1 Guwagambiri wantu wanyawi Liringu Linanagala kwa mapaziya lilongu ya nguwu nfufu. Mapaziya aga ganyawiwi kwa nguwu ya langi ya buluu na ya zambarawu na ya nsheri. Mapaziya aga hagugasoni kwa kugalembiziya pisha ya viwumbi virii vyaviwera na mbapatiru. 2 Kila lipaziya haliweri na utali wa futi malongu msheshi na mbili na upana wakuyi hauweri futi sita. 3 Hagugakolaniziyi mapaziya muhanu gaweri shipandi sha kwanja sha lipaziya na mapaziya gamonga muhanu gaweri shipandi sha pili. 4 Hagusoneri vitanzi vya buluu muluwuniku lwa kumbwega mwa shipandi sha lipaziya lya kwanja, viraa hagusoneri vitanzi vyamonga walanga ilaa ilii muluwiniku mwa lipaziya lya pili. 5 Haguvituli vitanzi lilongu muhanu mulipaziya limu na vitanzi vimonga lilongu muhanu kuluseperu lwa lipaziya lya pili, vipandi vyoseri vielekiani. 6 Hagunyawi kulabu muhanu za zahabu su kuwunganishiya virii vya mapaziya, hangu lihema haliweri shintu shimu.

7 Viraa guwagambiri antu wanyawi mifiniku liringu linanagala kwa mapaziya lilongu na limu lyalisonuwa kwa mibayira ya wambuzi. 8 Kila lipaziya haliweri na utali wa futi malongu msheshi na muhanu, upana wakuyi futi sita. Mapaziya aga lilongu na limu hagaweri na shipimu shilaa shilii. 9 Hagusoni kugakolaniziya mapaziya muhanu pamuhera, viraa mapaziya sita gugakolaniziyi pamuhera. Lipaziya lya sita hagulimindi mala mbili kulongolu kwa liringu linnanagala. 10 Shakapanu hagunyawi vitanzi lilongu muhanu mumwiniku mwa lipaziya lya lupereru lya shipandi sha kwanja, na vitanzi lilongu muhanu mmwiniku mwa lipaziya lya shipandi sha pili. 11 Hagunyawi vigoweru malongu muhanu ga shaba na kuziyingiziya muvitanzi malongu muhanu su kuvikolera pamuhera vipandi virii viwili vya mapaziya na kutenda liweri lipaziya limu. 12 Nusu lya lipaziya lyalisigaliti hagulikoweki uwega wa kumbeli wa liringu. 13 Nusu mita ya utali wa mapaziya yagasigaliti haguimindi kugakoweka wega mbili za liringu lyaligubikituwi.

14 Viraa hagunyawi mfiniku umonga wa liringu, mfiniku agu hagunyawiwi kwa lukuli inama lya kondolu gwa shipalu na lukuli inama lya mbuzi.

15 Hagunyawi fulemu za mbawu za mtera gwa mjohoru zyakuvigolusiya kwajili ya Liringu Linanagala. 16 Kila fulemu hayiweri na utali wa mita msheshi na upana wakuyi hauweri sentimita malongu sita na sita. 17 Kila fulemu hashiweri na mbawu mbili zyazisongoka. Mbawu azi zyakukolaniziya haziweri pasi pa kila shizingiti. 18 Gunyawi fulemu ntambu ayi. Fulemu malongu mawili uwega wa kusika kwajili ya Liringu Linanagala, 19 na vikaliru vya madini ga feza, viweri malongu masheshi pasi pa vizingiti avi ishilini, su vikaliru viwili viweri pasi pa fulemu shamonga. 20 Uwega wa kushana mwa liringu linanagala, hagunyawi fulemu za mbawu malongu mawili, 21 vikalilu vyakuwi malongu msheshi, viweri vya madini ga feza, vikalilu viwili viweri pasi pa kila fulemu. 22 Kulongolu kwa Liringu Linanagala, uwega wa kwaguzyeta mshenji, gunyawi fulemu sita. 23 Viraa guwagambiri wantu wanyawi fulemu zimonga mbili, kila yimu muupeleru wakuyi yauwera muliringu linanagala, hayitangi kulikolera Liringu ali kumbeli. 24 Fulemu azi za kumbwega zilekani pasi, kumbiti zilikonaliziyi kwa kumpindi mupeti za kwanja. Fulemu zoseri vya kumbwega zitendwi ntambu iraa ayi su ziweri na pembi mbili. 25 Su hakuweri na fulemu nani pamuhera na vikalilu viwili pasi pa fulemu yamonga.

26 Hagunyawi migomba ya mtera gwa mjoholu, migomba muhanu kwajili ya mbawu za uwega umu wa Liringu Linanagala 27 migomba muhanu kwajili ya uwega umonga wa Liringu Linanagala, migomba muhanu hayiweri kwa fulemu yaziwera uwega wa kushana mwa Liringu Linanagala na migomba muhanu imonga hayiweri uwega wa kusika na migomba muhanu hayiweri mufulemu za kulongolu mwa Liringu Linanagala, uwega wa kwaguzyeta mshenji. 28 Guwagambiri wazitawalili pamuhera mbawu zyazilikolerana pamuhera zyazilawira uwega wa kushana na kusika na kwaguzyeta mshenji upeleru wumu na upeleru umonga mwa Liringu Linanagala, 29 Fulemu zoseri haguzityelemeki zahabu na kutulira peti za zahabu zyazikolera migomba ayi, migomba ayi haguyityelemeki zahabu viraa. 30 Hangu hangunyawi Liringu ali kulinganira na mfanu yanukulanguziyiti kuligongu.

31 Hagulipoti lipaziya limonga lya ubunda wa langi ya buluu na zambarawu na nsheri na nfufu yayipotitwi. Lipaziya ali hagulisoni kwa kulilembiziya pisha ya viwumbi walii wakomu yawawera na mbapatiru. 32 Lipaziya ali hagulikoweki mumpanda za msheshi zyazinyawiwa kwa mtera gwa mjohoru na kuzityemeleka zahabu. Mpanda azi haziweri na vikoweru vya zahabu pampindi. Vikalilu vyakuwi haviweri vya madini ga feza. 33 Hagulikoweki lipaziya ali muvikoweru, shakapanu gulijegi mkati Llisanduku lya Lipatanu lyaliwera na mabuwi galii mawili, kumbeli kwa lipaziya ali. Mkati mwa Liringi Linanagala, lipaziya ali halituli gweka Pahala pananagala na Pahala nanagala netu. 34 Gutuli mfiniku yagushemuwa pahala pa kulekeziya vidoda, pampindi pa Lisandiku lya Lipatanu Pahala pananagala nentu. 35 Pahala pananagala hagutuli shitalawanda sha mabumunda mananagala uwega wa kushana, viraa hagutuli shintambi sha vikoluboyi pakwegera na shitalawanda uwega wa kusika Liringu Linanagala. 36 Guwagambiri womberi wanyawi lipaziya litopa lya ligomi lya Liringu Linanagala. Hawanyawi kwa ubunta wa langi ya buluu na zambarawu na nsheri na nfufu na kusonwa weri. 37 Viraa virii hagunyawi mpanda muhanu za mtera gwa mjohoru na kuzityemeleka zahabu. Mpanda azi haziweri na vikoweku vya zahabu, kila mpanda hayiweri na shikalilu sha madini ga feza.