1 Lishaka limu Naomi kamgambiriti Luti mikamwana gwakuwi, "Mwana gwangu, neni mona nukusakulili mpalu kakuyugi, su yomberi hakakuloleri weri. 2 Su Bowazi muntu ulii, gwenga gutenditi lihengu pamuhera na wantumintumi wahinga wakuwi, yomberi kawera mlongu gwa pakwegera nentu. Su gupikanili weri, leru pamihi hakagendi kupeta shayili pahala pa kupetera shayili. 3 Su gwenga guyogi mashi na gujilembiziyi kwa utuli na guvali nguwu ziherepa. Shakapanu guseleri kugenda yomberi kwakapetera shayili. Gwenga nagutenda yomberi kavimani, kumbiti gumleki mpaka pakamalila kuliya na kulanda. 4 Pakamalira kuliya, gumloli pahala pakagenda kugonja. Gwenga gugendi na kumgubutula pamagulu gakuyi na gugonji palii. Yomberi pakiimuka hakakugambiri gwenga shintu sha kutenda."

5 Luti kamwankula, "Neni hantendi goseri yagung'ambiliti." 6 Su Luti kagenditi pahala pa kupetera shayili, katenda gambira mikamawu gwakuwi ntambu yakamgambiriti.

7 Bowazi pakamaliliti kuliya na kulanda, moyu gwakuwi gunemeleriti su kagenditi pakwegera na mikunguwi ya shayili kagonja. Shakapanu Luti kiziti mpolimpoli na kamgubuliti mumagulu ga Bowazi na kugonja palii. 8 Pashiru nentu, Bowazi kalilimukiti, su kasintukiti na kulikangasha pakamwona mdala kagonja mumagulu gakuyi. 9 Yomberi kamkosiya, "Gwenga gwa gaa?" Luti kamwankula, "Neni ntumintumi gwaku Luti. Toziya gwenga gwa mlongu gwangu gwa pakwegera, su guligubiki shipandi sha nguwu yaku paneni, kulanguziya kuwera haguniyugi neni."

10 Bowazi kalonga, "Mtuwa Mlungu kakutekeleri muhinga gwangu. Shitwatira ashi shiwera shiheri nentu kuliku shagutenditi pamberi kwa mikamawu gwaku. Gufiriti ndiri wantemba walunda ama wahushu wakuyugi. 11 Nagutira! Vinu muhinga gwangu hanikutenderi shilii shaguluwa. Toziya wantu wa lushi alu wavimana gwenga gwa mdala muheri. 12 Nakaka neni na mlongu gwa pakwegera na nfiruwa kukulolera weri gwenga, kumbiti kwana muntu mlongu gwa pakwegera nentu kuliku neni. 13 Su gulikali pashiru panu na mandawira haniyoweri na muntu mweni. Handa pakajimira kukuyuga gwenga na kuwalolera weri mwega hayiweri mbaka. Yomberi pakajimira ndiri kukuyuga gwenga, nakaka nilirapa kwa litawu lya Mtuwa Mlungu, hanukuyugi na kuwalolera weri mwenga. Su gugonji panu mpaka mandawira."

14 Su Luti kagonjiti mumagulu ga Bowazi mpaka mandawira, kumbiti kimukiti mandawira putiputi wantu nawamwona, toziya Bowazi kalongiti, "Neni nfira ndiri wantu wavimani kuwera mdala kiziti panu pahala pa kupetera shayili." 15 Viraa Bowazi kamgambiriti, "Guyaliki nguwu yaku pasi." Luti katenditi ntambu yawamgambiriti. Bowazi kitira shayili kilu malongu mawili, shakapanu kamtwika. Su Luti kawuyiti mlushi. 16 Luti kapawuyiti kwa Naomi mikamawu gwakuwi, mikamawu gwakuwi kamkosiya, "Mwana gwangu iweriti ntambu hashi aku?" Shakapanu Luti kamgambiriti kila shintu Bowazi shakamtendiriti 17 na kendereyiti kulonga, "Yomberi kampananiti shayili ayi kilu malongu mawili pakalonga, Naguwuya mawoku hera kwa mikamawu gwaku."

18 Shakapanu Naomi kamgambiriti mikamwana gwakuwi, "Mwana gwangu, guhepi mpaka guwoni shashilawira. Bowazi hapeni kanyamali jii mpaka katendi kila shintu shiweri teratera leru."