1 Aga ndo matawu ga wana wapalu wa Yakobu yawagenditi Misri pamuhera na tati gwawu, pawawera na wadala wawu pamuhera na wana wawu. 2 Womberi waweriti Rubeni na Simiyoni na Lawi na Yuda, 3 Isakari na Zabuloni na Benjamini, 4 Dani na Nafutali na Gadi na Asheri. 5 Wantu woseri yawagenditi pamuhera na Yakobu, waweriti wantu malongu saba. Womberi waweriti wana wakuyi na wazukulu wakuyi pamuhera na wana wawili wa wazukulu wakuyi. Yusufu kaweriti kala muisi ya Misri.

6 Mivinja yaifatiti, Yusufu pamuhera na walongu wakuyi woseri na kila muntu mukaya yawu yakalikaliti mushiyiwuku mushaka shilii, wahowiti. 7 Kumbiti shiyiwuku sha Yakobu shyendereyiti kwiyula wana wavuwa. Mawalanga ga shiyiwuku shyongerikiti nentu. Malawaliranu gakuyi, womberi waweriti wavuwa na waweriti na makakala na waweriti kila pahala muisi ya Misri.

8 Pa mivinja yamonga ivuwa shakapanu, mfalumi gwa syayi kanjiti kukolamlima muisi ya Misri. Yomberi kashimaniti ndiri shilii Yusufu shakatenditi kwa wantu wa Misri pamakashu. 9 Mfalumi kawagambiriti wantu wakuyi, "Mloli shashilawiriti! Wantu wa Israeli wendereya kuwera wavuwa nentu na kuwera na makakala kuliku twenga na vinu wawera hatari kwa twenga. 10 Su tusakuli ntambu ya kuwakolamlima! Patutenda ndiri hangu, walanga yawu hayendereyi kwongoreka nentu. Shakapanu wangondu pawatwizira kutukomanga, womberi hawalikolerani pamuhera na wangondu wetu kutukoma na hawashapiri kulawa muisi yetu."

11 Su mfalumi pamuhera na wakulu wayaguwi watuliti wantu wa kuwagolokera wantu wa Israeli na kuwatenda womberi watabiki nentu kwa kutenda womberi watendi lihengu likamala. Womberi wawatenditi kwa makakala wantu wa Israeli kunyawa lushi mbili, lushi lwa Pitimu pamuhera na lushi lwa Ramesesi, lushi azi ziweriti kwajili ya Falawu mfalumi gwa Misri. 12 Kumbiti ntambu yawawatenderiti madoda wantu wa Israeli, wantu wa Israeli wendereyiti kwongereka nentu na kweneya muisi ilii. Su wantu wa Misri wanjiti kuwatira wantu wa Israeli. 13 Womberi wawatenditi kwa makakala wantu wa Israeli watendi lihengu likamala nentu, 14 wawatenditi womberi waweri wamanda, wawatenditi womberi makaliru gawu gaweri ga hinginiku. Wawatenditi kwa makakala kunyawa numba zivuwa kwa matafali. Viraa wawatenditi womberi watendi mahengu mumarambu. Wawatenditi womberi kutenda lihengu lyoseri, wakulu wa wantu wa Misri wawagolokeriti womberi kwa kuwatabisiya.

15 Kuweriti na wadala wamakolu wawili wa Shiebrania. Yumu kashemwa Shifira na yumonga kashemwa Puwa. Falawu kawagambiriti wadala walii, 16 "Pamuwatanga wadala wa Shiebrania kwiyura wana, pawiyura wana wapalu muwalagi. Handa pawiyura wana wadala muwaleki walikali." 17 Kumbiti wamakolu walii waweriti wantu yawamguwira Mlungu. Su womberi watenditi ndiri shilii shawagambirituwi na Falawu. Womberi wawalekiti wana wapalu walikali. 18 Su Falawu kawashema wamakolu wawili walii, kawakosiya, "Iwera hashi mtenda hangu? Kwa ntambu gaa muwaleka wana wapalu walikali?"

19 Yumu gwa wamakolu walii kamwankula Farao, "Gufiruwa kuvimana kuwera wadala wa Shiebrania wawafira ndiri wadala wa Shimisri. Wadala wa Shiebrania wawera na nshimba zyaziwera na makakala. Womberi wiyula wana pamberi twenga kusoka kuwatanga."

20 Su Mlungu kawapananiti maheri wamakolu walii, wantu wa Israeli wendereyiti kwongereka nentu na kuwera na makakala. 21 Su toziya ya wamakolu awa yawamguwiriti Mlungu, Mlungu kawapananiti womberi viraa kaya zawu weni.

22 Shakapanu Falawu kawalagalira wantu woseri wa Misri, "Mumwasi mulushemba lwa Naili, kila mwana mpalu yakawiyuriruwa kulawa kwa mdala gwa Shiebrania! Kumbiti muweza kumleka mkomu mwana mdala."