1 Paweriti na muntu yumu gwa lushi lwa Rama, gwa isi ya vigongu vya Efraimu, litawu lyakuyi Elikana, mwana gwa Yeruhamu, yakaweriti mzukulu gwa Elihu, yakaweriti mweni gwa Tohu, kaweriti mwana gwa Sufu, likabila lyakuyi liweriti Mwefraimu. 2 Elikana kaweriti na wadala wawili, yumu wamshemiti Hana na gwa pili Penina. Penina kaweriti na wana, kumbiti Hana kaweriti ndiri na wana. 3 Kila shinja Elikana kagenditi mwanja kulawa Rama kugenda Kuguwira na kumtambikira Mtuwa Mlungu yakana likaka kulii Shilu. Aku, wana wawili wapalu wa Eli, Hofini na Finehasi, waweriti watambika wa Mtuwa Mlungu. 4 Kila shaka Elikana pakalaviyiti tambiku kampananiti mdala gwakuyi Penina lifungu limu lya shinofu lya tambiku na lifungu limulimu kwa wana wakuyi wapalu na wadala. 5 Tembera Elikana kampananiti Hana lifunga likulu nentu toziya kaweriti kamfira nentu, Mtuwa Mlungu kampananiti ndiri mwana. 6 Kumbiti Penina kamsoziya Hana, mashaka goseri kaweriti pakamkalaziya nentu Hana toziya Mtuwa Mlungu kampanana ndiri wana. 7 Vitwatira avi vyendereyiti shinja mpaka shinja. Kila mala Hana pakagenditi kunumba ya Mtuwa Mlungu, Penina kamkalaziyiti mpaka iwera Hana kankulira na kulema kuliya shoseri shirii. 8 Elikana, mpalu gwakuyi, kila mala kamkosiyiti, "Gulira shishi? Hashi gulema kuliya? Ntambu gaa gwana kwinginika mumoyu mwaku? Hashi, neni nfaa ndiri kwa gwenga kuliku wana lilongu wapalu?"

9 Lishaka limu, pawaweriti wamalira kuliya na kulanda mnumba ya Mtuwa Mlungu aku Shilu, Hana kagoloka na kuluwa kwa Mlungu. Shaka ashi, mtambika Eli kaweriti kalikala kushiti pakwegera na mpanda ya Numba ya Mtuwa Mlungu. 10 Hana kaweriti na hinginika nentu na pakaweriti kankumluwa Mtuwa Mlungu kaweriti kankulira kwa hinginika. 11 Yomberi katula nazili pakalonga, "Gwee Mtuwa Mlungu yakana likakala, handa pagulola kutabika kwa neni ntumintumi gwaku, gumpanani neni ntumintumi gwaku, mwana mpalu, ntakula hanikupanani gwenga Mtuwa Mlungu mwana ayu mpalu kaweri gwaku makaliru gakuyi goseri, hapeni kamogwi vili nakamu toziya katurwa kwa Mtuwa." 12 Hana kendereyiti kumluwa Mtuwa Mlungu kwa shaka shitali, na mtambika Eli kawera kankulola miromu yakuyi. 13 Hana kaweriti kankuluwa shimoyumoyu, na miromu yakuyi iweriti yankuvinavina, ira liziwu lyakuyi lipikinirika ndiri. Hangu Eli kaliholiti handa Hana kalowera. 14 Hangu Eli kamgambira, "Hagwendereyi kulowera mpaka ndii? Guleki kulanda divayi" 15 Kumbiti Hana kamwankula, "Ndala mtuwa gwangu, neni ndo mdala yantabika nentu. Neni nanda ndiri divayi pota shiloweru shikalipa, ila nweriti nankumlavilira Mtuwa Mlungu yagawera mumoyu mwangu. 16 Naguholera kuwera neni ndo mdala yakafaa ndiri shintu. Kwa shaka shoseri ashi nweriti panduwa panonga nankutakula magaziya gangu na ntabika ya neni." 17 Eli kamgambira, "Gugendi kwa ponga, na Mlungu gwa Israeli kakupanani shirii shaguluwa." 18 Hana kalonga, "Nduwa neni ntumintumi gwaku guholeri weli," Hana kagenda zakuyi, kaliya shiboga na kaweriti ndiri kayi na hinginika.

19 Shirawu yakuyi mandawira, Elikana na walongu wakuyi wimukiti mandawira putiputi, na pakumguwira Mtuwa Mlungu, kawuyiti ukaya Rama. Elikana kagonja na mdala gwakuyi Hana, Mtuwa Mlungu kawankula kuluwa kwakuyi Hana. 20 Hangu Hana kapata yinda, kamlera mwana mpalu. Hana kamshema mwana ayu Samueli, toziya kalongiti, "Nimluwiti kwa Mtuwa Mlungu." 21 Shakapanu shaka shisoka kayi Elikana na kaya wakuyi woseri wagenda kayi Shilu na kumlavilira Mtuwa Mlungu tambiku ya kila shinja na nazili. 22 Kumbiti mwanja agu Hana kagenditi ndiri, toziya kamgambiriti mpalu gwakuyi, "Katepu mwana pawamlekiziyiti konka, hanimjegi su katuluwi kulongolu kwa Mtuwa Mlungu, kasigali aku mashaka goseri."

23 Elikana, mpalu gwakuyi, kamwankula, "Gutendi lyaguliwona liherepa. Guheperi mpaka pagumlekiziya mwana konka. Mtuwa Mlungu kayitendi nazili yakuyi kuwera nakaka." Su, Hana kasigaliti ukaya, kendereya kumlera mwana gwakuyi mpaka pakamlekeziyiti konka.

24 Pakamlekeziyiti konka kamjegiti pamuhera na ng'ombi shipalu gwa mivinja mitatu, mfuku gwa kilu tisa gwa ubumu na shiwiga sha divayi. Hana kamwingiziyiti mwana munumba ya Mtuwa Mlungu aku Shilu, na mwana kaweriti mdidika hera. 25 Pawaweriti wamlikitula kala ng'ombi shipalu ulii, wamjegiti mwana kwa mtambika Eli. 26 Hana kamgambira, "Ntambu Mtuwa Mlungu kakutenda guweri mkomu hashi guhola, neni ndo mdala ulii yakaweriti kagoloka kulongolu kwaku pakamluwa Mtuwa Mlungu. 27 Nimluwiti Mtuwa Mlungu kanupi mwana ayu na yomberi kanupiti shilii shanduwiti. 28 Toziya ayi, neni nimpanana Mtuwa Mlungu mwana ayu, shaka shoseri pakawera mkomu, katuluwa kwa Mtuwa Mlungu."

Shakapanu wamguwira Mtuwa Mlungu aku.