1 Mtuwa Mlungu kamgambira Musa, 2 "Guwatuli gweka wapanta njira wapalu waweri kwajili ya neni. Shipanta njira wapalu wa wantu wa Israeli na shipanta njira wa wankanyama wawu hawaweri kwajili ya neni."

3 Musa kawagambiriti wantu, "Namulyaluwa lishaka ali! Lishaka ali ndo lyamlawiti muisi ya Misri. Lishaka ali ndo lyamlekeziwa kulawa muumanda. Mtuwa Mlungu kawalaviyiti mwenga kulawa muisi ya Misri kwa makakala gakuyi makulu. Namuliya libumunda lyoseri lyalitulitwi simika patutenda msambu mulishaka ali. 4 Lishaka ali mwankugenda kuwuka muisi ya Misri, lishaka lya kwanja, mumwezi yagushemuwa Abibu. 5 Mtuwa Mlungu pakawajega muisi ya wantu wa shiyiwuku sha Kanaani na wantu wa shiyiwuku sha Hiti na wantu washiyiwuku sha Amori na wantu wa shiyiwuku sha Hivi na wantu wa shiyiwuku sha Yebusi vinu yawalikala amu, isi ayi yakalagiliti kuwapanani mwenga, isi hayiweri iherepa kwa kuyiliziya mifugu yenu na kuyala viboga, mfiruwa kuvina kwa kutenda msambu mumwezi agu kila vinja. 6 Kwa mashaka saba hamliyi mabumunda yagalekelwa ndiri simika. Na mulishaka lya saba hamtendi msambu toziya yakumpanana ligoya Mtuwa Mlungu. 7 Namuliya libumunda lyoseri lyalilekeruwa simika kwa mashaka saba. Namuwera na simika ama libumunda lyalilekeluwa simika muisi yenu. 8 Lishaka pamuyanja kutenda msambu, muwagambiri wananguta wenu, twankutenda hangu tushihola shilii shakatenditi Mtuwa Mlungu kwa wambuyi wetu pawawukiti muisi ya Misri. 9 Shitiba ashi hamushitendi kulihola ntambu Mtuwa Mlungu pakawalaviyiti wambuyi wenu kulawa muisi ya Misri kwa makakala gakuyi makulu. Shitiba ashi sha kulihola hashiweri gambira shimaniziru shashitawaliluwa mumtuwi gwaku ama muliwoku lyaku. Hashiwaholuziyi mwenga mlongi kwa wamonga shilii Mtuwa Mlungu shakawalagaliriti. 10 Su mfiruwa kutenda msambu kila shinja mushaka shakatuliti Mtuwa Mlungu."

11 Musa kendereyiti kuwagambira, "Mtuwa Mlungu hakawajegi mwenga muisi yawalikala shiyiwuku sha wantu wa Kanaani, ntambu yakawalagiliti mwenga pamuhera na wambuyi waku mekawapanani. Pakawapanana isi ayi, 12 mfiruwa kumtulira Mtuwa Mlungu, shipanta njira shimpalu wa wankanyam wenu. Awa hawaweri kwajili ya Mtuwa Mlungu. 13 Kila shipanta njira gwashipalu gwa nkanyama punda hagumuhemeri kwa mwana gwa kondolu. Pagufira ndiri kumuhemera nkanyama punda, gufiruwa gumlagi kwa kummindula singu. Gufiruwa gumuhemeri kila yumu gwa shipanta njira gwa wana waku wapalu. 14 Mumashaka ga kulongolu wana waku pawakukosiya, shitwatila ashi shiweria na mana gaa? Gwenga hagumgambiri, Mtuwa Mlungu kawalaviyiti wambuyi wetu kulawa muisi ya Misri kwa makakala gakuyi makulu na kutulaviya kulawa muumanda kulii. 15 Falawu kaweriti na mtiti, kalemiti kuwalekeziya womberi wawuki muisi yakuwi, su Mtuwa Mlungu kawalagiti vipanta njira woseri wapalu muisi ya Misri, kawalagiti wantemba pamuhera na vipanta njira vya mifugu yawu. Ndo mana vinu twankumlavilira tambiku Mtuwa Mlungu, shipanta njira sha wankanyama wetu, kumbiti twenga tuhemera shipanta njira wana wapalu wetu. 16 Mbuyira kulonga kuwera msambu agu gukuholuziya Mtuwa Mlungu ntambu yakawalaviyiti wambuyi wetu kulawa muisi ya Misri kwa makakala gakuyi makulu, shitwatira ashi hashiweri gambira shintu shagulitawa mushunu shaku ama mumtuwi gwaku kukuholuziya."

17 Falawu pakawalekeziti wantu wa Israeli wawuki, Mlungu kawalongoziyiti ndiri womberi waigenderi njira ya kugenda muisi ya wantu wa Filisti. Njira yaiweriti ya pakwegera, kumbiti Mlungu kalongiti, "Meyiweri shintu shidoda handa wantu wangu kugalambula maholu gawu pawayambula kuwera hawafiruwi kulikomangi ngondu na wantu wa Filisti pawatola isi yawu, shakapanu waamuwi kuwuya muisi ya Misri." 18 Badala yakuwi, Mlungu kawalonguziya womberi njira ntali kupitira kushiwala kugenda kubahali nsheri. Wantu wa Israeli pawawukiti muisi ya Misri, watoliti silaha zawu za kulikomanga na wangondu wawu.

19 Musa katoliti mafupa ga Yusufu wagendi naga, toziya Yusufu pamberi pa kuhowa kwakuyi, kawatenditi wantu wa Israeli walagili kuwera mewagatoli. Yusufu kawagambiriti, "Mlungu hakashilaviyi shiyiwuku shenu shilawi muisi ya Misri. Pamlawa amu, mugatoli mafupa gangu mgendi naga."

20 Su wantu wa Israeli wawukiti Sukoti na wagenditi kugonjera mwanja Etihamu, mumpeku kushiwala. 21 Pawagenditi mwanja paluwala, Mtuwa Mlungu kagenditi pamuhera na yomberi pakawalongolera mulihundi lifufu kuwalanguziya njira. Pashiru, kawalongoleriti womberi mulihundi lyaliwera gambita mpanda yalilifana na motu. Kwa kutenda hangu, kawatenditi womberi wawezi kugenda mwanja paluwala na pashiru. 22 Lihundu lyaliwera gambira mpanda liwalekiti ndiri womberi. Shaka shoseri liwalongoleriti womberi, liweriti lifufu paluwala na pashiru liweriti gambira motu.