1 "Aga ndo malagaliru gamonga guwapanani wantu wa Israeli. 2 Pagumuhemera mmanda, muntu gwa Eburaniya, yomberi kakutendera gwenga kwa mivinja sita. Kumbiti mvinja gwa saba gumlekeziyi nakawera mmanda gwaku, na hapeni kakulipi gwenga shintu shoseri kwa kumlekeziya. 3 Handa mmanda kahemiritwi pamberi pa kuyuga, hakawuki gweka yakuwi. Kumbiti handa kiziti na mdala gwakuyi, su hakawuki na mdala gwakuyi. 4 Handa mtuwa gwakuyi kamuyugiliriti mdala na mdala kawiyura wana wapalu na wadala uganu mpalu gwakuyi pakawera mmanda, mpalu gweka yakuwi hakaweri mlekeru. Mdala gwakuyi pamuhera na wana hawendereyi kuwera wamanda kwa mtuwa gwawu. 5 Kumbiti mushaka sha kumleka mmanda kaweri mlekeru, mmanda ulii pakalonga, neni numfira mtuwa gwangu pamuhera na mdala gwangu na wana wangu, neni nfira ndiri kuwuka, 6 shakapanu mtuwa gwakuyi hakamjegi kugenda pahala womberi kwawamguwira Mlungu. Shakapanu hakamjegi kuligomi ama pampanda za ligomi, yomberi hakashitenderi shintu sha shuma shashisongoka kumtobola likutu. Su mtuwa ulii hakamvalisiyi shintu kulanguziya kuwera yomberi hakaweri mmanda kwa mtuwa gwakuyi mashaka goseri."

7 "Muntu pakamshuwuza muhinga gwakuyi kaweri mmanda, hapeni kaweri mlekelu pamivinja sita ntambu yaiwera kwa mmanda mpalu. 8 Handa muntu yakamuhemeriti muhinga ayu, pakafira kaweri mdala gwakuyi, shakapnu pakaherepeziwa ndiri na muhinga ayu, yomberi kafiruwa kamshuwuzi kwa tati gwa muhinga ayu. Yomberi kafiruwa ndiri kamshuwuzi kwa wahenga, toziya yomberi hakagaleki majimiliranu gakagatenditi na tati gwa muhinga ayu. 9 Handa muntu yakamuhemeriti muhinga ayu kaweri mdala gwa muntemba gwakuyi, su yomberi kafiruwa kamloleri weri gambira muhinga gwakuyi mweni. 10 Handa mtuwa pakamtola mmanda mdala kaweri mdala gwakuyi yumonga, yomberi kafiruwa kendereyi kumpanana mmanda mdala shiboga na nguwu ntambu yakampananiti kwanja, vulaa kendereyi kugonja nayu ntambu yaiweriti kwanja. 11 Handa mpalu ayu pakatenda ndiri vitwatira vyoseri avi vitatu kwa mdala ayu, su kafiruwa kamlekeziyi kulawa muumanda na yomberi kafiruwa ndiri kamlipi shintu shoseri kwa kumtenda kaweri mlekeru."

12 "Yakamkoma muntu na kumlaga, yomberi hakalagwi. 13 Kumbiti handa kaweriti ndiri kamnyatira, ila kwa kutendewa, su, mlaga ayu hakawezi kutugira uponera pahala panfira kuwasyagulirani. 14 Kumbiti muntu pakamkomanga myaguyi kwa ng'anjihera na kumlaga kwa shibuli, ata pakatugira kumazabahu, hamlaviyi kumazabahu paneni na kumlaga."

15 "Yakamkoma tati gwakuyi awu mawu gwakuyi mpaka kalagwi."

16 "Yakamteka muntu nyala su kamwuzi awu kumtenda mmanda gwakuyi mpaka kalagwi."

17 "Yakampangira tati gwakuyi ama mawu gwakuyi, yomberi mpaka kalaguwi."

18 "Wantu wawili pawalikomanga, shakapanu yumu kamguma myaguyi libuwi awu ngumi bila kumlaga. Kumbiti kamtenda padidika na kumtenda kalwali na kugonja mshitanda, 19 Handa ayu yakakomitwi pakapata nafuwu na kaweza kugendagenda kwa kulitumbira luhonga, ayu yakamtenditi hakalekeziwi. Kumbiti, hakamlipi toziya ya shaka shoseri shakagonjiti mushitanda na hakamlwaziyi mpaka kaponi nakaka. 20 Muntu pakamkoma mmanda gwakuyi mpalu ama mdala kwa luhonga na kumlaga palaa panu, ndo mpaka kazibiwi. 21 Kumbiti mmanda ayu gwa shipalu ama gwa shidala pakasigala mkomu lishaka limu ama mawili, mpalu wakuyi hakazibiwi, Toziya ayu kaweriti ndo mlunda gwakuyi."

22 "Wapalu pawalikomanga na kumtenda mdala kana yinda, ata yinda yakuyi iwuka pota kutenduwa kumonga nentu, ulii yakamtenditi hakalundwi ntambu yakafira mpalu gwakuyi mdala ayu na handa watoza ntambu yawaamuwiti. 23 Kumbiti handa hagaweri matenduwa gamonga, su mpaka kamlipi ukomu kwa ukomu, 24 lisu kwa lisu, linu kwa linu, liwoku kwa liwoku, ligulu kwa ligulu, 25 kuluguziwa kwa kulunguziwa, likweshulu kwa likweshulu, likomangu kwa likomangu. 26 Muntu pakamkoma lisu mmanda gwakuyi mpalu ama mdala na kulihalibisiya lisu lyakuyi, ndo mpaka kamlekiziyi kagendi zakuyi lekeru pota malipu toziya ya lisu lyakuyi. 27 Handa muntu yoseri pakalimega linu lya mmanda gwakuyi, yomberi kafiruwa kamlekeziyi mmanda ulii toziya ya shilii shakatenditi mulinu lya mmanda ulii."

28 "Ng'ombi pakamkoma muntu kwa ligoli na kumlaga, ng'ombi ayu hakalagwi kwa kugumangwa mabuwi na minofu yakuyi hawaliyi ndiri. Mweni kana ng'ombi ayu hapeni kalawumiwi. 29 Kumbiti handa ng'ombi ayu kazowelera kukoma wantu pembi na mweni kaberiziwa kumbiti kamtawa ndiri, handa ng'ombi ayu pakamlaga muntu kafiruwa kalaguwi kwa kugumwa mabuwi na mweni yakana ng'ombi hakalagwi viraa. 30 Ata hangu, muntu ayu pakalundwa su kulopola ukomu wakuyi, ndo mpaka kalipi shashifiruwa shakalundwa. 31 Ng'ombi pakamkoma pembi mwana mpalu ama mwana mdala, lagiru ali halitumiki vilaa. 32 Handa ng'ombi ayu pakamkoma pembi mmanda gwa shipalu ama gwa shidala, yakana ng'ombi hakamlipi mtuwa gwa mmanda ayu feza zyana samani ya magwala selasini ga madini ga feza na ng'ombi ayu mpaka kalaguwi kwa kugumangwa mabuwi."

33 "Muntu pakalileka lirindi pota kuligubika, ama pakabawa lirindi shakapanu kaligubika ndiri, ng'ombi ama nkanyama punda pakatulukira amu, 34 yakana lirindi kafiruwa kalipi, hakamlipi yakana nkanyama ayu feza na nkanyama yakafuwiti hakaweri gwakuyi. 35 Ng'ombi gwa muntu pakamtenda ng'ombi gwa muntu yumonga na kumlaga, su wantu hawamwuzi ng'ombi yakasigaliti mkomu na kubagulana beyi yakuyi; viraa hawabagulani ng'ombi ulii yakafuwiti. 36 Kumbiti ng'ombi ayu handa kaweriti kazowelera kukoma wamonga pembi na mweni kamtawa ndiri, mweni hakalipi ng'ombi kwa ng'ombi na ulii yakalagitwi hakaweri gwakuyi."