa wantu wangu. Na mawuzauza aga hagalawiri shilawu."

24 Mandawira putiputi, Musa kamgambiriti aga Falawu, kumbiti Falawu kalisheriti ndiri. Su Mtuwa Mlungu katenditi ntambu yakalongiti. Kawajegiti wamembi wavuwa mnumba nkulu ya Falawu na mnumba ya wakulu wayaguwi. Isi yoseri ya Misri iharabisiyituwi na wamembi. 25 Shakapanu Falawu kawashemiti Musa na Aruni, kawagambira, "Mwenga wantu wa Israeli muweza kugenda kumlavilira tambiku Mlungu gwenu, kumbiti mlaviyi muisi amu."

26 Kumbiti Musa kamwankula, "Hapeni twenga tutendi hangu," "Toziya hatulaviyi tambiku yaiwera nkalaliru nentu kwa wantu wa Misri. Patutenda hangu, wantu wa Misri hawatukalaliri twenga. Hashi womberi hawatulagi ndiri kwa kutugumanga mabuwi? 27 Twenga tufira kugenda kushiwala mwanja kwa mashaka matatu. Aku hatumlaviliri tambiku Mtuwa Mlungu, ntambu yakatulagaliriti."

28 Su Falawu kalongiti, "Hanuwaleki wantu wenu wagendi kumlavilira tambiku mlungu gwenu aku kushiwala. Kumbiti namgenda kutali nentu. Vinu munduwiri kwa Mlungu."

29 Musa kawankula, "Gumpikaniri weri! Pandawa kwaku hanimluwi Mtuwa Mlungu, hanimluwi kuwera shilawu hakawawusiyi wamembi kwaku na kwa wakulu wayagu na kwa wantu waku. Kumbiti nagunzyanga kwa kuwalewelera wantu wetu kugenda kumlavilira tambiku Mtuwa Mlungu."

30 Shakapanu Musa kawuka kwa Falawu, kagenda kumluwa Mtuwa Mlungu. 31 Mtuwa Mlungu katenditi gambira Musa ntambu yakamluwiti, kawawusiyiti wamembi kulawa kwa Falawu na kwa wakulu wayaguwi na kwa wantu wakuyi. Kwaheriti ata membi yumu. 32 Kumbiti Falawu kaweriti na mtiti mushaka ashi viraa, kawalekeziyiti ndiri wantu wa Israeli wawuki.