1 Kwa kutendera ubunta wa sufu ya buluwu na zambalawu na nsheri, womberi wasoniti nguwu za kulifana za kuvala shaka sha kutendera Pahala Pananagala. Bazaleli na Oholiabu wapotiti nguwu nanagala gambira Mtuwa Mlungu ntambu yakamlagaliriti Musa.

2 Womberi wanyawiti shipandi sha nguwu sha kugubika shifuwa kulawa muubunta gwa langi ya buluu na zambalawu na nsheri na kuilembeziya munguwu mfufu iherepa yaipotituwi. 3 Womberi waiponditi zahabu imonga gambira lishuka na walihanjiti kupata ubunta ubabani na kuupota nguwu mfufu iherepa na kuilembiziya kwa ubunta yaulawirana na mibahira ya kondolu, ubunta langi ya buluu na zambalawu na nsheri. 4 Wanyawiti ngoyi mbili za kutawalira mumakmbi za shipandi sha nguwu sha kugubika shifuwa, wazisoniti mukingu zakuwi mbili. 5 Ngoyi yaipotituwi weri panani pakuwi kutawalira, iweriti shimu shimu na nguwu ayi ya kugubika shifuwa, shinyawituwi kwa nguwu mfufu iherepa na kutuluwa zahabu na ubunta gwa mibahiraya kondolu na kulembiziwa kwa langi ya buluu na zambalawu na nsheri gambira Mtuwa Mlungu ntambu yakamlagaliriti Musa.

6 Shakapanu watandiriti mabuwi ga beyi nkulu gagashemuwa saridoniki na kuvitula muvituliru vya zahabu, vyeni visongolituwi handa muntu ntambu yakasongola shimaniziru,matawu lilongu na mbili ga wana wa Israeli. 7 Su womberi wagatawaliriti mabuwi galii mumakombi mushipandi sha nguwu sha kugubika shifuwa kuwera liholu kwa wana wa Israeli gambira Mtuwa Mlungu ntambu yakamlagaliriti Musa.

8 Mafundi wanyawiti shihaku sha pashifuwa ntambu yawanyawiti nguwu ya kugubika shifuwa, wapotiti nguwu mfufu iherepa kwa zahabu na kuilembeziya kwa ubunta wa langi ya buluu na zambalawu na nsheri. 9 Shihaku ashi upana na utali wakuyi uweriti teratera, sentimita malongu mawili na mbili kwa sentimita malongu mawili na mbili, shakapanu kuiviliga mala mbili. 10 Shihaku ashi shilembiziwituwi mumimstari ya msheshi ya mabuwi ga beyi nkulu, musitari kwa kwanja kuweriti na mabuwi gagashemuwa akiki na topazi na alumasi nsheri. 11 Musitari gwa pili kuweriti na mabuwi gagashemuwa zumaridi na johari ya langi ya samawati na alumasi. 12 Musitari gwa tatu kuweriti na mabuwi ga yasintu na akiki nsheri na ametisu, goseri aga gatulituwi muvituliru vya zahabu, 13 na musitari gwa msheshi kuweriti na mabuwi ga zabalajadi na shohamu na yasipi, goseri gatulituwi muvituliru vya zahabu. 14 Su paweriti na mabuwi lilongu na mbili gagasongolituwi matawu lilongu na mbili ga wana wa Israeli. Mabuwi aga gaweriti gasongoluwa gambira shimaniziru ntambu yashisongoluwa, kila libuwi limu pamabuwi galii gasonguluwa litawu kugolokera makabila lilongu na mbili. 15 Washinyawiriti shihaku shilii sha pashifuwa mikufu ya zahabu iherepa. 16 Wanyawiti vituliru viwili vya zahabu iherepa na peti mbili za zahabu na kuzitula peti azi mukingu mbili za pampindi pa shihaku ashi. 17 Mikufu ayi miwili ya zahabu waitawiti mupeti zilii za shihaku sha pashifuwa 18 na kingu mbili za mikufu ya zahabu wazituliti muvituliru viwili pawazikolaniziya na vipandi viwili vya mumakombi vya shipandi sha nguwu sha kugubika shifuwa, uwega wa kulongolu. 19 Wanyawiti peti mbili za zahabu na wazituliti mukingu mbili za pasi uwega wa mkati mushihaku ashi sha pashifuwa pakwegera na shipandi sha nguwu sha kugubika shifuwa. 20 Shakapanu peti zimonga mbili za zahabu na kuzitula palongolu mukingu pasi pa vipandi vya nguwu ya kugubika shiifuwa, pahala papalikonaziya na mkanda ulii yaupotituwi weri. 21 Watawiti shihaku sha pashifuwa mushipandi sha nguwu sha kugubika shifuwa kushitawalila peti zakuwina shipandi sha nguwu sha kugubika shifuwa shilii kwa ngoyi langi ya buluu, su shihaku shilii nashiyopoka kumbiti shiweri mumkanda yaupotituwi weri gambira Mtuwa Mlungu ntambu yakamlagaliriti Musa.

22 Kanyawiti lihabiti lya kuvala mngati mwa shipandi sha nguwu sha kugubika shifuwa sha langi ya buluu. 23 Lihabiti ali liweriti na lupenyu lya kupitiziya mtuwi mukati, nalu lizyengeteruwa lwiniku lwalupotituwi su naidegeka. 24 Mulwiniku lwa pasi lwa lihabiti nguwu mfufu iherepa yaipotituwi, walembeziyiti malembumalembu ga makomamanga ga langi ya buluu na zambalawu na nsheri. 25 Shakapanu wanyawiti viyoyu vya zahabu na kila pa likomamanga watuliti viyoyu muluwiniku lwa lihabiti. 26 Hazi njuga na komamanga vilifwatitit kuizyengeta ukosi wa lihabiti hali, handa Mtuwa Mlungu ndambu yakamlagaliriti Musa.

27 Shakapanu wawanyawiriti Aruni pamuhera na wana wakuyi mashati ga nguwu mfufu iherepa, 28 shilemba sha nguwu mfufu iherepa na kofia za nguwu mfufu iherepa na kaputula za nguwu mfufu iherepa yaipotituwi 29 na lufunga lwa nguwu mfufu iherepa yaipotituwi kwa ubunta wa langi ya buluu na zambalawu na nsheri kuilembeziya gambira Mtuwa Mlungu ntambu yakamlagaliriti Musa.

30 Su womberi wanyawiti lilembiziwu lya zahabu iherepa kwajili ya lijenjeri linanagala na kulemba panani pakuwi gambira wasongola ntambu yawasongola shimaniziru, "Mnanagala kwa Mtuwa Mlungu." 31 Shakapanu walitawa palongolu pa shilemba shilii kwa ngoyi ya langi ya buluu gambira Mtuwa Mlungu ntambu yakamlagaliriti Musa.

32 Su lihengu lyoseri lya kunyawa Liringu Linanagala liperiti. Wantu wa Israeli wagatenditi goseri gambira Mtuwa mlungu ntambu yakamlagalliriti Musa. 33 Womberi wamjegeriti Musa Liringu Linanagala pamuhera na vyombu vyakuwi vyoseri na vikonyu vyakuwi na fulemu zyakuwi na vikwambikwambi vyakuwi na vikaliru vyakuwi, 34 shifuniku sha lukuli lya kondolu gwa shipalu yaitulituwi langi nsheri na yainyawituwi kwa mibahila ya mbuzi, wamjegiriti lipaziya lya Pahala Pananagala. 35 Lisandiku lya lipatanu, mashera gakuyi na shiti sha kulekiziya, 36 shatalawanda na vyombu vyakuwi vyoseri, mabumunda yagatulitwi kulongolu kwa Mlungu, 37 shintambi sha lumiliku lwa zahabu iyerepa, miliku zakuyi, vyombu vyakuyi vyoseri pamuhera na mapaki toziya ya miliku azi, 38 vitalawanda vya zahabu, lipaki lya kutyelemeka, ubani una nunkira iherepa na lipaziya lya ligomi lya liringu linagagala, 39 vitalawanda vya shaba na wavu wakuyi wa shaba, mashera gakuyi na vyombu vyakuyi vyoseri, bakuli na birika na shikalira shakuyi, 40 mapaziya ga ligeliri, mpanda na vikalira vyakuyi, lipaziya lya ligomi lya ligeleri, ngoyi zakuyi na vikukuwa vyakuyi, vyombu vyoseri vyawafiruwitwi muutenderu wa liringu linanagala, ndo liringu lya kuliwona, 41 na nguwu zoseri yazifumitwi weri nakamu toziya ya utendera wa pahala pananagala, ndo nguwu nanagala za mtambika Aruni na za wana wakuyi toziya ya tendera za utambika. 42 Wantu wa Israeli watenditi lihengu lyoseri handa Mtuwa Mlungu ntambu yakamlagaliriti Musa. 43 Musa kakaguriti kila shintu, kajimira handa watenditi kila shintu handa Mtuwa Mlungu ntambu yakamugambiriti. Hangu Musa kawatekelera.