1 Shakapanu Mtuwa Mlungu kamgambiriti Musa, "Gwizi kwaneni kulugongu alu, gwenga na Aruni pamuhera na Nadabu na Abiwu wana wa Aruni. Viraa guwatoli wakulu malongu saba wa wantu wa Israeli. Pamuhera mwankali patali kidogu kusoka palugongu, mwenga munguwiri. 2 Musa, hanukulekeziyi gweka yaku kwiza pakwegera na neni. Wamonga yaguwera nawu nawiza pakwegera, wantu wamonga woseri yawasigaliti nawasegelera pakwegera na lugongu alu."

3 Musa kagenditi na kuwagambira wantu woseri kila shintu shakagambirituwi na galii gakalagalirituwi na Mtuwa Mlungu. Wantu woseri wamwankuliti pawalonga, "Twenga hatutendi kila shintu shakatugambiriti na kutulagalira Mtuwa Mlungu." 4 Shakapanu Musa kalembiti kila shintu shakalagalirituwi na Mtuwa Mlungu.

Mandawira shilawu yakuwi, Musa kanyawiti kwa mabuwi pahala pa kutambikira palwanjira lugongu. Viraa yomberi kagagolosiyiti mabuwi lilongu na mbili kulawirana na viyiwuku lilongu na mbili vya Israeli. 5 Shakapanu kawatumiti wantemba wa wantu wa Isaraeli, su womberi walaviyiti tambiku za kulunguziya na kulaviya tambiku ya mwana gwa ng'ombi kuwera tambiku ya ponga kwa Mtuwa Mlungu. 6 Musa katoliti mwazi gumu gwa wankanyama yakawalikituliti na kugutula muviwiga. Na mwazi gwingi kitiriti pashitalawanda sha kutambikira. 7 Shakapanu katoliti shintola shilii shakashilembiti kila shintu shakagambirituwi na Mtuwa Mlungu, su kagabetuliti kwa liziwu, uganu wantu woseri pawapikanira. Su wantu woseri walongiti, "Twenga hatugatendi goseri Mtuwa Mlungu gakatugambiriti. Twenga hatujimiri kila shintu."

8 Su Musa katoliti mwazi gulii gwagusigaliti muviwiga na kuwamishira wantu. Yomberi kalongiti, "Agu ndo mwazi gwa lipatanu Mtuwa Mlungu kalitenditi pamuhera na mwenga pakawapananiti malagaliru aga."

9 Shakapanu Musa na Aruni na Nadabu na Abiwu pamuhera na wakulu malongu saba wa wantu wa Israeli, womberi wakweniti kulugongu, 10 na wamwoniti Mlungu, ulii wantu wa Israeli yawamguwira. Mumagulu gakuyi kaweriti na shintu shashinyawitwi kwa madini ga mabuwi ga beyi nkulu gagashemuwa samawati, ilangalira ndaa gambira lyera paliwera lyahera mahundi. 11 Mlungu kawatenduwiti ndiri wakulu walii wa wantu wa Israeli. Womberi wamwoniti Mlungu, waliyiti na kulanda! Shakapanu womberi woseri waseleriti kulawa kulugongu.

12 Su Mtuwa Mlungu kamgambiriti Musa, "Gwizi kwaneni kayi palugomgu alu. Paguwera uganu, hanikupanani mabuwi mawili gagasonguluwa na mukila libuwi nulilemba malagaliru goseri ganukupanana gwenga kuwafunda wantu wa Israeli." 13 Su Musa kagenditi pamuhera na Joshuwa ntumintumi gwakuyi, kukwena kulugongu kulongolu kwa Mlungu. 14 Yomberi pakawagambiriti kala walii wakulu wa wantu wa Israeli, "Mulikali panu pamuhera na wantu wamonga mpaka pambuya aku! Namulyaluwa Aruni pamuhera na Huri hawaweri pamuheri na mwenga. Muntu yoseri pakawera na shitwatira shoseri, kagendi kwa wantu awa wawili."

15 Musa pakagenditi kulugongu, lihundi ligubikiti lugongu. 16 Ukwisa wa Mtuwa Mlungu usulukiti palugongu na kulugubika kwa mashaka sita. Mulishaka lya saba, Mtuwa Mlungu kamshemiti Musa kulawa pakati pa lihundi. 17 Kwa wantu wa Israeli pawaweriti wankulola palugongu, ukwisa wa Mtuwa Mlungu uweriti gambira motu mkulu gwaguweriti gwankwaka kulii. 18 Musa kingiriti pakati pa lihundi lilii palugongu. Yomberi kaweriti kulii kwa mashaka alubayini.