1 Hagunyawi shintu gambira lisanduku utali na upana uweri teratera kwa mbawu za mtera gwa mjohoru, lyaliwera shitalawanda sha kutambikira. Hashiweri sha pembi za msheshi, utali wakuyi mita mbili na lobu, na upana wakuyi mita mbili na lobu, utali wakuyi kugenda kumpindi hashiweri mita yimu na lobu. 2 Mukila pembi ya shitalawanda ashi, hagunyawi magoli yawunyauwa kulawirirana na shitalawanda sheni. Shitalawanda shoseri hagushityelemeki madini ga shaba. 3 Hagunyawi viwiga vya kutulila malivu na sepetu na mabakuli na mabeseni ga kutolera motu. Vyombu vyakuwi vyoseri haguvinyawi kwa shaba. 4 Shakapanu hagunyawi wavu wa shaba yauwera na peti zyamsheshi za shaba mupembi zyakuwi msheshi. 5 Wavu awu haguwutuli muukingu pasi mushitalawanda sha kutambikira su ufiki nusu ya shitalawanda sha kutambikira. 6 Hagunyawi viraa mipiku ya mtera gwa mjohoru ga kupapira shitalawanda sha kutambikira, mipiku ayi haguityemeleki madini ga shaba, 7 na mipiku ayi guiyingiziyi muzilii peti kila uwega wa shitalawanda sha kutambikira shaka sha kushipapa. 8 Hagunyawi kwa mbawu shitalawanda sha kutambikira, shiweri na livungu mkati, kulawirana na mfanu yagunukulanguziyiti kulugongu.

9 Hagunyawi mdamu gwa liringu Linanagala. Uwega wa kusika wa mdamu hakuweri na vyandaluwa vyavinyawituwi kwa nguwu mfufu iyerepa yayipotituwi, yeni hayiweri na utali wa meta malongu msheshi na msheshi kwa uwega gumu. 10 Mapaziya aga agakoleruwi na mpanda malongu mawili ga shaba, vyaviwera na vikaliru vya shaba. Kumbiti vikwambikwambi vya mpanda azi pamuhera na vikoweku vyakuwi haviweri vya madini ga feza. 11 Ntambu iraa ayi uwega wa kushana, utali wa lipaziya hauweri meta malongu msheshi na msheshi, mpanda zakuwi malongu mawili ga shaba, kumbiti vikwambikwambi vya mpanda na vikoweku vyakuwi haviweri vya madini ga feza. 12 Uwega wa kwaguzyeta mshenji kwa mdamu, hakuweri na lipaziya lyaliwera na utali meta malongu mawili na mbili, mpanda zyakuwi lilongu pamuhera na vikaliru vyakuwi lilongu. 13 Uwega wa kwagulawa mshenji kwakuwera na ligomi, mdamu hauweri na upana wa meta malongu mawili na mbili. 14 Lipaziya lya uwega gumu wa mlyangu haliweri na upana wa mita sita na nusu, pamuhera na mpanda tatu na vikaliru vyakuwi vitatu. 15 Viraa virii muwega wa pili muligomi, lipaziya haliweri meta sita na nusu, pamuhera na mpanda tatu na vikaliwu vyakuwi vitatu. 16 Ligomi lya mdamu haliweri na lipaziya lyaliwera na utali meta tisa, lyalinyawitwi kwa nguwu mfufu iyerepa na kulembwa kwa langi ya buluu na zambarawu na nsheri. Lipaziya ali halikolerwi kwa mpanda za msheshi zyaziwera na vikaliru vya msheshi. 17 Mpanda zoseri kuzyengeta mdamu hazikolaniziwi kwa vikwambikwambi vya madini ga feza, vikaliru vyakuwi haviweri za madini ga shaba. 18 Mdamu agu haguweri na utali wa meta malongu msheshi na msheshi, upana wa meta malongu msheshi na msheshi. Mapaziya gakuyi hagaweri ga nguwu mfufu iyerepa na vikaliru vyakuwi haviweri vya madini ga shaba. 19 Vyombu vyoseri vyavitenderuwa Muliringu Linanagala na mumdamu, pamuhera na vigingi vyoseri haviweri vya shaba.

20 Haguwagambiri wantu wa Israeli wakujegeri lipaki liherepa nentu kwajili ya vikoloboyi, kuweri na shikoloboyi yashiyaka mashaka goseri. 21 Muliringu Linanagala, kunja kwa lipaziya, kulongolu kwa Lisanduku lya Lipatanu, Aruni pamuhera na wana wakuyi hawashiloleri weri shikoloboyi shashiyaka kulongolu kwaneni kwanjira pamihi mpaka mandawira. Lilagaliru ali haliweri lya wana woseri wa Israeli, shiyiwuku na shiyiwuku.