1 "Nagulaviya shisoweru sha upayira kwa wantu. Nagumtanga muntu yoseri yakatenda ukondola kwa kulaviya ukapitawu wa upayira kwa shilii shashilawiriti. 2 Nagulikolerana pamuhera na shipinga sha wantu yawalihola kutenda vintu vya ukondola. Nagulaviya ukapitawu wa upayira mushisoweru shoseri kwa kuleka unakaka toziya womberi watenda ntambu iraa ayi. 3 Muntu muhushu pakawera mushizyungu, nagulaviya ukapitawu gwa kumpanana upendelewu toziya yomberi kawera muhushu na gwenga gumwonera lusungu."

4 "Pagumwona ng'ombi ama nkanyama punda gwa mngondu gwaku kagamira, gwenga hagumuwuziliri mweni. 5 Handa pagumwona ng'ombi ama nkanyama punda gwa muntu yakakukalalira gwenga kaguwa pasi kulawirana na shisanka shitopa shakapapiti, nagumleka palii, kumbiti gumtangi."

6 "Nagupotuziya shilii shashifiruwa kwa muntu muhushu mumasitaka gakuyi. 7 Gulituli patali na masitaka ga upayira ama kuwalaga wantu yawahera likosa ama walii yawawera na ligoya, toziya neni hapeni numlekeziyi muntu yakawera na ukondola. 8 Nagufira finda, toziya wakulu yawawanka finda hapeni watendi shilii shashiwera teratera."

9 "Namuwagaziya wahenga yawalikala pakati penu. Mwenga muvimana wantu ntambu yawalikala nawu, toziya mwenga muweriti wahenga muisi ya Misri."

10 "Gulimi lirambu lyaku na kubenanga viboga kwa mivinja sita. 11 Kumbiti mushinja sha saba, naguyala shintu shoseri mulirambu layku. Viboga vyavikula pota kuviyala, kuwalekeziyi wantu wahushu wavibenangi na kuviliya. Handa paviwera viboga mulirambu womberi wavibeniti ndiri, gwenga guwalekeziyi wankanyama wa kuntundu waviliyi. Gutendi ntambu iraa ayi mulirambu lyaku lya Mizyabibu pamuhera na mizyetuni."

12 "Gwenga guweza kutenda mahengu kwa mashaka sita mukila lijuwa, kumbiti mulishaka lya saba gwoyeri nagutenda lihengu. Mulishaka lya saba guwalekeziyi wankanyama waku yawatenda lihengu na wamanda waku yawalikala pakati pa mwenga viraa woyeri na wanemeleri."

13 "Guliloleri weri kutenda kila shintu shanukugambiriti gwenga. Naguwaluwa wamilungu yamonga. Nagugakanta ata matawu gawu."

14 "Kila shinja gufiruwa guvini misambu mitatu kumpanana neni ligoya. 15 Msambu gwa kwanja haguweri msambu gwa mabumunda gagalekeruwa ndiri simika. Mvini msambu agu mumwezi gwagupananuwa litawu Abibu. Toziya mumwezi agu mwenga mlawiti muisi ya Misri. Muntu yoseri nakakiza kwa neni mawoku hera." 16 "Msambu gwa pili haguweri msambu gwa mabenu. Mumsambu agu mwenga hamundaviliri mabenangu ga kwanja kukamala mulirambu lyaku. Na msambu gwa ntatu haguweri msambu gwa visasa."

"Msambu agu haguweri pamumalila kala kubenanga viboga vyenu mumalambu. 17 Kila shinja mukila msambu, wapalu woseri wafiruwa kujojonika pamuhera kunguwira neni, Mtuwa Mlungu."

18 "Gwenga pagundavilira tambiku ya nkanyama, nagulaviya mabumunda gagalekeruwa simika. Pagulaviya tambiku gulunguziyi lipaki lya nkanyama lishaka lilaa ali. Naguleka lipaki lisigali mpaka shilawu yakuwi mandawira."

19 "Kila shinja gwenga pagubena viboga vyaku, guvijegi viboga vya kwanja mumabenu gaku pahala pagunguwira neni, Mtuwa Mlungu, Mlungu gwaku."

"Gwenga pagumlikitula mwana gwa kondolu ama mbuzi, naguteleka vinofu avi mumaweri ga mawu gwakuyi."

20 "Guloli, neni nankumtuma ntumintumi gwa kumpindi kawalongoleri mwenga na kawaloleri munjira na kuwajega pahala panupatandiriti. 21 Muliloli weri na kumpikanira neni shilii shanuwagambiriti. Namumlema tembera yomberi hapeni kawalegeziyi kulema kwa mwenga, toziya neni numtuma kwa litawu lyangu. 22 Kumbiti pampikanira weri shilii shakawagambira na pamtenda goseri gantakula, neni haweri mngongu kwa wangodu wenu na hanuwapingili woseri yawawapingira mwenga. 23 Ntumintumi gwangu gwa kumpindi hakawalongoleri na kuwajega muisi ya wantu wa Amori na Hiti na Perizi na Kanaani na Hivi na Yebusi, neni hanuwagamaziyi nakamu. 24 Namuwasuntamalira makukama ama kuwaguwira milungu yawu ama kutenda vitwatira vyawu. Kumbiti hamuwagamiziyi nakamu wamlungu wawu na kubomolanga vitalawanda vyawu vya kutambikira vya mabuwi.

25 Mwenga hamunguwiri neni Mtuwa Mlungu, Mlungu gwenu. Handa pamtenda hangu, hanuwatekeleri kwa kuwapanana viboga pamuhera na mashi, haniwaponiziyi malweli. 26 Kwahera mdala muisi yako hakaweri na wana shakapanu wana wahowi, viraa hapeni kuweri na mdala mpendi. Neni haniwapanani mwenga mulikali mashaka matangala."

27 "Hanuwatendi wantu walii yawawakalalira mwenga waweri na lyoga kwaneni. Viraa hanuwatendi wantu walii yamulikoma ngondu nawu washashatiki. Shakapanu hanuwatendi womberi wawuyi kumbeli na kutuga. 28 Hanuwajegi manondola kulongolu kwa mwenga wawawingi wantu wa Hivi na Kanaani na Hiti. 29 Hapeni nuwawusiyi wantu awa woseri mushinja shimu, isi naisigala hera, wankanyama wa kuntundu hawawongereki na mwenga hapeni muwezi kuwakanka. 30 Kumbiti hanuwawusiyi kidogu hanuwawusiyi mpaka mwenga pamumwongereka na kulikala kila pahala muisi ayi. 31 Hantendi mipaka ya isi ya mwenga yongereki kulawa mubahari ya Shamu uwega wa kusika mpaka mubahari ya Meditereniyani uwega wa kushana. Na kwanjira shiwala sha Sinayi uwega wa kusika na kwaguzyeta mshenji mpaka mulushemba lwa Eufulati muisi ya uwega wa kushana na kwagulawa mshenji. Haniwapanani makakala ga kuwawinga wantu yawalikala kulii, su muweri na isi nkulu. 32 Namtenda lipatanu lyoseri nawomberi, ama na milungu yawu. 33 Namuwalekeziya womberi walikali muisi yenu, womberi nawiza kuwatenda mwenga mtendi vidoda kwa neni. Handa mwenga pamuwaguwira wamlungu yawu, mwenga hapeni muwezi kushapira kuwaguwira womberi na kutenda vidoda."