1 Mjimiri shilii shakalagaliriti Mtuwa Mlungu, wantu woseri wa Israeli walawiti kushiwala lwalushemuwa Sini. Womberi wagenditi mwanja kulawa pahala pamu kugenda pahala pamonga. Waomberi wagonjeriti mwanja pahala papashemuwituwi Repihidimi, kumbiti pahala palii kuweriti kwahera mashi ga kuranda. 2 Su wantu wamuhinginikiiti Musa pawalonga, "Gutupanani mashi ga kulanda."

Musa kawakosiya, "Iwera ashi mwankuhinginikiya neni? Iwera hashi mwankumjera Mtuwa Mlungu handa kawera na makakala ga kuwapanana?" 3 Kumbiti wantu woseri waweriti na kwimuluwa, wendereyiti kumuhinginikiya Musa. Womberi walongiti vitwatira avi, "Iwera hashi gutulaviyiti muisi ya Misri? Gutujega panu su twenga pamuhera na wananguta wetu tuhowi toziya kwahera mashi ga kulanda."

4 Su Musa kaluwiti kwa kumlilira Mtuwa Mlungu. Su kalongiti, "Nushimana ndiri shintu shakuwatendera wantu awa! Womberi wakala kunaga kwa kungumanga mabuwi!" 5 Mtuwa Mlungu kamwankuliti Musa, "Guwatoli wakulu wamu wa wantu wa Israeli, muwagambiri wantu wakufati kulugongu lwa Sinai. Gutolu luhonga lulii lwalusyatangiti lushemba lwa Naili. 6 Gupikanili weri! Hangoloki kulongolu kwaku panani pa litalawu likulu mulugongu. Gusyatangi litalawu kwa luhonga lwaku. Pagutenda hangu, wantu hawapati mashi ga kulanda kulawa mulitalawu ali." Womberi pawasokiti palugongu, Musa katenditi ntambu ilii uganu wakulu wa wantu wa Israeli pawalola, mashi galawiti mulitalawu. 7 Musa kapashema pahala palii kwa Shieburaniya "Masa", mana yakuwi gujeri, na "Meriba" mana yakuwi kuhinginika. Yomberi kapananiti litawu ali toziya wantu wa Israeli wamjeriti Mtuwa Mlungu pawalonga, "Hashi, Mtuwa Mlungu kapamuhera natwenga na kaweza kututanga nakaka ama ndala?" Viraa kapananiti litawu Meriba toziya womberi wendereyiti kuhinginika.

8 Shakapanu shiyiwuku sha shipinga sha wantu wa Maleki, shiziti kulikoma ngondu na wantu wa Israeli aku Repihidimi. 9 Musa kamgambiriti Yoshuwa yakaweriti mkulu yumu gwa wantu wa Israeli, "Gusyaguli wapalu gugendi mwakalikomi ngondu na shipinga sha wantu wa Maleki shilawu. Neni hangoloki pashidunda, hanyasuli luhonga Mlungu lyakang'ambiriti njegi." 10 Su Joshuwa katenditi gambira Musa ntambu yakamgambiriti. Yomberi kawatoliti wapalu wamu kulikoma ngondu na shipinga sha wantu wa Maleki. Womberi pawaweriti wankulikoma ngondu, Aruni na Huri pamuhera na Musa wagenditi palugongu, su womberi mewezi kuwona pahala pa ngondu yoseri. 11 Shiweriti shaka shoseri Musa pakalitalipisiyiti liwoku lyakuyi kumpindi, wantu wa Israeli wakankiti, kumbiti pakalisulusuyiti liwoku lyakuyi, wantu wa Maleki wakankiti. 12 Su mawoku ga Musa gatokiti. Aruni pamuhera na Huri walikwegiti libuwi likulu su Musa kalivagiri, womberi wawili wagatalipisiyiti mawoku gakuyi. Kwanjira ayi, womberi wawili waganyasuliti mawoku ga Musa mpaka mshenji paguzyetiti. 13 Su Yoshuwa pamuhera na wapalu yakaweriti nawu, washikomiti ngondu shipinga wa wantu wa Maleki, waitendiriti misumenu yawu kuwadumulanga womberi.

14 Shakapanu Mtuwa Mlungu kamgambiriti Musa, "Gushilembi shitwatira ashi mushintola, shakapanu gushibetuli kwa Yoshuwa. Viraa gulembi kuwera lishaka limu hanushyagamiziyi nakamu shipimga sha wantu wa Maleki." 15 Shakapanu Musa kanyawiti shitalawanda kutambikira sha mabuwi kulii kashipananiti litawu "Mtuwa Mlungu ndo gambira bendera yaneni." 16 Yomberi kalongiti, "Muyinyasuli kumpindi bendera ya Mtuwa Mlungu! Mtuwa Mlungu hakendereyi kulikomanga ngondu na shipinga sha wantu wa Maleki, mashaka goseri!"