1 "Bezaleli na Oholiabu pamuhera na kila muntu yakapananituwi umana na uwezu kuvimana ntambu ya kutenda lihengu lya kunyawa Liringu Linanagala, hakatendi lihengu kulawirana na goseri Mtuwa Mlungu yakagalagaliriti."

2 Musa kamshemiti Bezaleli na Oholiabu na kila muntu yakapananituwi umana na Mtuwa Mlungu, na kila muntu kasoki kutenda lihengu ali. 3 Musa kawapananiti womberi vintu vyoseri vyavilaviwituwi na wantu wa Israeli kwajili ya lihengu lya kunyawa Liringu Linanagala. Hata hangu wantu wendereyiti kulaviya malaviwu gawu kila mandawira. 4 Wantu woseri yawawera na ufundi wa kutenda lihengu lya ntambu yingiyingi lya kunyawa Liringu Linanagala, walawiti na kumgendera Musa, 5 su wamgambiriti, wantu wajega "Vintu vivuwa nentu ya virii vyavifiruwa kwajili ya lihengu lyakatulagaliriti Mtuwa Mlungu tulitendi." 6 Su Musa kalagalira, wantu woseri nawajega malaviwu ng'anji kwajili ya Liringu Linanagala. "Wantu walewelerituwi kujega vintu," 7 toziya virii vyawavijegiti vitoshiti kwa lihengu ali na kusigala.

8 Wapalu woseri yawawera na ufundi wanyawiti Liringu Linanagala kwa mapaziya lilongu ya nguwu mfufu iherepa yaipotituwi lilongu na ubunta wa langi ya buluu na zambalawu na nsheri na kuvilembiziya viumbi vyaviwera na mbapatiru. 9 Utali wa kila lipaziya uweriti meta lilongu na mbili na upana meta mbili. Mapaziya goseri gaweriti na shipimu shimu. 10 Womberi wagakolaniziyiti mapaziya muhanu kutenda shiweri shipandi shimu na kutenda ntambu iraa ayi kwa galii gamonga muhanu. 11 Wanyawiti vikoweku vya buluu muluwiniku mwa lipaziya lwa upeleru lya shipandi sha kwanja, na vikoweku vyamonga mulipazya lya upeleru lya shipandi sha pili. 12 Watuliti vikoweku malongu muhanu mulipaziya lya kwanja lya shipandi sha kwanja na vikoweku malongu muhanu muluwiniku lwa lipaziya lya pili, vikoweku vyoseri vilolaniti. 13 Shakapanu wanyawiti vifungu malongu muhanu vya zahabu su kuvikolaniziya vipandi viwili vya mapaziya, su Liringu Linanagala liwera shintu shimu.

14 Viraa wanyawiti shifiniku sha Liringu Linanagala kwa mapaziya lilongu na yimu kwa mibayira ya mbuzi. 15 Kila lipaziya liweriti na utali wa meta lilongu na ntatu na upana wa meta mbili. Mapaziya goseri lilongu na yimu yaweriti na shipimu shilaa shilii. 16 Su wagakolaniziyiti mapaziya muhanu pamuhera na mapaziya gamonga sita wagakolaniziyiti pamuhera. 17 Shakapanu wanyawiti vikoweku malongu muhanu muluwiniku mwa lipaziya lya upeleru lya shipandi sha kwanja na vikoweku malongu muhanu muluwniku mwa shipandi shamonga. 18 Shakapanu wanyawiti vifungu malongu muhanu vya shaba su kukolaniziya vipandi viwili virii vya mapaziya, su kutenda liweri lipaziya limu lya Liringu Linanagala. 19 Su wanyawiti shifiniku sha likuli linama lwa kondolu gwa shipalu na panani pakuwi wanyawiti shifuniku shamonga sha lukuli linama lwa mbuzi. 20 Womberi wanyawiti fulemu za kuligosiya Liringu Linanagala kwa mbawu za mtera gwa mjoholu. 21 Kila fulemu iweriti na utali wa meta msheshi na upana wa sentimita malongu sita na sita. 22 Kila fulemu iweriti na lulimi mbili za kukolaniziya. Mafulemu goseri wagatuliti lulimi. 23 Fulemu azi za Liringu Linanagala zinyawituwi ntambu ayi, fulemu malongu mawili uwega wa kusika 24 na vikaliru malongu msheshi vya madini ga feza pasi pa fulemu azi malongu mawili, vikaliru viwili pasi pa kila fulemu su kukolaniziya lulimi zakuwi zilii mbili. 25 Wanyawiti viraa fulemu malongu mawili kwa uwega wa kushana mwa Liringu Linanagala, 26 na vikaliru vyakuwi malongu msheshi vya madini ga feza, vikaliru viwili pasi pa kila fulemu. 27 Uwega wa kumbeli wa Liringu Linanagala, uwega wa kwaguzyeta mshenji mwa Liringu Linanagala, wanyawiti fulemu sita. 28 Viraa wanyawiti fulemu mbili zyamonga kwajili ya pembi za Liringu Linanagala uwega wakuyi wa kumbeli. 29 Fulemu azi mbili za kumbwega zikolanizituwi kwanjira pasi mpaka kumpindi mupeti za kwanja. Mpanda mbili kwajili ya pembi azi zinyawituwi ntambu ayi. 30 Su kuweriti na fulemu nani pamuhera na vikaliru vyakuwi lilongu na sita, vikaliru viwili mukila fulemu. 31 Womberi wanyawiti viraa vikoleru vya mtera gwa mjoholu, vikoleru muhanu kwajili ya fulemu za uwega umu wa iringu Linanagala 32 na vikoleru muhanu kwajili ya fulemu za uwega wa kumbeli wa Liringu linanagala, uwega wa kwaguzyeta mshenji. 33 Wanyawiti shikoleru sha mkati yausokiti nusu ya Liringu Linanagala, lupeniti mkati kulawa upeleru umu mpaka upeleru umonga. 34 Fulemu zoseri wazityelemikiti zahabu, wanyawiti na peti za zahabu za kukolera vikoleru avi, wavityemelekiti zahabu viraa.

35 Womberi wanyawiti lipaziya lya nguwu mfufu iherepa yaipotituwi na kulembiziwa kwa ubunta wa langi ya buluu na zambalawu na nsheri. Lipaziya ali lilembiziwituwi weri viumbi vyaviwera na mbapatiru. 36 Wanyawiti fulemu za msheshi za mtera gwa mjoholu, wazityemelekiti zahabu na kuzitulia vikoweru vya zahabu. Viraa virii wanyawiriti vikaliru vya msheshi vya madini ga feza. 37 Kwajili ya ligomi lya Liringu Linanagala, womberi wanyawiti lipaziya nguwu mfufu iherepa yaipotituwi kwa ubunta wa langi ya buluu na zambalawu na nsheri, lipaziya ali lilembiziwituwi weri 38 na fulemu zyakuwi muhanu zyaziwera na vikoweru. Pavikoleru vya mpanda pamuhera na vikwambikwambi vyakuwi wavityemelikiti zahabu, kumbiti vikaliru vyakuwi muhanu viweriti vya shaba.