1 Mtuwa Mlungu kamgambiriti Musa, "Gupikanili weri. Neni hanikutendi gwenga guweri gambira mlungu kwa Falawu, na mlongu gwaku Aruni hakaweri gambira mbuyi gwa Mlungu. 2 Gumgambiri mlongu gwaku Aruni vitwatira vyoseri vyanukugambira, Aruni mlongu gwaku hakamgambiri Falawu kawaleki wantu wa Israeli wawuki muisi yakuwi. 3 Kumbiti hanugutendi mtuwi gwa Falawu guweri na mtiti. Malawiranu gakuyi, hantendi ata pantenda mawuzauza gavuwa ga ntambu yingiyingi muisi ya Misri, 4 Falawu hapeni kakujimiri shilii shagumgambira. Shakapanu hanuwazibu nentu wantu wa Misri na hanuwalongoziyi viyiwuku vya wantu wa Israeli kulawa Misri. 5 Shakapanu pananguziya makakala gangu makulu kuwakoma wantu wa Misri na kuwalaviya wantu wa Israeli kulawa pakati pawu, womberi hawavimani kuwera neni ndo Mtuwa Mlungu, Mungu yakawera na makakala goseri."

6 Su Musa na Aruni watenditi ntambu yawagambiritwi na Mtuwa Mlungu kumgambira yomberi. Womberi wagenditi kuyowera na Falawu. 7 Shaka ashi Musa kaweriti na mivinja malongu nani, Aruni kaweriti na mivinja malongu nani na ntatu.

8 Mtuwa Mlungu kamgambiriti Musa, 9 "Falawu pakawagambira, mtendi liuzauza kulanguziya nakaka kuwera Mlungu kawatuma shakapanu gumgambiri Aruni, Gwasi pasi luhonga kulongolu kwa Falawu, yeni haigalambuki kuwera njoka." 10 Su Musa na Aruni wamgenderiti Falawu na kutenda gambira Mtuwa Mlungu ntambu yakawagambiriti. Aruni kalwasiti luhonga lwakuyi pasi kulongolu kwa Falawu pamuhera na wakulu wayaguwi, na lweni lugalambuka kuwera njoka. 11 Shakapanu Falawu kawashemiti wahawi pamuhera na waganga woseri yawatenda mawuzauza muisi ya Misri. Womberi watenditi ntambu iraa ilii pawatendiriti uhawi wawu. 12 Kila yumu kalwasiti luhonga lwakuyi pasi na lugalambuka njoka. Kumbiti luhonga lwa Aruni lwalugalambukiti kuwera njoka luzimila honga zawu zoseri. 13 Kumbiti mtuwi gwa Falawu guweriti gwankali na mtiti, ntambu yaitakulitwi na Mtuwa Mlungu, na kawasheriti ndiri Musa na Aruni.

14 Shakapanu Mtuwa Mlungu kamgambiriti Musa, "Mtuwi gwa Falawu gwana mtiti. Kalema kuwalekeziya wantu wangu wawuki. 15 Su shilawu mandawira gugendi gwakaliwoni na yomberi, shaka pakagenda kwoga mashi kulushemba Naili. Gumuhepi kumbeku pa lushemba. Pakalawa mulushemba, gumlanguziyi luhonga lulii lwalugambaukiti kuwera njoka. 16 Gumgambiri hangu, ‘Mtuwa Mlungu gwa Waeburaniya, Mlungu ulii yawamguwira, kantuma kwaku kukugambira guwalekeziyi wantu waneni wawuki, su wamguwiri kushiwala. Tukugambiriti gwenga kumbiti gulishera ndiri. 17 Su vinu Mtuwa Mlungu kalonga hangu, ntambu ayi haguvimani kuwera neni ndo Mtuwa Mlungu, nana makakala ga kutenda shilii shantakuliti hanishitendi." Guloli, nankugenda kugasyatanga mashi ga lushemba Naili kwa luhonga lwaluwera mumawoku gangu. Pantenda hangu, mashi hagagalambuki kuwera masheri gambira mwazi. 18 Shakapanu wasomba yawaweriti mulushemba alu hawahowi, mashi aga haganunki na wantu wa Misri hapeni wawezi kugaranda mashi ga lushemba lwa Naili.’"

19 Mlungu kamgambira Musa, "Paguyowera na Falawu, gumgambiri Aruni, gutoli luhonga lwaku na gulitalapisiyi gambira kutalipisiya pamashi ga Misri, pashemba na pavishemba na pamashi ga matanda na pamashi ga manegu goseri su gagalambuki kuwera msheri gambira mwazi. Aruni pakatenda hangu, hakuweri na mwazi muisi yoseri ya Misri, ata mukila shintu sha kutulila mashi."

20 Musa na Aruni watenditi gambira Mtuwa Mlungu ntambu yakawagambiriti. Falawu pamuhera na wakulu wayaguwi pawaweriti wankulola, Aruni kanyasula luhonga lwakuyi na kagasyatanga mashi ga lushemba lwa Naili. Na mashi goseri ga lushemba gagalambukiti kuwera masheri gambira mwazi. 21 Shakapanu wasomba woseri yawaweriti mulushemba lwa Naili wahowiti, nshemba zinunkiti nentu na wantu wa Misri wasinditi kuranda mashi galii. Mwazi guweriti kila pahala muisi ya Misri. 22 Kumbiti wahawi wa Misri watenditi ntambu iraa ilii. Su Falawu kendereyiti kuwera na mtiti. Yomberi kalisheriti ndiri shilii shawatenditi ashina Aruni na Musa, gambira Mtuwa Mlungu ntambu yakatakuriti. 23 Su Falawu kawuyiti kunumba nkulu kwakuyi, shitwatira ashi kalisheriti ndiri. 24 Wantu woseri wa Misri wabawiti mumpeku mwa lushemba Naili su wapati mashi ga kulanda, toziya womberi waweziti ndiri kulanda mashi ga lushemba alu.

25 Komangu alu lilikaliti kwa mashaka saba pa Mtuwa Mlungu kugagalambula mashi ga lushemba lwa Naili kuwera mwazi.