1 Guwashemi Aruni mlongu gwaku pamuhera na Nadabu na Abiwu na Eleazari na Itamali wana wakuyi. Gwenga haguwasyaguli womberi kulawa pakati pa wantu wa Israeli, su wantenderi neni gambira watambika. 2 Gwenga hagumsoneri mlongu gwaku Aruni mahabiti mananagala yampanani ukwisa na ligoya. 3 Guwalagaliri wantu yawamana kusona nguwu, walii yaniwapananiti mahala ga kutenda hangu, su wamumnyawiri Aruni mahabiti ga kumtenda kawoneki mtambika yanimsyaguliti. 4 Guwagambiri wasoni vintu avi, shihaku sha pashifuwa na shipandi sha nguwu ndidini sha kugubika shifuwa na kanzu na lihabiti lyalilembeziwitwi, viraa shilemba na lufunga lukulu. Aruni mlongu gwaku pamuhera na wana wakuyi, hawavali su wantenderi lihengu lya watambika. 5 Wantu yawasona nguwu awa hawatenderi nguwu ya zahabu na ya langi ya buluu na ya zambarawu na ya nsheri na wa ubunta wa zahabu na nguwu nfufu yaisonituwi.

6 Mafundi hawashinyawi shipandi sha nguwu sha kugubika shifuwa sha mtambika kwa ubunta wa langi ya buluu na zambarwu na nsheri na nguwu nfufu yaisonuwa na kuilembeziya. 7 Shipandi sha nguwu ashi hashiweri na ngoyi mbili kutawalira mumakombi. 8 Ngoyi za kushikolera shipandi sha nguwu ashi hazisonwi kwa vintu viraa virii. Womberi hawatenderi ubunta wa zahabu na nguwu ya buluu na zambarawu na nsheri na nguwu nfufu yainyaituwi na kuwera shintu shimu mushipandi sha nguwu ashi.

9 Shakapanu hagutoli mabuwi mawili ga madini ga beyi nkulu gagashemuwa saridoniki, mabuwi aga hagugalembi matawu lilongu na mbili ga wana wa Israeli. 10 Matawu gaweri ntambu yawiyukiti, matawu sita gugalembi mulibuwi limu na matawu sita gamonga gugalembi mulibuwi lyamonga. 11 Hagugalembi matawu aga kwa kugasongola mumabuwi aga gambira msongola vintu ntambu yakasongola shimaniziru. Shakapanu gugatuli muvikoleru vyavinyawitwi kwa zahabu. 12 Mabuwi aga mawili hagatawaliruwi mumkanda gwa mumakombi kuwera liholu kwa viyiwuku lilongu na mbili vya Israeli. Su Aruni hakavali matawu aga viyiwuku avi mumakombi gakuyi gaweri liholu kulongolu kwa Mtuwa Mlungu. 13 Hagunyawi kwa zahabu vintu viwili vya kutulira mabuwi aga, 14 na mikufu miwili ya zahabu iherepa yayipotituwi gambira lugoyi, haguyitawi muvitulilu vya mabuwi aga.

15 Guwagambiri mafundi wanyawi muhaku mnanagala toziya ya Aruni kavali pashifuwa shakuyi. Muhaku agu hagunyawiruwi kwa vintu viraa virii ntambu yainyawituwi shizibawu. 16 Muhaku agu wega zakuyi zoseri za msheshi hazilinganiri, utali wakuyi haguweri sentimita malongu mawili na mbili, upana wakuyi haguweri sentimita malongu mawili na mbili. 17 Muhaku agu hagulembeziwi mumisitari ya msheshi ya mabuwi ga madini ga beyi nkulu. Msitari gwa kwanja haguweri na mabuwi ga beyi nkulu gagashemuwa akiki na topazi na alimasi nsheri, 18 msitari gwa pili haguweri na mabuwi gagashemuwa zumaridi na yakuti samawati na alimasi. 19 Msitali gwa ntatu haguweri na mabuwi gagashemuwa yasintu na akiki nsheri na ametisitu, 20 msitali gwa msheshi haguweri na mabuwi gagashemuwa zabarajadi na shohamu na yasipi, goseri aga hagatuluwi muvitulilu vya zahabu. 21 Su hapaweri na mabuwi lilongu na mbili yagalembwa matawu lilongu na mbili ga wana wa Israeli. Kila libuwi limu haliweri gambira shimaniziru, kulanguziya viyiwuku lilongu na mbili. 22 Kwajili ya muhaku hagu gwa pashifuwa hagunyawi mikufu ya zahabu iyerepa yayipotitwi gambira lugoyi. 23 Viraa virii hagunyawi peti mbili za zahabu na kuzitula muukingu mwa muhaku hagu pashifuwa, 24 na mikufu miwili ya zahabu guitawi mupeti mbili za muhaku gwa pashifuwa. 25 Zilii kingu mbili za mkufu wa zahabu haguzikolaniziyi muvituliru virii vilikoli pamuhera na shipandi shilii sha mumakombi sha shipandi sha nguwu sha kugubika shifuwa sha uwega wa kulongolu. 26 Viraa hagunyawi peti mbili za zahabu na kuzitula kweni incha mbili za pasi uwega wa mgati mwa mhaku wa pashifuwa pakwegera na shizibawu. 27 Hagunyawi peti zimonga mbilizya zahabu na kuzituli palongolu muicha za pasi za vipandi vya shizibawu, maala shizibawu pashiwunganika na mkanda wawupotitwi kwa unakaka. 28 Mhaku wa pashifuwa hashitawi kweni shizibawu kwa kutawilwa peti zyakuwi na shizibawu kwa lugoyi lwa langi ya buluwu, su muhaku agu wa pashifuwa nashiyopoki ndiri su shikaliri gulii mkanda wagupotitwi kwa unakaka.

29 Aruni pakingira Pahala Pananagala, yomberihakavali muhaku gwa matakuliru ga kutoza shashilembiziwa matawu ga wana wa Israeli, kwantambu ayi neni Mtuwa Mlungu hapeni niwalyaluwi mwenga nakamu. 30 Mumuhaku agu hagutuli mabuwi ga utoza gadyengeziyi pashifuwa pa Aruni kila pakiza kulongolu kwaneni. Mushaka ashi kila mala yomberi hakaweri pakavala muhaku agu, su kawezi kugamana galii ganfira kuusu wantu wa Israeli.

31 Hagunyawi lihabiti lya kuvalira shipandi sha nguwu sha kugubika shifuwa kwa ubunta kulawa mumibaila ya wakondolu yaulekerwa langi ya buluu. 32 Hayiweri na lupenyu lwa kupitiziya mtuwi pakati, lupenyu alu haluzyengetiruwi luwiniku su naludegeka. 33 Muukosi wakuyi wa pasi, kuzyengeta wega zoseri hazilembiziwi kwa makomamanga ga langi ya buluu na ya zambalawu na ya nsheri na hakuweri viraa na viyoyu vya zahabu pakati pa makomamanga aga. 34 Pakati pa kila lilembiziwu, womberi hawatawi shiyoyu sha zahabu. 35 Aruni pakingira Pahala Pananagala Muliringu Linanagala kutenda lihengu lya utambika, viyoyu havigombi pakagendagenda. Ntambu ayi hayilanguziyi kuwera yomberi kahowa ndiri.

36 Guwagambiri wanyawi shibati sha zahabu iherepa na kulemba visoweru avi, mnanagala kwa Mtuwa Mlungu. 37 Shibati ashi hagushitawi palongolu pa shilemba lugoyi lwa buluu. 38 Aruni hakashivali shibati ashi pasheni shakuwi, mushibati ashi hakatoli ukondola wa yawautenditi wantu wa Israeli pawandaviliti tambiku nanagala, su neni hanizijimiri tambiku zawu. 39 Hagumnyawiri Aruni lihabiti liherepa lya nguwu iherepa na kumgubika shilemba sha nguwu iherepa na mkanda guherepa.

40 Haguwanyawiri wana wa Aruni mahabiti na mifunga na kofia su woneki wawera na ukwisa na uherepa. 41 Hagumvalisiyi mlongu gwaku Aruni na wana wakuyi nguwu azi, shakapanu guwaswagi lipaki na kuwatulila mawoku su kuwatula kwajili ya lihengu lyangu, wantenderi gambira watambika. 42 Viraa haguwasoneri kaputula, su kugubika shivula shawu. 43 Aruni pamuhera na wana wakuyi hawavali kaputula azi kila pawingira Muliringu Linanagala, ama pawawera pakwegera na sitalawanda sha kutambikira, kutenda utenderu wa shitambika Mupahala Pananagala. Su kwa ntambu ayi hapeni walanguziyi shivula shawu na kuwera muukondola na kulaguwa. Lilagaliru ali haliweri lya mashaka goseri kwa Aruni pamuhera na viyiwuku vyakuwi.