1 Mtuwa Mlungu kamgambiriti Musa, "Gugendi kayi kwa Falawu. Neni nimtenda kaweri na mtiti pamuhera na wakulu wayaguwi. Su ntenda hangu mpati kulanguziya mawuzawuza ga kutiliziya pakati pawu, 2 na mwenga viraa mpati kuwatambira wananguta wenu na wazukulu wenu, mawuzawuza ga kutiliziya gantenditi kwa wantu wa Misri. Shakapanu mwawoseri mwenga hamuvimani kuwera neni ndo Mtuwa Mlungu, Mlungu yakawera na makakala goseri."

3 Su Musa na Aruni wamgenderiti Falawu kuliboma lyakuyi na wamgambira, "Mtuwa Mlungu, Mlungu yawamguwira Waeburaniya, kalonga hangu, haguleki ndii kuwera na mtiti kwa kugalema galii gantakula na gwenga? Guwaleki wantu wangu wawuki, wagendi kushiwala kunguwira! 4 Pagwendereya kulema kuwalekeziya womberi kuwuka, nukuberiziya kuwera shilawu hanuwajegi wanjombi muisi yaku. 5 Wanjombi hawaigubiki isi yoseri, su gwenga hapeni guwezi kuwona litapaka lya isi. Hawaliyi kila shintu shashisigaliti mukugwamiziya kwa nvula ya mabuwi. Hawaliyi kila shintu shashisigaliti mumitera yaiweriti yankwenderya kukula. 6 Wanjombi hawaguluki mnumba zaku na mnumba za wakulu wayagu na mnumba za wantu woseri wa Misri. Hawaweri wanjombi wavuwa nentu, gwenga ama walera waku ama wambuyi waku hawenipati kuwawona kwanjira kuwera kwa isi ayi mpaka vinu.’" Su Musa kalawa kwa Falawu, kawukiti pakawera na Aruni.

7 Wakulu wayaguwi na Falawu, wamgambiri Falawu, "Hashi muntu ayu hakendereyi kutugaziya mpaka ndii? Muwaleki wantu wa Israeli wagendi zawu kumguwira Mtuwa Mlungu, Mlungu gwawu. Hashi, gwenga guyambura ndiri kuwera muntu ayu kayiharabiya Misri?" 8 Su womberi wawashemiti Musa na Aruni kwiza kwa Falawu. Falawu kawagambiriti, "Vinu muweza kugenda kumguwira Mtuwa Mlungu gwenu. Kumbiti gaa hakagendi pamuhera na mwenga?" 9 Musa kamwankula, "Kila muntu, wantemba na wazewi, hatuwuki na wananguta wetu wapalu na wadala, wakondolu na wambuzi na vipinga vya wang'ombi wetu, toziya tufiruwa kutenda msambu kumgohelila Mtuwa Mlungu."

10 Musa kavimaniti kuwera wantu wa Israeli hapeni wawuyi nakamu muisi ya Misri, vulaa Falawu kavimaniti hapeni wawuyi. Su Falawu kawankula, "Handa mwawoseri pamuwuka, haimaniki paweru kuwera Mtuwa Mlungu kwatanga, kumbiti neni hapeni nuwalekeziyi mwenga muwatoli wananguta wenu pamuhera na wadala wenu kuwuka. Ayi ya paweru, muwera na nfiru kuwera hapeni muwuyi. 11 Su hapeni nuwalekeziyi muwuki. Wantu wapalu wa Israeli muweza kugenda kumguwira Mtuwa Mlungu, ayi ndo ntambu yamfira." Shakapanu Falawu kawawingiti kuliboma lyakuyi.

12 Shakapanu Mtuwa Mlungu kamgambiriti Musa, "Gulitalipisiyi liwoku lyaku kuwashemera wanjombi. Wanjombi hawizi muisi ya Misri na kuliya kila shimeru shashisigaliti mulitapaka, vulaa hawaliyi kila shimeru shilii shashiharabisiwituwi ndiri kwa nvula ya mabuwi."

13 Su Musa kalitalapisiyiti luhonga lwakuyi pa isi ya Misri. Shakapanu Mtuwa Mlungu kajegiti lyega likulu kulawa kwagulawa mshenji. Lyega livumiti pa isi paluwala poseri na pashiru poseri. Paushiyiti mandawira, lyega lii lijegiti wanjombi. 14 Wanjombi waweriti kila pahala muisi ya Misri. Waweriti wavuwa nentu, hawenipati kuwoneka na hapeni walawiri kayi ntambu ayi. 15 Wayigubikira isi yoseri ya Misri na litapaka liwoneka kuwera ntiti. Waliyiti vimeru vyoseri na kila shintu mumitera shashiharabisiwituwi ndiri shaka nvula ya mabuwi paitowiti. Kwahera shimeru shoseri shiwisi shashisigairiti ama mutera goseri, kila pahala muisi ya Misri.

16 Kamukam Falawu kawashemiti Musa na Aruni na kawagambila, "Neni nimtenda vidoda Mtuwa Mlungu, mlungu gwenu, viraa kwa mwenga wawili. 17 Su vinu nuwaluwa munegeziyi mala yimu hera toziya nana vidoda na munduwili kwa Mtuwa Mlungu, mlungu gwenu kunuwusilira magamiziwu aga gagagenda kundaga."

18 Su Musa na Aruni wawukiti kwa Falawu, Musa kagenditi kumluwa Mtuwa Mlungu. 19 Shakapanu Mtuwa Mlungu kagalambuziyiti lyega livumi kulawa kwaguzyeta mshenji. Lyega liwawusiyiti wanjombi walii na kwa waweguliluwa kugenda mubahari ya Shamu. Kuweriti kwahera njombi yoseri yakasigaliti muisi ya Misri.

20 Kumbiti Mtuwa Mlungu kamtenditi Falawu kaweri kayi na mtiti, su kalemiti kuwalekeziya wantu wa Israeli wawuki.

21 Mtuwa Mlungu kamgambiriti Musa, "Gulitalipisiyi liwoku lyaku kulyera, luwindu haliweri muisi yoseri ya Misri, luwindu totoru muntu hakagendi kwa kupapasiya." 22 Su Musa kalitalipisiya liwoku lyakuyi kulyera, luwindu totoru lilawiriti muisi ya Misri kwa mashaka matatu. 23 Wantu waweziti ndiri kuwona kila muntu na muyaguwi. Woseri wasigaliti mnumba zawu mushaka shoseri. Kumbiti ulangala uweriti Gosheni kwawalikaliti wantu wa Israeli.

24 Shakapanu Falawu kamshemiti Musa, kamgambira, "Mgendi mwakamguwiri Mtuwa Mlungu. Wadala wenu pamuhera na wananguta wenu waweza kugenda pamuhera na mwenga. Kumbiti vipinga vya wakondolu wenu na wambuzi na vipinga vya wang'ombi wenu havisigali panu." 25 Kumbiti Musa kamgambira, "Ndala, gwenga gufiruwa gutulekeziyi tutoli wakondolu pamuhera na wambuzi, su twakamlaviliri tambiku Mtuwa Mlungu, Mlungu gwetu. 26 Wankanyama wetu hawagendi pamuhera na twenga, hapeni tumleki ata yumu gwawu kumbeli. Hatuwatoli wankanyama wetu kugenda kumguwira Mtuwa Mlungu. Hapeni tummani nkanyama gwa kulaviya tambiku mpaka patusoka kulii patugenda."

27 Kumbiti Mtuwa Mlungu kamtenda Falawu kendereyi kuwera na mtiti, kawalekeziya ndiri wantu wa Israeli wawuki. 28 Falawu kamgambiriti yomberi, "Guwuki paulongolu paneni. Nagwiza panu kayi nagwiza kundola! Lishaka pagwiza kundola neni kayi, hanukulagi!"

29 Musa kamwankula, "Yina! Hapeni nizi kayi kwa gwenga."