1 Bowazi kagenditi pahala pa kuliwona aku kumlyangu mkulu gwa lushi na kalivagiti palii. Shakapanu mlongu gwapakwegera gwa Elimeleki, ulii Bowazi kamkanditi, kapititi pakwegera na palii. Bowazi kamshemiti, "Ganja gwangu gwizi gulivagi panu. Nfira kuyowera na gwenga." Su womberi walivagiti pamuhera. 2 Shakapanu Bowazi kawashemiti wakulu lilongu wa lushi, kawagambiriti, "Mulivagi panu," womberi walivagiti. 3 Su Bowazi kamgambiriti ulii mlongu gwakuwi gwapakwegera nentu, "Naomi yakiziti kulawa Mowabu, yomberi kafira kumshuwuziya lilambu lyaliweriti lya Elimeleki mlongu gwetu. 4 Su neni mona mbaka nikugambiri visoweru avi. Vinu payiwera gufira lilambu ali, gulihemeli kwa ukapitawu wa yawalivaga panu pamuhera na ukapitawu wa wakulu wa wantu waneni. Kumbiti pagufira ndiri, su gung'abiri nivimani toziya neni namuntu gwa pili pa gwenga."

Su yomberi kawankuliti, "Neni hahemeli."

5 Su Bowazi kalongiti, "Mbaka, pagulihemera lilambu ali kulawa kwa Naomi, gumuyugi Luti mkenja ulii muntu gwa Mowabu. Kwa kutenda hangu, Luti hakaweri na wana wapalu womberi hawahali lilambu lya mpalu gwakuwi yakahowiti."

6 Muntu ulii kawankuliti, "Hapeni neni hemeli toziya wananguta wangu hapeni wahali lilambu ali. Guhemeli gwenga" 7 Mumashaka galii kuweriti na shitiba Muisraeli, muntu yoseri yakahemiliti lilambu liweri lya muntu yumonga, muntu ulii yakashuwuziti lilambu kafiruwa katoli shilwatu shimu sha ulii yakahemeliti. Ntambu ayi ilanguziya kuwera shitwatira ashi shiwera teratera muisi ya Israeli. 8 Su muntu ayu kamgambiriti Bowazi, "Gulihemeli gamweni lilambu." Shakapanu yomberi kavuliti shilwatu shakuwi na kampananiti Bowazi.

9 Su Bowazi kawagambiriti wakulu walii pamuhera na wantu yawaweriti palii, "Leru mwawoseri mwenga muwera wakapitawu kuwera neni hemela lilambu kulawa kwa Naomi, pamuhera vyoseri vyaiweriti vya Elimeleki na Kiliyoni na Mahaloni. 10 Viraa neni numtola Luti, mdala kulawa Mowabu, mkenja gwa Mahaloni kaweri mdala gwangu, su yomberi hakawiyuri wana wapalu hawahali vya ulii yakahowiti. Mwenga mwakapitawu leru." 11 Su wakulu walii pamuhera na walii yawalivagiti kumlyangu mkulu gwa lushi walongiti, "Yina twenga twawakapitawu. Mtuwa Mlungu kamtendi mdala yakiza ukaya kwaku kawiyuri wana wavuwa gambira Raheli na Leya ntambu yawatenditi. Twenga tuvimana kuwera gwenga haguweri mlunda mulukolu lwa Efraimu na hagumaniki nentu panu Mubetirehemu. 12 Kupitira uleri Mtuwa Mlungu yakagenda kukupanana kwa muhinga ayu, kaya yaku hayiweri gambira kaya ya Peresi, ulii Tamari yakamuwuyiri Yuda."

13 Su Bowazi kamtoliti Luti kuwera mdala gwakuwi. Shakapanu yomberi kaliwoniti na mdala gwakuwi, Mtuwa Mlungu kamtenditi Luti kaweri na yinda na Luti kawiyuriti mwana mpalu. 14 Wadala wa Betilehemu wamgambiriti Naomi, "Kakwisuwi Mtuwa Mlungu, ulii lishaka ali kakuleka ndiri gwenga pota kuwera na mkombora gwa kaya yaku! Yomberi hakaweri muntu yakamanika nentu kupitira Israeli. 15 Yomberi hakakutendi kuliholi kuwera gwasyayi kayi na hakakuloleri gwenga pagwiza kuwera mgogolu. Mikamwana gwaku, ulii yakakufira nentu kamwiwula mwana mpalu, mwana ayu hakaweri gwa mana nentu kuliku wana wapalu saba."

16 Su Naomi kamtoliti mwana ulii kamtula pashifuwa pakuwi na kumlera. 17 Wadala yawalikaliti pakwegera palii walongiti, "Naomi kana mwana mpalu." Womberi wampanana litawu Obedi. Yomberi kaweriti tati gwa Yese, ulii yakaweriti tati gwa Dawudi.

18 Na avi ndo viyuwuka vya Peresi. Peresi kamwiwuliti Hesironi, 19 Hesironi kamwiwuliriti Rami, Rami kamwiwuliriti Aminadabu. 20 Aminadabu kamwiwuliriti Nahishoni, Nahishoni kamwiwuliriti Salimoni. 21 Salimoni kamwiwuliriti Bowazi, Bowazi kamwiwuliriti Obedi. 22 Obedi kamwiwuliriti Yese na Yese kamwiwuliriti Dawudi.