1 Wantu wa Israeli pawawukiti Repihidimu, pa myezi miwili shakapanu pawalawiti muisi ya Misri, womberi wasokiti kushiwala pakwegera na lugongu Sinayi. 2 Womberi wanyawiti malingu gawu aku pakwegera na lugongu lwa Sinayi. 3 "Musa kakweniti kulugongu kuyowera na Mlungu. Mtuwa Mlungu kamshemiti kulawa palugongu na kalongiti, ashi ndo shanfira kuwagambira wantu wa Israeli, shiyiwuku sha Yakobu, 4 mwenga mwoniti ntambu yanuwatenditi wantu wa Misri. Mwoniti shanuwatendiriti mwenga na ntambu yanuwajegiti panu kwa neni. Nuwatoriti gambira ndapu yakawatola wana wakuyi mumbapatiru. 5 Su vinu pamtenda shanuwagambira na kujimira vyoseri vyanuwalagalira mwenga, hamuweri wantu wa neni. Wantu woseri wa pasipanu, wa neni," kumbiti hamuweri wagweka kwaneni kuliku vipinga vya wantu wamonga. 6 "Mwenga hamuweri muufalumi waneni wa watambika, mwenga hamuweri woseri watambika na hamtuluwi nakaka kwajili ya neni. Ntambu ayi mfiruwa kuwagambira wantu wa Israeli."

7 Su Musa kasulukiti kulawa kulugongu na kawashemiti wakulu wa wantu wa Israeli. Yomberi kawagambiriti kila shintu Mtuwa Mlungu shakamgambiriti su kawagambiri womberi. 8 Wantu woseri walongiti, "Hatutendi kila shintu Mtuwa Mlungu shakatugambiriti." Shakapanu Musa kakweniti kugenda kulugongu na kamgambiriti Mtuwa Mlungu shilii shawalongiti wantu.

9 Shakapanu Mtuwa Mlungu kamgambiriti Musa, "Gumpikaniri weri. Neni nankugenda kukulawira gwenga mulihundi litopa. Payowera na gwenga, wantu hawapikaniri na hawajimiri mashaka goseri shilii shaguwagambira." Shakapanu Musa kasulukiti kulawa kulugongu na kawagambiriti wantu shilii shakalongiti Mtuwa Mlungu.

Musa kagenditi kayi kulugongu na kumgambira Mtuwa Mlungu shilii shawatakuliti wantu. 10 Mtuwa Mlungu kamgambiriti Musa, "Gusuluki kayi kugenda kwa wantu. Guwagambiri walipungi leru na shilawu. Guwambiri wagululi nguwu zawu vulaa. 11 Su waweri kala shilawu, toziya mulishaka ali hansuluki kwiza palugongu lwa Sinai, wantu hawawezi kumona. 12 Haguwatulili wantu mipaka kuzyengeta lugongu na guwagambiri, Muliloli weri namkwena kulugongu ama namulisegelera pakwegera. Muntu yoseri yakalushinkula lugongu alu hakahowi. 13 Naguleka muntu yoseri ama nkanyama yoseri yakalokiti mipaka na kulisegelera lugongu alu. Gumlagi muntu yoseri ama nkanyama yakaloka na kulisegelera lugongu kwa kumgumanga kwa mabuwi ama kumkomanga misali. Kumbiti pampikanira liziwu likulu lya mbalapi, wantu waweza kwiza pakwegera nentu kulugongu."

14 Su Musa kaselera kayi kulawa kulugongu na kawagambiriti wantu walipungi weni. Womberi watenditi shilii shawagambirituwi na Musa, vulaa wagululiti nguwu zawu. 15 Shakapanu Musa kawagambiriti wantu woseri, "Mulikali kala mulishaka pashilawu. Mwenga wapalu namuliwona na wadala wenu."

16 Mashaka mawili shakapanu, mandawira, kuweriti na malindimiru na mimeta ya malindimiru na kuweriti na lihundi litopa palugongu. Mbalapi ipikaniriti kwa liziwu likulu nentu, malawiranu gakuyi wantu mumalingu walendemeriti nentu toziya watiriti nentu. 17 Shakapanu Musa kawalongoziyiti wantu kunja mumalingu su wakaliwoni na Mlungu. Womberi wagolokiti pawaluzyengeta lugongu. 18 Lugongu lyoseri lwa Sinai lugubikituwi na lyosi, toziya Mtuwa Mlungu kasulukiti palugongu kaluzyengeta kwa motu. Lyosi lifukiti gambira lyosi la litanuru, lugongu lyoseri lilendemeriiti nentu. 19 Liziwu lya mbalapi lyenderiti kuwera likulu nentu gambira lupanda. 20 Mtuwa Mlungu kasulukiti kwiza palugongu lwa Sinai, kamshemiti Musa kukwena kulugongu, su Musa kagenditi. 21 Mtuwa Mlungu kamgambiriti Musa, "Guseleri kayi kugenda pasi gwakawaberiziyi wantu nawaloka mipaka kwiza kulugongu su wandoli. Handa pawatenda hangu, wavuwa wawu hawahowi. 22 Viraa watambika yawayiza pakwegera na neni Mtuwa Mlungu, su walipungi huti, nayiza kuwazibu."

23 Musa kamgambiriti Mtuwa Mlungu, "Wantu awa hapeni wakweni kwiza kulugongu, toziya guwalagalira pagulonga, Mtuli mipaka kuluzyengeta lugongu, kulutenda lupunguwi."

24 Mtuwa Mlungu kawankula, "Guseleri pasi, gumtoli Aruni. Kumbiti naguwalekeziya watambika ama wantu wamonga waloki mipaka kwiza kwaneni. Handa pawaloka, haniwazibu." 25 Su Musa kaselera kayi kugenda pasi na kawagambiriti wantu wa Israeli shilii Mtuwa Mlungu shakatakuriti.