1 "Mtuwa Mlungu viraa kalongiti, muntu yoseri pakiwa ng'ombi ama kondolu, kamlikitula su kumshuwuza ama kumlaviya tambiku, yomberi hakafiruwi kulipa wang'ombi wamuhanu kwa ng'ombi ulii yakamwiwiti na hakalipi wakondolu wamsheshi kwa kondolu ulii yakamwiwiti. 2 Mwivi pakabatwa kankubomolanga numba ya muntu pashiru, handa muntu ulii yakambatiti pakamlaga, ulii yakamlagiti hapeni kaweri na likosa. 3 Kumbiti aga pagalawira paluwala, ulii yakamlaga mwivi hakaweri na likosa lya kulaga. Mwivi mpaka kalipi shilii shakiwiti. Handa yomberi pakahera nkanyama gwa kulipa, su hawamshuwuzi kwa muntu gwingi kaweri mmanda, mpiya zyawapatiti hawazilipi kwa ulii yawamwiwiriti. 4 Handa nkanyama yawamwiwiti kankali mkomu, ng'ombi ama kondolu, su yomberi kafiruwa kalipi nkanyama wawili kwa nkanyama ulii yakamwiwiti."

5 "Handa muntu yoseri pakawalekeziya wankanyama wakuyi waliyi mahamba mulirambu lyakuyi, ama mulirambu lya mizyabibu, pakawalekeziya wingiri mulirambu lya muntu gwingi, yomberi hakalipi vintu viherepa vya mulirambu lyakuyi mweni ama mizyabibu yakuyi.

6 Muntu pakapamba motu na pagulunguziwa mitera ya misontu na pagulipalasiya mpaka kulunguziya mboku za viboga ama viboga vya muntu yumonga vyeni havenebenangwi ama lilambu loseri lilungulira. Muntu yakagupambiti motu agu, kafiruwa kalipi asara yoseri ayi."

7 "Handa muntu pakampanana muyaguyi mpiya ama vintu vyaviwera na beyi nkulu kamtulili, shakapanu pawaviwa mnumba mwakuyi, na mwizi pakawoneka kafiruwa kalipi samani yakuyi mara mbili. 8 Kumbiti mwivi pakawonekana ndiri, yakana numba hakasegeleri kulongolu kwa Mlungu su kutakula handa kiwa ndiri lunda ya muyaguyi."

9 "Papawera na likakatala kuusu ng'ombi ama nkanyama punda ama kondolu ama nguwu ama shintu shoseri yashihowiti sheni kila yumu kashonga ndo shakuyi, weni hawajegwi kulongolu kwa Mlungu. Ulii mweni Mlungu hakalongi kakosa, hakamlipi myaguwi mala mbili."

10 "Handa muntu pakampanana muyaguwi ng'ombi ama nkanyama punda ama kondolu ama nkanyama yoseri ulii kamloleleri, wankanyama walii pawahowa ama kutenduwa ama pawatoluwa pota na yoseri kuwona, 11 shakapanu ulii yakapananitwi kuwalolera wankanyama walii, hakalirapi pahala pa kumguwira mlungu, uganu pakavimana Mlungu kankupikanira kuwera yomberi kiwiti ndiri wankanyama walii. Paiwoneka kuwera yomberi kiwiti ndiri wankanyama walii, ulii yakawera na wankanyama kajimiri kuwera muntu ulii kalonga unakaka, su hapeni kamlipi ulii yakawera na wankanyama. 12 Kumbiti muntu ulii yawampananiti wankanyama walii pawamwiwira, su yomberi hakamlipi ulii yakawera na wankanyama. 13 Handa yomberi kalonga kuwera nkanyama kalaguwa na nkanyama gwa kuntundu, su hakavijegi vinofu vyavisigariti vya nkanyama ulii na kumlanguziya ulii yakawera na nkanyama, shakapanu ulii yawampananiti kawaloleri hapeni kamlipi shoseri ulii yakawera na wankanyama."

14 "Muntu pakamuwanda nkanyama kwa muyaguwi, na nkanyama ulii katenduwa ama kufuwa uganu yakawera na nkanyama kawera ndiri palii, su ulii yakamuwanditi nkanyama hakamlipi ulii yakawera na nkanyama. 15 Kumbiti ulii yakawera na nkanyama pakawera palii uganu nkanyama wakuyi katenduwa na kufuwa, hapeni wamlipi shoseri. Payiwera nkanyama ulii kawanditwi kwa kumlipira mpiya, su yomberi hakajimiri mpiya za kutulila uwanda kwa nkanyama ulii."

16 "Muntu pakamtongoza muhinga luyenja yakahetituwi ndiri, yomberi kafira kamuyugi ama kagonji nayu, su hakamposi na hakaweri mdala gwakuyi. 17 Tati gwa muhinga ayu pakalema nakamu muhinga gwakuyi kayuguwi na muntu ayu, tati ayu hakawuziyi posa ilii."

18 "Nagumleka mdala muhawi kalikali."

19 "Kalaguwi muntu yoseri yakagonja na nkanyama."

20 "Muntu yoseri yakalaviya tambiku kwa mlungu yumonga badala ya kumlavilira Mtuwa Mlungu, yomberi hakalagwi."

21 "Namumtabisiya muhenga ama kumgaziya, toziya mwenga viraa muweriti wahenga muisi ya Misri. 22 Nagumgaziya mkenja ama mwana mshiwa. 23 Handa pamuwatabisiya womberi na pawandilira, hanuwapikaniri. 24 Neni haweri na maya kwa mwenga, su hantendi mwenga mulaguwi mungondu. Na wadala wenu hawaweri wakenja, viraa wana wenu hawaweri wahera tati."

25 "Muntu muhushu pakati pa wantu wangu pakawanda mpiya kwaku, gwenga naguwera gambira muwandira mpiya, nagufira mpiya zaku pamuhera na mota yakuwi. 26 Handa muyagu pakakupanana nguwu yakuwi poni, gwenga gufiruwa guyiwuziyi pamberi pa mshenji kuzyeta, 27 toziya yomberi kayifira nguwu imgubiki nakawona mpepu pashiru. Nguwu ayi ndo ya gweka hera kuwera wantu wahushu wawera nazi pawagonja pashiru."

28 "Naguntakulira neni makontola, ama kuwapangila mkulu gwa wantu waku."

29 "Nagukawa kujega viboga vya kwanja kukamala vyaguvibeniti pamuhera na divayi yaku."

"Hagumlaviyi mwana gwaku mpalu shipanta njira kaweri kwajili ya neni. 30 Ntambu iraa ayi, hagumlaviyi shipanta njira waku wa shipalu wa wang'ombi na wakondolu waweri kwajili ya neni. Wankanyama awa pawiyuka kala, guwaleki walikali na wankyanyama wamawu wawu kwa mashaka saba. Mulishaka lya nani, guwalaviyi kwaneni kuwera tambiku."

31 "Mwenga mwawantu wangu wananagala. Su namuliya vinofu vya nkanyama yakalagwiti na nkanyama mkalipa gwa kuntundu, mwenga vinofu avi mumwasilili ng'ang'a kaliyi."