1 Wanyawiti alawanda sha kutambikira kwajili ya tambiku za kulunguziwa. Shitalawanda ashi utali na upana wakuyi uweriti teratera, utali na upana wakuw uweriti meta mbili na lobu na utali wakuyi kugenda kumpindi uweriti meta yimu na lobu. 2 Mukila ligoli lya shitalawanda ashi, kanyawiti ligoli lyaliweriti kulawirana na shitalawanda ashi. Shitalawanda ashi kashityemelekiti shaba. 3 Viraa yomberi kanyawiti vyombu vyoseri kwajiri shitalawanda sha kutambikira, kanyawiti viwiga na sepetu na beseni nkulu na wavu na koleu lya kupalira motu. Vyombu vyakuwi vyoseri kavinyawiti kwa shaba. 4 Kanyawiti wavu wa shaba, kautula pasi pa ukingu wa shitalawanda sha kutambikira mpaka nusu ya shitalawanda sha kutambikira. 5 Mupembi za msheshi yomberi kanyawiti peti za msheshi za kupapira shitalawanda sha kutambikira. 6 Wanyawiti mipiku ya mtera gwa mjoholu na kuityelemeka shaba. 7 Wayituliti mipiku mupeti zilii yaziweriti kumbwega kwa pakutambikira su kuipapira. Pakutambikira apa panyawitwi kwa mbawu paweriti na livungu mngati.

8 Shakapanu kanyawiti libeseni likulu lya shaba na shikaliru shakuwi shiweriti sha shaba, vintu avi vinyawituwi kwa vipandi vya shaba vyavitendirituwi na wadala kuwera viloleru vyawu na vijegituwi na wadala yawaweriti wakuntenda lihengu muligomi lya Liringu Linanagala.

9 Shakapanu kanyawiti mdamu. Mapaziya ga uwega wa kusika gaweriti ga nguwu mfufu iherepa yaipotituwi na yagawera na utali wa meta malongu msheshi na msheshi, 10 mapaziya aga gakolerituwi kwa mpanda malongu mawili ga shaba zyaziweriti na vikaliru malongu mawili ga shaba. Kumbiti vikoweku vya mpanda azi na vikwambikwambi vyakuwi viweriti vya madini ga feza. 11 Uwega wa kushana utali wa lipaziya liweriti meta malongu msheshi na mpanda zyakuwi malongu mawili ga shaba, kumbiti vikoweku vyakuwi na vikwambikwambi vyakuwi viweriti vya madini ga feza. 12 Uwega wa kwaguzyeta mshenji kuweriti na lipaziya shashiwera na meta malongu mawili na mbili na mpanda lilongu na vikaliru vyakuwi lilongu. Vikoweku vya mpanda na vikwambikwambi vyakuwi viweriti vya madini ga feza. 13 Uwega wa kwagulawa mshenji, kwakuweriti na ligomi, kuweriti na upana wa meta malongu mawili na mbili. 14 Lipaziya lya kila uwega liweriti na upana wa meta sita na nusu. 15 Viraa uwega umonga uweriti na lipaziya lyaliwera na upana wa meta sita na nusu, pamuhera na mpanda tatu na vikaliru vyakuwi vitatu. 16 Mapaziya goseri kuguzyengeta mdamu gaweriti ga nguwu mfufu iherepa yaipotituwi. 17 Vikaliru vyoseri vya mpanda viweriti vya shaba, kumbiti pashikoleru mumpanda azi na vikoweku vyakuwi viweriti vya madini ga feza. Vikwambikwambi vyakuwi viweriti vya madini ga feza. Su mpanda zakuwi zoseri viraa vikoleruwa kwa vikwambikwambi vya feza.

18 Lipaziya lya ligomi lya mdamu linyawituwi kwa nguwu mfufu iherepa na kulembiziwa kwa ubunta wa langi ya buluu na zambalawu na nsheri. Lipaziya ali liweriti na utali wa meta tisa na utali wakuyi kugenda kumpindi meta mbili kulawirana na mdamu agu. 19 Viraa mpanda zakuwi ziweriti msheshi na vikaliru msheshi vya shaba. Vikoweku vyakuwi na vikwambikwambi vyakuwi viweriti vya madini ga feza. 20 Vigingi vyoseri vya Liringu Linanagala na vigingi vya mdamu mumbwega mwa Liringu Linanagala viweriti vya shaba.

21 Ayi ndo walanga ya vyombu vyavitendirituwi kunyawuwa Liringu Linanagala, kulii kwakutuliwituwi mabuwi galii mawili ga malagaliru. Walanga ayi itulituwi na Walawi kwa lilagaliru lyalilaviwituwi na Musa pasi pa ukulu wa Itamari mwana gwa mtambika Aruni.

22 Bezaleli mwana gwa Uri, mzukulu gwa Huri gwa likabila lya Yuda, yomberi katenditi kila shintu Mtuwa Mlungu shakamgambiriti Musa. 23 Katangituwi na Oholiabu mwana gwa Ahisamaki, gwa likabira lya Dani, fundi yakawera na umana nentu wa kusongolana kulembeziya mumabuwi, kuyambula malembiziya ga nguwu mfufu iherepa na kulembiziya kwa ubunta wa mibahira ya kondolu, langi ya buluu na zambalawu.

24 Zahabu yoseri yawamlaviliriti Mtuwa Mlungu kwajili ya kunyawa Liringu Linanagala, iweriti na utopa wa kilu miya nani na malongu saba na saba na glamu miya ntatu kulawirana na vipimu vya Liringu Linanagala. 25 Madini ga feza gagajojonikituwi na wantu gaweriti na utopa wa kilu elufu ntatu na lilongu na saba na gilamu miya saba na malongu muhanu kulawirana na vipimu vya Liringu Linanagala. 26 Kila muntu yakawalangitwi kwanjira umuli wa vinja ishilini na yimu, kalaviyiti malaviwu gakuyi ga madini ga feza glamu muhanu, wapalu woseri yawawalangitwi waweriti laki sita na elufu tatu na miya muhanu na amsini. 27 Kilu elufu ntatu za madini ga feza zitenderituwi kunyawira vikaliru miya vya Liringu Linanagala na lipaziya lilii, kilu malongu matatu mukila shikaliru shimu. 28 Kilu zilii lilongu na saba na glamu malongu saba na muhanu yazisigaliti, zitenderituwi kunyawira vikwambikwambi vya mpanda na kuvityeremeka pavikoleru vya mpanda na kuinyawira vikoweru. 29 Madini ga shaba gagalaviwituwi na wantu kwa Mtuwa Mlungu, gaweriti kilu elufu mbili na miya yimu na malongu mawili na msheshi. 30 Bezaleli kaitenderiti shaba ayi kunyawira vikaliru vya ligomi lya Liringu Linanagala na shitalawanda sha kutambikira sha shaba pamuhera na wavu wakuyi wa shaba na vyombu vyakuwi vyoseri vya shitalawanda sha kutambikira, 31 vikaliru vya mdamu vyavizyengekiti Liringu Linanagala na vikaliru lya ligomi lya mdamu na vigingi vyoseri vya Liringu Linanagala na vya mdamu.